یۆ چا کەسا کە دژوو گۆشەگیریی تندوو ئیمرالیین و داواو ئازادیی جەستەیی ڕابەروو گەلوو کوردی عەبدوڵا ئۆجالانی کەرۆ، چالاکەی ئشناسیێ فێمینیستییەو هیندستانی ئەبها بەهیایەنە. 

ئەبها بەهیا، یوە جە ئەرەمەرزنەراو جاگۆری گرامین و ڕاوەبەراو دەسوەڵیوزوو فێمینیستی جیهانی 'یەک ملیار سەرەش وردان'، چەنی پەیامکیانوو ئاژانسەکەیما، سەرکان دەمیرەل، سەبارەت بە گرنگیی ئازادیی عەبدوڵا ئۆجالان و پارادیگماکەیش قسێش کەردێ.  

'یاگەدارێوە گرنگ دژوو سیستموو سەرمایەداری'

ڕابەرەی فێمینیستە ئەبها بەهیا جەختش جە گرنگیی پارادایمی عەبدوڵا ئۆجەلان سەبارەت بە ناستەی کاریگەریی قورسوو سیستموو سەرمایەداری سەروو گلێرگەکا کەردۆ و واتش: "بە ڕاو من ویرۆکەکاو عەبدوڵا ئۆجالانی پەی دیموکراسی و یەکسانی ڕا و ئامرازەکاو وەشکەردەیش جیاوازێنێ جیهان بە پارادایمێوە تازە بەروو جیهانوو ئیساتێوە. جە ڕوانگەو منۆ عەبدوڵا ئۆجەلان فێمینیستێوە بێهامتان. بە پەیلوای من فرە گرنگا عەبدوڵا ئۆجالان باس جە دەوروو ناوەندوو ژەنا کەرۆ گردوو بوارەکانە." 

'مۆدێلێوە جیاواز پێشکەش کەرۆ' 

ئەبها بەهیا ئاماژەش پانەیە دا، کە عەبدوڵڵا ئۆجەلان ڕابەروو گەلوو کوردی شێوازێوە جیاواز جە ڕاوەبەردەینە پێشکەش کەرۆ و واتش: " فرە گرنگا عەبدوڵا ئۆجەلان مۆدێلێوە ڕاوەبەردەی پێشکەش کەرۆ، کە فرە جیاوازا جە مۆدێلەکاو ئیساتێ ڕاوەبەردەی جیهاننە. ئارۆ چی جیهانەنە فرەو مەنتێقەکا میلیتاریزە کریێنێ، کە ملەملێ و نایەکسانی وەش بییەن، ئارۆ جە ۲۲ یاگانە جەنگ هەن، سیستموو سەرمایەداری دژوو ئاشتیین، بە دوورکەوتەیوە جە پێناسەکاو شارستانییەتی سەرمایەداری، مشۆم جیهانێوە وەش کەرمێ، کە باس جە مافوو ژیواێوە  دادپەروەرانەی و شکۆمەندی بۆ پەی گەلا سەرانسەروو جیهانینە، گەلێ کۆشەرێ خاوەنداری وەنەو یۆترینی کەرا." 

"پێویسا پەی ئازادیی عەبدوڵا ئۆجالانی سەروو یەک پلاتفۆرمیوە کوێ بیمێوە " 

ئەبها بەهیا ئاماژەش پانەیە دا، کە فرەو چێوا هەنێ، کە جمیەرە فێمینیستە جیهانییەکێ متاوا جە جمیەروو ژەناو کوردیوە بە ڕێبەرایەتی عەبدوڵا ئۆجالانی ڕابەروو گەلوو کوردی فێرێش با و واتش: " پەوکای من قەرارم دان واتەواچێوە چەنی جمیەرە فێمینیستییەکا سەروو ئی بابەتیوە کریۆ، چونکوم ئێمە، پەیوەندییما چەنی ١٥٠-١٦٠ وەڵاتا هەن، هەرپاسە جیا چینەیە، چە سەندیکاکێ با یان گرووپەکاو مافوو ئینسانی، ژیوگەپارێزنێ، پێویسا گردوو ئینسانە کۆشەرەکا ویرێ چانەیە کەراوە، کە متاومێ پێوە چێش کەرمێ، گردما متاومێ پەی ئازادیی ئۆجالانی سەروو یەک پلاتفۆرمیوە کوێ بیمێوە و جمیەری فێمینیستیی کوردستانییچ هامکاریما کەرا." 

'عەبدوڵا ئۆجالان بە ئیرادەیش متاوۆ سیستمێوە جیهانیی جیاواز ڕابەری کەرۆ'

ڕابەری فێمینیست ئەبها بەهیا ئاماژەش بە گرنگیی شیکاری تاریخیی ڕابەروو گەلوو کوردی عەبدوڵا ئۆجالانی کەرد و واتش: "بە پەیلوای من ئۆجالان کەسێوە ناوازەن، کە هومێدێوە فرە بە بەیاگەیاونای ئا مۆدێلەیە بەخشۆ، کە ئێمە پەنەش ماچمێ حکومەتی فیدراڵی. ڕوانگە گرنگەکاو ئۆجالانی کە بەڕاسی کاریگەرییێوە فرەشا سەروو منۆ هەن، ماچۆ جمیەرە فێمینیستییەکێ بەشێوەنێ جە کۆشیای پەی جمیەرە گەورەکایچ، یانێ ئۆجالان موینۆ کە سیستم و شارستانیەتوو ئیساتێ سەروو کۆیلایەتیی ژەنێوە بنیاتێ نریێنێ. تا ئی کۆیلایەتییە پەی گرد ئینسانێوە دلێنە نەبریۆ، سیستموو سەرمایەداری بەردەوام بۆ."

ئەبها بەهیا درێژەو قسەکاشنە واتش: "ئۆجالان متاوۆ سیستمێوە جیهانیی جیاواز ڕابەری کەرۆ، من قەت ئی فەلسەفەیەم کەسی تەرینە نەدیەن. ئۆجەلان مشۆم ئازاد بۆ. مشۆم دەنگش بیاوۆ گرد یاگێوە و بواچۆ 'ئێمە سەر پی جیهانەینمێ و ئی جیهانە هینوو ئێمەن."