بەمەڵامەتو جەنگیۊ جە سەرو مەرزو ئازەربایجانی و ئەرمینیاینە ٧ کەسۍ کوشیۍ
جە مابەینو ئەرمینیای و ئازەربایجان-ینە جارێۋەتەر جەنگ ڕوۋەشدا و ٧ کەسۍ جە هەرڎۋی لای کوشیۍ.
وەزارەتو ۋەرگیری ئەرمینیای ئەرەیاۋناش؛ کە جە جەنگەنە ٤ سەروازۍ کوشیێنۍ و ٦ سەروازۍ تەریچ زامڎارۍ بیێنۍ.
وەزارەتو ۋەرگیری ئازەربایجانی-چ ئاماژەش پانەی کەرڎەن کە ٣ ۍ سەروازێشا کوشیێنۍ و جە بارەو ژمارەو زامڎارەکاۋە حیچ زانیاریێۋەش ۋەڵا نەکەرڎۊ.
وەزارەتو ۋەرگیری ئازەربایجانی چڕیەو ئانەیش کەرڎەن کە نزیک بە مەنتیقەو "دیگ"ی جە سەرو مەرزیۊ هێزەکۍ ئەرمینیای دەسڕێژو گولاشا جە هێزە ئازەرییەکا کەرڎەن.
وەزارەتو ۋەرگیری ئەرمینیایچ ئاماژەش پانەی کەرڎەن کە رۊو یەرە شەممەی سەعاڎ ١٦:٠٠ بە ۋەختو مەنتیقەکەی سەروازە ئازەریەکۍ تەقەشا جە سەروازا ئەرمەنی کەرڎەن کە سەرحاڵ و ھەرمانەو ئەندازەیی بیێنۍ جە مەنتیقەکەنە.
ئا دوۋە کۊمارەو ۋەڵینو سۊڤیەتی کە کەوتێنۍ مەنتیقەو قەوقازی جە ساڵەو ٢٠٢٠ینە سەرو کۊنترۊڵکەرڎەو مەنتیقەو قەرەداغ-ی پۍ ماۋێۋی کەمی تووشو جەنگی و پېۋەرەدای بیۍ. ئازەربایجان کە راسەوخۊ جە لایەنو تورکیایوە پەشتیوانیش ۋنەکریۊ چا جەنگەنە چنڎین مەنتېقێش ئەرەگیر کەرڎۍ. بە میانجی کەرڎەو رووسیای هەردوۋەلا ئایربەسشا ئەرەیاۋنا، بەڵام چا ۋەختۊ تا ئیسە بە ۋەردەوامی سەرو مەرزیۊ جەنگ و پېۋەرەدای جە مابەینشانە ڕوۋە مڎۊ.
هـ . ش
