بانگەواز پەی یەکیەتی و یەک ڕێزی حزب و ڕێکوزیا سیاسیەکا رۆژهەڵاتو کوردسانی
ئێمە خاوەنێ ئی واژۆوا واریە، سەرو بنەماو ئا پرنسیپ و هەنگاما کە چێنە مەیا، داواو یەکێتی و یەک ڕێزی جە حزب و رێکوزیا سیاسیەکا رۆژهەڵاتو کوردسانی کەرمێ.
ئێمە خاوەنێ ئی واژۆوا واریە، سەرو بنەماو ئا پرنسیپ و هەنگاما کە چێنە مەیا، داواو یەکێتی و یەک ڕێزی جە حزب و رێکوزیا سیاسیەکا رۆژهەڵاتو کوردسانی کەرمێ. هەلومەرجو هەستیارو رۆژهەڵاتو کوردسانی، ئالنگاری چارەنووسسازش ۉەردەمو نەتەوە و جمشو ڕزگاریوازو کوردی جە رۆژهەڵاتو کوردسانیەنە نیانەرە. گێرەمو فاڕیای بنەڕيتی جە ڕۆژهەڵاتەنە، ۉەرپەرسی تاریخیش پەی گردو حزبەکا ڕۆژهەڵاتی پەی یەک ـ هەنگامی و ۉەرەنە گرتەی ستراتژییوی هامبەشی، سەرو بازێو بنەمێ و خاڵێ سەرەکیێ، ساز کەردەن. کۆماری ئیسلامی، پێسە سیستمێوی توتالیتر، چانیشانە جا ئاکامو ۉەرۉەڵایی ناڕەزایەتیا، وێنیشاندایا و مانگرتە گردیا، جە ناکامەنە بێ چۆکێرە. چەنی ئانەیچە کە هەرەس ئاردەی رژیمو کۆمارو ئیسلامی بێگومان دەرفەتێۉی زەڕین پەی نەتەوەو کوردی، پەی ئانەی سەروەری سیاسی وێش دەسەبەر کەرؤ، خولقنو، ئۆ ئانەی مشؤ جە نەبیەی ئامادەیی هێزە کوردیەکانە، ئالنگاری و مەتەرسیێ فرە تاریخیێش پەی کوردی شۆنیۆ با. جە ئەگەرو هۆرۆشنیای دامودەسگا ئەمنیەکا دۆڵەتی داگیرکەری جە کوردسانەنە، هەم پەی دەسەبەرکەردەی مافو سەروەری نەتەوەو کوردی و هەم پەی فەراهەم کەردەی ئاسایشی نیشتمانی پەی هاموەڵاتیا، هێز و ڕێکوزیا سیاسیەکێ ڕۆژهەڵاتی ۉەرپەرسیاری ئەخلاقی و نەتەوەییشا هەن. جە هەرۆڵیێۉی چامنەنە و جە نەبیەی یۆگرتێۉی ئەرەمەرزیایی بەینو هێز و ڕێکوزیاکا ڕۆژهەڵاتیەنە، ئیمکانو دوبارە ئەۉەبیەی ئەزمونی تاڵو باشووری ئینا ئارانە. یۆگرتەیی ئەرەمەرزیایی جە رۆژهەڵاتەنە سەرو پلاتفۆڕمێوی نیشتمانی، هەمیشە ئەویس بیەن. بەڵام، جە هەلومەرجو ئیسەیەنە ئا یۆگرتەییە ئەویسیێوی ئیسەیی و واستێوی نەتەوەییا. پۆکەی گردو حزب و ڕێکوزیا سیاسیەکا ڕۆژهەڵاتو کوردسانی بانگئاست کەرمێ تا سەرو ئی بنەمایا پەی یۆگرتەیی ئەرەمەرزیایی نەتەوەیی، کە ڕەنگئەوەدەرو فرە ڕەنگی ڕۆژهەڵاتی بؤ، ڕێکێ گنا.
بنەماکێ ڕێککۆتەی
ا ـ سەرو بنەماو دەسەبەرکەردەی یەکسانی سەروەری سیاسی نەتەوەیی پەی ڕۆژهەڵاتو کوردسانی.
