چەمەڕا کریۆ بە هەزاران کەسێ بەشداریی ئاهەنگوو نەورۆزوو بناروو قەندیلینە کەرا، کە٢١وو ئادارینە کریۆ.

کۆمیتەو ئامادەکاریی نەورۆزوو قەندیلی بەرنامەو ئاهەنگێڵناکەیش وەڵا کەردۆ، کە بە دروشمو "ئازادیی پەی ڕابەر ئۆجالانی، چارەسەری سیاسیی پەی پەرسەو کوردی" ملۆ ڕاوە.

بە پاو کۆمیتەی ئامادەکاری، چالاکییەکاو نەورۆزوو ئێساڵی بە گیسناینەی ئێروو نەورۆزی جە وێرەگاو ٢٠وو ئادارینە دەس پەنە کەرۆ. هەرپاسە  بۆنەو ئانەیۆ مانگەو ڕەمەزانینە نەورۆزوو قەندیلینە، واردەی حازر پەی ڕۆچەوانا ئامادە کریۆ.

ئاهەنگەکە ٢١وو ئادارینە سەعات ١٢ دەگاو ئێندزێ سەر بە هەرێموو قەندیلینە دەس پەنە کەرۆ، چەمەڕا کریۆ، فرەو گەلەکەیما گردوو کوردستانیوە بەشداریی ئاهەنگەکەی کەرا.

کۆمیتەکە ئەرەیاونانش، کە مستەفا دادار، فرمێسک حافیز، جاسیمی ساز، مێدیا حوسێن، کۆما چیای شەنگال، کۆما وارگە و کۆما ڕۆژ ئاهەنگەکەنە بەرهەمەکاشا پێشکەشێ کەرا.  

هەرپاسە ئەرەیاونیان کە کۆمیتەو ئامادەکاریی نەورۆزی سوپرایزی تایبەتیشا پەی بەشدارا هەن.

هەرپاسە کۆمیتەو ئامادەکاری پاسی تایبەت پەی هاموشۆی  گردوو پارێزگاکانە، شارەکڵەکانە و شارەکاو پانیشتوو کوردستانینە پەی نەورۆزوو قەندیلی ئامادە کریان.