بەشێوە جە پارتە کورڎسانیەکا مەخموری ئەرەیاۋناشا، داوا مکەرا گلېرگەی میان دەوڵەتی، حکومەتو عێراقی و حکومەتو هەرێمو کورڎسانی، کێشەو کەمپو مەخموری بە گفتوگۊ چارەسەر کەرا و مافو پەناھەنڎا پارێزنا.
کۊمیتەو رێکوستەی مەخمورو یۊبیەی نیشتیمانی کورڎسانی، کۊمیتەو رێکوستەی مەخمورو پارتوشیوعی کورڎسانی و کۊمیتەو رێکوستەی مەخمورو پارتو زەحمەتکێشان و کورڎسانی، بەیاننامېوە هامبەششا جە بارەو ئاژەو کەمپو مەخموری و پەلاماردای سوپاو عێراقی پۍ سەرو خەڵکی مەڎەنی کەمپەکەی کە بە مەڵامەتو زوڵمو ستەمو دەوڵەتو ئەرەگیری تورکیایۊ ئاوارۍ بیېنۍ، ۋەڵاکەرڎۊ.
جە بەیاننامەکەنە ئامان، " داواکارېنمۍ جە گلېرگەی میان دەوڵەتی و حکومەتو عێراقی و حکومەتو هەرێمو کورڎسانی، حۊلو هێورکەرڎەیۊ ئاژەکەی بڎا و کێشەکەی بە گفتوگۊ چارەسەر کەرا."
جە بەشێوە تەرو بەیاننامەکەینە پارتە کورڎسانیەکۍ ماچا، " ئێمە دژوو گرڎ جۊرە تنوتیژیېوەنمۍ کە بۊ بە مەڵامەتو ون مجیای، پۊکەی پێۋیسا ئی کێشە بە گفتوگۊ چارەسەر کریۊ و مافو پەناھەنڎەیشا پارېزیۊ. مافو ئازاڎیەکاشا فەرامۊش نەکریۊ. ژیایشا پارێزیۊ. ئی سنورە ئینا ئاژېوە نالەبار و هەستیارەنە و ئی ئاژە چەمەڕا نەکریا ڕا وەشکەرا پۍ تیرۊریستا."
دەقو بەیاننامەکەی پی جۊرەنە:
" داواکارېنمۍ جە گلېرگەی میان دەوڵەتی، حکومەتو عێراقی و حکومەتو هەرێمو کورڎسانی، بەیا سەرو خەتۍ پۍ هێورکەرڎەیۊ ئا تنوتیژیەی کە جە کەمپو (رۊستەم جوودی) کورڎا تورکیای، جە مەخمور وەش بیەن، جە بەینو هێزە عێراقیەکا و مەردمو کەمپەکەینە، ئێمە دژوو گرڎ تنوتیژیېوەنمۍ کە بۊ بە مەڵامەتو ون مجیای، پۊکەی پێۋیسا ئی کێشە بە گفتوگۊ چارەسەر کریۊ و مافو پەناھەنڎەیشا پارېزیۊ. مافو ئازاڎیەکاشا فەرامۊش نەکریۊ. ژیایشا پارێزیۊ. ئی سنورە ئینا ئاژېوە نالەبار و هەستیارەنە و ئی ئاژە چەمەڕا نەکریا ڕا وەشکەرا پۍ تیرۊریستا."
جە دما دماینە ھومېڎەوارېنمۍ گلېرگەی میان دەوڵەتی بە ئەرکو ۋېش ھورزۊنە و دمایی پی کېشەیە بارۊنە."
ھ . ش
