دەوروو دووەموو ورچنیەی سەرۊککۊماروو تورکیای جبەروو وەڵاتیوە دەسش پەنە کەرڎ. سیاسەتمەداروو کورڎی عوسمان بایدەمیر، کە وەڵی ورچنییەکاو ١٤ و ئایاری بەشڎاریێوە بەقووەتش جە هەڵمەتەو بانگەشەو ورچنیەی پارتوو چەپوو سەوزینە بەریتانیا و ئەورووپانە کەرڎ، پەی دەوروو دووەمیچ داواش جە دەنگدەراو بەروو وەڵاتی کەرڎە بەشڎاری کەرا و دەنگ دژوو زوڵمی و ستەمی بڎا.

بانگەوازەکەو بایدەمیری:

"ئەوەڵ سوپاسوو ئا کەسا کەروو، کە دەنگشا بە ئاشتی و ئازادی و دیموکراسیی دا. ئێمە گرڎما شایەتیی ئانەیما دا، کە ورچنیەێوەما بارودۊخێوە نایەکساننە ویەرنا. بەداخۊ ئیساتۍ پەرلەمان ئینا دەسوو ئا جەنگەران و جەنگوازانە، کە گەرەکشانە فاشیزمی گەورەتەر و بەقووەتتەر کەرا.

وەلۍ هەڵای نەتەمامیان. مۊرە و کاریگەریش ئینا دەسوو شمەنە. ورچنیەی سەرۊککۊماری جە ٢٨وو ئایارینە دووبارە کریۊوە. شمە تاودۍ جارێوە تەر کیتر بلدێوە سەروو سندوقەکا و هەقە کەرڎۍ. تاودۍ ڕاگێری جر  ئەرەمەرزیاییکەرڎەی فاشیزمی ڕەهای کەرڎۍ. ئیساتۍ پەرلەمان ئینا دەسوو هامپەیمانیی جمهوورینە.

دەنگدەراو بەروو وەڵاتی بەینوو ٢٠ پەی ٢٤وو مانگەو ئایارینە مافوو دەنگدایشا هەن. بانگەوازوو ئێمە ئانەن، کە مەبۊ حەرگیز فاشیزم ئەرەمەرەزیۊ، متاومۍ جە یاسانیایرەی و ڕاوەبەریی ساعیب عەقڵیەتی جیاوازی سیاسیینە هەناسە بدەیمۍ. چی قۊناغ و پڕۊسەنە، داوا جە گرڎوو ئا دۊس و ئشناساما کەرمۍ، کە نەلێبێنۍ دەنگدای، بلا و بەشڎاری جە دەنگداینە کەرا. مەبۊ ئانەما ویر بشۊ، کە ئینە پەی ڕاگێرتەین جە فاشیزمی و هەقکەرڎەیۊ جە فاشیزمی ".

س.ز