تۊڕەو مافەکاو ئینسانو ورکەوتو کورڎستانی بە ئەرەیاوناێوە ئاشکراش کەرڎ، هەفتەی وەڵین وەرپەرساو ئێرانی بەکەلەپچەکریای وەنەپەرسایۊشا جە زەینەب جەلالیانێ کەرڎەن.  

جە ئەرەیاوناکەینە وچیان: "زەینەب جەلالیانە بەکەلەپچەکریای وەنەپەرسایۊش وەنە کریان، تا چەمش بە  بنەیانەکەیش گنۊ، دداننیایپۊرەی بەزۊر و بەروستەی پەشیمانییش ملەرە سەپیان". ئەرەیاونیان، تا زەینەب جەلالیانە ئی مەرجا قبووڵێ نەکەرۊ، جە گرڎو مافە سەرەتاییەکا و خزمەتگوزارییە تەندروستییەکا بێبەشە کریۊ.

شارو ماکۊینە، زینڎانیییەی سیاسییەو کورڎی، زەینبە جەلالیانە جە ٢٦ شوباتو ٢٠٠٨ وزیا زینڎان و قەرارو زینڎانی حەتا حەتاییش سەرەرە سەپیا. زەینەبە ٢ ساڵێ و ٨ مانگێن جە گرڎ مافێوە  بێبەشە کریێنە و زینڎانو یەزدینە گیریێنە. زەینەب جەلالیانە تووشو چندین کێشاو تەندروسیی بیێنە، پێسە خراپیی وینای و تەنگەنەفەسی و گورچیلەی و سیستمو هەرسکەرڎەی. ڕا مەدریۊ خزمەتی تەندروسی ورگێرۊ و چارەسەرە کریۊ.