٢٥و ئازاروو ٢٠٢١ـیوە تا ئیساتێ هیچ زانیاریێوە سەروو ژیوای ڕابەروو گەلوو کوردی عەبدوڵا ئۆجالانی، کە چێروو گۆشەگیریی ڕەهاینە ئەرەگیرا، نەیاوان دەسێ. کۆمیتەو دژ بە ئەشکەنجەو ئەرووپا (CPT) ئەرەیاونابێش، ساڵەو٢٠٢٢ێنە سەرێ دوورگەو ئیمرالییشا دان، بەڵام ڕاپۆرتەکەش پەی بۆ ڕای گردینی وەڵا نەکەرەنۆ. سی پی تی ساڵەو ٢٠٢٤ سەرێ بەشێو جە زیندانەکاو تورکیایش کەرد. بەڵام ئی جارە نەلێ ئیمرالی.

گرووپو پزیشکە خەباتکاراو کورد-ئاکاد بارەو تەندروسی و سڵامەتیی عەبدوڵا ئۆجالان، حامیلی یڵدرم، عومەر خەیری کۆنار و وەیسی ئەکتاشیوە، کە ئیمرالیینە زیندانیی کریێنێ، نیگەرانییش بەروست و ڕاپۆرتێوەش چا بارەوە ئامادێ کەردە.

ڕاپۆرتەکێنە ئاماژە پانەیە کریان، کە پزیشکێ پەیشا نییا زانیاری سەروو بارودۆخی تەندروسیی ڕابەروو گەلوو کوردی عەبدوڵا ئۆجالانی ورگێرا.  

بە ناموونیشانوو "سەبارەت بە بارودۆخی تەندروسیی زیندانوو دورگەو ئیمرالی" ڕاپۆرتەکێ باسوو ئانەیە کەرۆ، کە عەبدوڵا ئۆجالان ساڵەو ١٩٩٩یوە ئیمرالیینە گیریان، بەتایبەت پەی بارودۆخی تەندروسیی شەرت و مەرجوو دوورگەو ئیمرالی قبوڵکریا نییا. هاموەخت چەنی بارودۆخوو کەشوهەوای، مەرجی سیاسییچ تەرسێوە گەورێنە پەی تەندروستییش. مافوو دەسپاکی نییا. هەرپاسە دەرفەتی پێویس پەی چەمداریی پزیشکیی نییا.

پێویسی و داواکاو سی پی تی چی بوارەنە لاو دەوڵەتوو تورکیوە پەشتگۆشێ وزیا. وەختێو گرنگیی سیاسیی عەبدوڵا ئۆجالانی وەرچەم گێرمێ، دۆخەکە فرە تەرسدارا. پەوکای دەسوستەینەی بەپەلەش پێویسا. مشۆم بەڕێز ئۆجالان چێروو چەمداریی پزیشکیی بێسنوورینە بۆ. پێویسا دەمودەس گۆشەگیریی ورگێریۆ."

 ڕاپۆرتەی ئامادەکریێ پزیشکانە، چوار پەرسێ سەرەکیێ ئاماژەشا پنە کریان:

١- ڕێژەو شۆی و ڕتوبەو دوورگەکەی هۆکارێوە تەرسناکا پەی سەروو تەندروسیی بەڕێز ئۆجالانی".

٢- هەلومەرجوو دوورگەکەی ڕا مدۆ تەنیا چند ڕاکارێوە گیریارە وەر پەی کەمکەردەیۆ تەرسە تەندروسییەکا کە بۆنەو کەشوهەوایۆ وەشێ با.  

٣- گرفتەکاو دەسیاوای بە خزمەتگوزاریی تەندروسی دورگەکەنە.

٤- بەڕێز ئۆجالان ژووری تاکەکەسیینە مازیۆوە، ئینەیچ کاریگەریی فرەش سەروو تەندروسیی جەستەیی و دەروونییش هەن.

پێویستە شاندێوە تەندروسیی میاندەوڵەتی سەرێ ئیمرالی بدا.

ئاخروو ڕاپۆرتەکێنە بەیاننامێوە بە نامونیشانوو "جەنگ کێشێوە تەندروسیی گردینا" کە لاو کۆمەڵەو پزیشکاو تورکیایوە، ساڵەو ٢٠١٨ وەڵا کریابێوە، یاد وزیاو ە و دەسنیشان کریا، کە پەی ژیواێوە تەندروسی، ژینگەو جەنگی و ملەملەکا پێویسا بە ڕای ئاشتییانێ چارەسەرێ کریا.

ڕاپۆرتەکێنە ئی وەڵێنیاراو واری پەی دۆخەکەی دریێنێ:

- پێویسا شاندێوە میاندەوڵەتی، کە پسپۆڕ و کارمەنداو تەندروسیش چنە با بەشدارێ با.

- پێویسا بەپەلە مۆڵەتوو بەرشیەی دوورگەی ئیمرالی بە شاندەکەی بدریۆ.

- پێویسا CPT هەڵوێستێوە ڕۆشن نیشانە بدۆ، دەمودەس ڕاپۆرتەو سەردایەکەو ئەیلوولوو ٢٠٢٢ پەی ڕای گردینی وەڵا بکریۆوە.

- پێویسا ئەنجوومەنوو ئەورووپای ڕاپۆرتەکاو CPT و دەرەنجامەکاش بەربارۆ.  

- پێویسا ئەنجوومەنوو ئەورووپای گردوو ئەگەرەکاو وێش بەکار بارۆ پەی بەیاگەیاونای قەرارەکاو دادگاو مافوو ئینسانوو ئەوروپای.