ب ـ بە بنەما گرتەی پرنسیپو مافی سەروەری سیاسی پەی گرد نەتەوەکا جوگرافیای سیاسی ئێرانی جە ڕاو هامئاهەنگی، هامپەشتی و سازکەردەی وەرێوی هامکاری چەنیشا.
پ ـ بە بنەما هۆرگرتەی یەکسانی جێندەری و قەبووڵو بە کردەوەی یەکسانی، ڕابەرایەتی و کاریگەری ژەنێ جە جمشو ڕزگاری وازو کوردسانیەنە.
ج ـ بە بنەما هۆرگرتەی پرنسیپێ دیموکراتیکێ جە ئەرەمەرزنایی کەردەی یەکگرتەیی جمشو نەتەوەیی، ۉەرگرتەی جە ساز کەردەی ناوچێ چێردەسەڵاتێ حزبا.
چ ـ بە بنەما هۆرگرتەی و گارانتی کەردەی مافێ یەکسانی جیاوازییە شناسیەکا ( دینیێ، زاراوەیێ، ڕەگەزیێ) جە کۆمەڵگاو کوردسانیەنە.
ح ـ بە بنەما هۆرگرتەی سەروەری یاسای و پەیڕەوکەردەی شەفافیەتی ئیداری جە گردو ئەرەمەرزیاکانە.
بە بنەماهۆرگرتەی ئی پرنسیپا، داوەتو گردو حزب و ڕیکوزیا سیاسیەکا ڕۆژهەڵاتی کەرمێ کە جە ڕاو فەراهەم کەردەی یەکگرتەیی ئەرەمەرزیایی نەتەوەیی، بە کردەوە ئی هەنگاما بنیا.
هەنگامە پراکتیکەکێ
١. ئەرەمەرزنای شۆرایی باڵایی ڕابەرایەتی و بڕیاری، پێکئاما جە حزب و ڕیکوزیا سیاسیەکا رۆژهەڵاتی.
٢. ڕێکوستەی هێزو پێشمەرگەی و گەریلای و پێکئاردەی ستادی فەرماندەیی سپایی نیشتمانی ڕۆژهەڵاتی کە گرێدریا بە بڕیارەکا شۆرایی باڵاو ڕابەرایەتی و بڕیاری بۆ.
٣. پێکئاردەی کۆمیسیۆنو پێوەنیەکا شۆراو باڵاو ڕابەرایەتی و بریاری پەی چالاکی دیپلۆماتیک و نمایەندەگی سیاسەتو یۆگرتەیی کوردی جە ڕۆژهەڵاتەنە.
٤. پېکئاردەی دەسگای دادوەری سەربەوێ.
٥. پێکئاردەی مێدیای نەتەوەیی کە زوانحاڵو شۆراو باڵاو ڕابەرایەتی و بڕیاری بۆ.
٦. پێکئاردەی ئەرەمەرزیایەو پارېزنای ئاسایش کۆمەڵایەتی کوردسانی.
٧. پێکئاردەی کۆمیسیۆنو ئامادەکاری پەی ڕاۉەبەردەی دامودەسگاکا کوردسانی،بە هەمئاهەنگی و بەشداری کۆمەڵگای مەدەنی.
٨. نایاسایی ئەرمانای هەرجۆرە هۆڵی تاکەکەسی و تاکە حزبی پەی تۆڵەئەۉەئەسای و یا سزادای هاموەڵاتیا جە ئەگەرو نەمەنەی دامودەسگاکا کۆماری داگیرکەرو ئیسلامی جە کوردسانەنە.
جە کۆتاییەنە، ئەویسا کە گردو حزبەکا ئاگادارێ ئا ڕاسیە با کە خەڵکو کوردسانو ڕۆژهەڵاتی نە متاوۆ پەی ماوێوی نادیاری چەمەڕاو یەکڕیزی حزبەکا بۆ و نە قەبووڵیچ کەرۆ جە ئەگەرو هەرۆڵیێویەنە، ئا حزبێ بە کەڵک گرتەی جە هێزو چەکی گردو جمگەکا دەسەڵاتی قۆرخ کەرا و ئەزمونو باشوری دوبارە کەراوە.
ژ.ت
