سەبارەت بە ورچنیەیەکاو ١٤و ئایاری، سیاسەتمەداروو کورڎی، عوسمان بایدەمیر، بانگەوازش جە گەلوو ئامەدی و ڕحای کەرد دەنگ بدا بە پارتوو چەپی سەوزی، بایدەمیر دووۍ جار بییەن بە شارەوانوو ئامەدی، ئینجا جارێوەیچ نوێنەروو شاروو ڕحای بییەن پەرلەماننە.

پەیامەکەو بایدەمیری پەی گەلوو ڕحای و ئامەدی پێسنەن:

«واڵە و برایام، گەلوو ئامەدی، گەلە دڵسۊزەکەما، جە کانگاو دڵیوە سڵامتا وەنە بۊ، ئامەد ئا شارەنە پەی ماوەو هەزاران ساڵا وەرگێرییش جە بەها ئینسانییەکا کەرڎەن، وەڵات و ئازادییش پارێزنان. دڵنیانا چی ڕوە سەختەنە، دیسان پێسە قەڵاو ئازادی و یەکسانی بەرگنۊوە. ئامەد حەرگیز دەسبەرڎاروو ڕۊڵەکاش نەبییەن، دووەبارە پێسە پەشتیوانوو ئی گەلییە بەر گنۊوە. واڵە و برایام، دوژمناو کورڎی، حەوڵێشا دۍ جە ڕاو نەژادپەرسییوە کورڎی دلێنە بەرا، گەرەکشابۍ جە ڕاو دلێنەبەرڎەی شمەوە وێشا مەرزنارە. واتشا بە نیایرەی قەیومەکا، پاسە کەرا کە کورد و کورسان و گەلوو ئامەدی واز جە دۊزەکەیشا بارا. واتشا سوری وێران کەرمۍ کورڎەکۍ واز جە کوردبییەی و کوردسانی مارا. واتشا ئەگەر وەرنیشتی گێرمۍ ئیتر کورڎەکۍ مل کەچ کەرا.

جە ١٤و ئایارینە، خەیمۍ ستەمی سەروو خاکەکەیتاوە لا بدەیدێ

ئیساتۍ وەختوو ئانەی ئامان جوابۍ خاشا دەیدێوە، جە ١٤و ئایارینە و جە ڕاو سندوقوو دەنگدایۊ. کورڎەکۍ حەرگیز دەسبەرڎارۍ هەڵوێست و وەڵاتپارێزنی و ئشناسنامە و زوانەکەیشا نەبیۍ، پەوکای حەرگیز دەسبەرڎارۍ ڕۊڵەکایچشا مەبا. واڵە و برایا، ستەم و زۊرڎاری کەمش مەنەن. مۊرە ئینا دەسوو شمەنە، کرێڵ ئینا بە شمە، جە ١٤ و ئایارینە لوودۍ سەروو سندوقوو دەنگدای تا ئی خێمۍ ستەمی سەروو خاکەکەیماوە لا بدەیمۍ. تا ڕوۍ تازە، وەهارێوە تازە، فرسەتێوە تازە گنۊوە دەسوو گەلەکەیما. دڵنیانا دووەبارە ئامەد دەورە تاریخییەکەو وێش گێڵنۊ، ئامەد پەشتیوانوو گەلەکەیمانە، ئامەد قەڵاو گەلەکەیمانە. دووەبارە جە دڵۊ سڵام جە گەلوو ئامەدی کەروو، شەرەفێوە گەورەن کوڕوو گەلوو کورڎی و کوڕوو ئامەدینا.

جوابوو ڕحای بەقووەت بۊ

جە یاگێوە دوورۊ، جە غەریبیوە سڵام کیانوو پەیبۊ ڕحای، واڵە و برایا، وەختێو ماچا ڕحا، ئینە یاگۍ شەرەفی و شکۊینە پەی من. وەختۍ ماچا ڕحا، پەی من یاگۍ دڵسۊزیینە. جە ساڵەو ٢٠١٤، ڕحا بەرەو دڵوو وێش پەی کەرڎاوە. ساڵەو ٢٠١٥، ڕحا واتش، بەرە ڕووەو ئیبراهیمییەکارە مەوزوورە. ئینە پەیاموو ڕحای بۍ. دڵنیانا چی قۊناغەنە، جوابوو ڕحای تاریخی بۊ وەراوەروو نەمروودەکا. ئی زیهنیەتوو ئاکەپە و مەهەپە و ئەرگەنەکۊنەی، خاکوو ئێمەشا ئەرەگیر کەرد، هامپەیمانییەکەشا چا پەیامەنە وێش وینۊوە، کە جە ڕاو دلێنەبەرڎەی ئێمەوە وێشا مەرزنارە. پەوکای مشۊم جە ورچنیەیەکاو ١٤و ئایارینە و جە ڕاو سندوقوو دەنگدایۊ جوابیوە مازیماڕشا دەیمێوە، کە ڕحا شاروو ئیبراهیمییەکان. چاگە سەرڎەموو نەمروودەکا دماییش ئاما. با بلمۍ سەروو سندوقوو دەنگدای و دەنگ بدەیمۍ بە پارتوو چەپی سەوزی، تا گردوو عالەمی بزانۊ، ڕحا وەراوەروو نەمروود‌‌ەکاوە مرڎان».

س.ز