شاندێوە کە پێکمۍ جە پەرلەمانتارا دەم پارتی کاموران تانهانی و تاتەو ڕۆنامەنوویس نازم داشتانی و تاتەو ڕۆنامەنوویسۍ جیهان بیلگینۍ و ژمارێوە جە ڕۆنامەنوویسا و ئەنداماو ڕێکوزیاکا، پەی هۆرگێرتەی تەرمو ڕۆنامەنوویسا نازم داشتانی و جیهان بیلگینۍ، جە نسێبینۆ بەرەو پانیشتوو کوردەسانی کۊتۍ ڕا.

کاتێ شاندەکە یاوا دەروازەو سنووری خابوورو سلۆپی، جە لایەنو ڕاوەبەرایەتی پۆلیسو سلۆپییوە بە بەهانۍ خراپی ئامێرو " Xray" ڕاگیریۍ. وەڵۍ ئانەیچەنە بە بەهانۍ "سیستەم مردان" پەی ماوەو ٢ سەعاتا ۋەردەمو دەروازەکەینە ڕاگیریێبێنۍ، دماتەر کاتێ شاندەکە یاوا بەشو " Xray" بە بەهانۍ خراپبیەی ئامێرەکەیۆ، ڕاشا ۋنە گیریا.

پی مەڵامەتۆ پەرلەمانتار کاموران تانهان پەیوەندیش کەرد بە شالېیارو دلێینەی و شالېیارو جبەری، بەڵام تا ئیساتێچ هەردووە شالېیارەکە جوابێوە ئەرێنیشا نەڎانۆ پەی ۋېیەردەی شاندەکەی.

کاموران تانهان ئی قەرارشە بە قەرارێوە میزاجیانە نامۍ بەرڎ و ئەرەیاۋناش ئینە ڕێزنەگێرتەین جە تەرمەکا و جە جەهانەنە هامشێوەش نییا، جە جەهانەنە گرڎ کەسۍ مافو ئانەیش هەن، تەرمو ئازیزاشا بەپاو ویرو باوەڕی ۋێشا ئەسپەردە بە خاکی بکریا، واتش: "ئینە مافێوە سرووشتییا، ئێمەیچ گەرەکمانە تەرمەکا هۆرگێرمۍ، تاوەکو بەشێوێوە شایستە ئەسپەردەشا بکەرمۍ. داوا مکەرمۍ هیچ ڕاگیریێوە نەکریۆ، تەرمەکا هۊرگێرمۍ و جە شارەکا ۋێشانە ئەسپەردە بە خاکیشا بکەرمۍ".

شاندەکە جە دەروازەو سنووری خابوورینە جە سلۆپی ڕاگیریێنۍ.