بەهادین نوری، سیاسەتمەدار و کۆشەری دێرین جە ٩٣ ساڵەو تەمەنیشەنە کۆچی دماییش کەرد.
نوری چەندین ساڵێ بێ تووشو نەوەشی بییەبێ و نەوەشیەکەی یاگەگیر کەردەبێ. نزیک بە ١٠ ڕوێ جەی وەڵتەریچ تووشو پەیتا و نەوەشی کۆرۆنای بییەبێ و دەرەنجام کۆرۆناکە زەفەرش پنەبەرد و سەر سەبای ئارۆی جە شارو سلێمانیێ کۆچی دماییش کەرد.

بەهادین نوری، یۆ جە ئا سیاسەتمەدار و کۆشەر دەگمەنانەو پانیشتو کوردستانی و ئێراقی بێ کە ئامانج خزمەتکەردەی بە گەلی و چینە بندەستکانو گلێرگەی بێنە و جە سەرەتا تا کۆتایی گەل و چینە بندەسەتەکێ گلێرگەیش نەئاستێ جیا و هەمیشە وەراوەر بە دەسەڵاتەکێ ئێراقی و دەسەڵاتی کوردی جە پانیشتو کوردستان خاوەن هەڵوێست بییەن بە تایبەتی دژ بە سیاسەت و دەسەڵاتداری پەدەکە-ی دژبەری وێش نیشانە دان و وەرانوەرش مدرانەوە.

بەهادین نوری، ساڵەو ١٩٢٧ی، جە دەگاو (تەکێ)ی سەر بە قەرەداغ-ی جە ئەڎێ بییەن.، باو و باپیرش پیشەشان مەڵایی بییەن و پەوکەی مەلا نوری تاتەش حەزش کەردەن بەهادینی کوڕش درێژە بە هەمان پیشەی بڎۆنە و پەی وانای ئایینی بشۆنە شارو بیارێ سەر بە هەرێمو هەورامانی و جەلاو مەلا عەبدولکەریمی مودەریسی ببۆنە بە فەقی. بەڵام بەهادین بە پێچەوانەو حەزەکەو مەلا نوری تاتەیش، ڕێبازێوی جیاواز تەر هۆرمەوچنۆنە و ساڵەو ١٩٤٦ی جە تەمەنو ١٩ساڵییەنە جە حزبی شیوعی ئێراقیەنە مەبۆنە ئەندام. دلێ حزبیەنە چنەئاما و چابوک و چالاک بییەن و هەر زوو وێش وەڵێوستەن و یاونان پنە و جە دمای ٣ ساڵان جە ئەندام بییەش جە حزبی شیوعیەنە، ساڵەو ١٩٤٩ی بییەن بە سکرتێرو حزبی شیوعی. ساڵەو ١٩٥٣ی ڕژێمی پادشایی ئێرقی دەستگیر کش مەکرۆنە و سزاو جەداردایش پەی مەبڕیۆنەوە. دماتەر چێرو فشاری و ناڕەزایەتییەنە جەدارداکەیش هۆرشنیاوە و سزاکەش فاڕیا پەی زیندانی هەتاهەتایی و دماتەر ئازاد کریا.
بەهادین نوری، جە تا ژیانە بێ سەرەڕاو سەختی و دژواریەکان و نەوەشی و فرەیی تەمەنی، بەڵام کۆڵەش بە کۆشای و خەباتی نەڎا و بەشێوازێ جیێ درێژەش پنەدا. ساڵەو ١٩٩٤ی (بزوتنەوەی ئازادیخوازانی کوردستانی)ش مەرزنارە و دماتەر بەهۆکارو نەوەشی یانەنەنیشتەرە و وێش بە نویستەی و نویستەیۆ یادەوەریەکانش سەرقاڵ کەرد و جە ئی چوارچوەنە دوێ کتێبێش بەنامێ ڕۆژە سەختەکان و بیرەوەریەکێش جە دوێ بەرگێنە چاپێ وەڵاوێ کریێنێ. هەرپاسە یاداشتەکێ (مستەر ریچ)ی گەڕیدەی بەریتانی (دوێ سەدێ جەی وەڵتەر سەردای کوردستانیش کەردەن) هۆرگێڵنێنێ پەی کوردی و چاپ و وەڵاوش کەردەنەوە. 

کۆشەڕ و سیاسەتمەدار و نویسەر، بەهادین نوری دەرەنجام ئارۆ ٣شەممە، ٢٠٢٠/١٢/٠١، بەنەوەشی کۆرۆنای کۆچی دماییش کەرد و تەرمەکەش جە دەگاو تەکیەی زادگاو وێش بە مەراسێوی شکۆدار ئەسپەدە کریا.