پارتو چەپی سەوزی جە وان بە بەشڎاری لانیکەم سەڎ هەزار کەسا گلېرۊبیەی ئاخرش ئەنجامدا. گلېرۊبیەکەی بە رێزگرتەی دەسش پنەکەرڎ. جە گلېرۊبیەکەینە جە ئەۋەڵۊ وەیسی دیلەکچی قسەکەرو پارتو چەپی سەوزی قسېش کەرڎۍ و ۋاتش، " گەلوو وانی ئارۊ قوەتو ۋېش چی مەیڎانەنە نیشانەدا و ئێمە سەربەرزېنمۍ." زەکیە قایا ئەنڎامەو ئەنجومەنو ئەڎایا ئاشتی ئەرەیاۋناش کە ئاڎۍ پۍ ئاشتی ئینۍ مەیڎانەکەنە. ئاشتی و داڎپەروەریشا گەرەکا و گەرەکشا نیا کەس مرۊ. پێۋیسا گرڎ کەسۍ دەس سەرو ویژدانیشۊ بنیۊرە و بلۊ سەرو سنوقەکا."

'حیچ هێزێوە مەتاۋۊ ئیراڎەو گەلوو کورڎی ماڕۊ

دماتەر بەنامۍ پەسەکەیۊ مەسعود تەک ۋاتش، " 'حیچ هێزێوە مەتاۋۊ ئیراڎەو گەلوو کورڎی ماڕۊ. ئیسە باسو سەڎەو دوۋەمو کۊماری کریۊ. ئێمە کۊماری یوۋەم جە زیلان، دێرسیم و رۊبۊسکی مشناسمۍ. پۍ ئانەی جە هەمان سەڎەنە نەژیومۍ، پێۋیسا ئیراڎېوە گۊرە نیشانە بڎەیمۍ و دمایی بە سیستمی دیکتاتۊری بارمۍ. بژیۋۊ کورڎ و کورڎسان."

سینان چیفتیورەک سەرۊکو گاشتی کەکەپەی ئەرەیاۋناش، یانە بە یانە ۋېتا پۍ ھورچنیەی ئاماڎە کەرڎۍ و ۋاتش، " گەلەکەما ماچۊ ئیتر وەسېن. پێۋیسا بە حکومەتو ٢١ ساڵەی واچمۍ ئیتر وەسېن. ئی سەڎە بۊ بە سەڎەو کورڎی. کورڎسانی پارېزنمۍ و ئازاڎیی بەدەس مارمۍ. ڕۊ بە ڕۊ فەقیری زیاڎ بۊ. گەلەکەما ئیتر مەتاۋۊ بژێۋی ۋېش حاصڵ کەرۊ. وان مەتاۋۊ پەنیرە نامیەکېش وەشە کەرۊ و ملۊ جە ئێرانی پەنیرە مسانۊ. خوڵقەما ئانېنە کە دمایی پی فەرمانۍ بۍ. دماو ئانەی دەسەڵاڎو ٢١ ساڵەو ئاکەپەیما وڕنا، پۍ دمایی ئارڎەی بە فەقیری پرۊژە وەشکەرمۍ."

سەبای تاریخ منۋیسیۊوە

دماتەر "پەروین بوڵدان"ە هامسەرۊکەو گرڎی هەدەپەی قسېش کەرڎۍ و ئەرەیاۋناش، مەردمو وانی ئیراڎېوە گۊرە نیشانە مڎا و ۋاتش، " سەبای ڕوۋۍ وەش بۊ. سەبای تاریخ منۋیسیۊوە. سەبای شمە تاریخو وانی و تورکیای منۋیسدۍ، سەبای جارێوەتەر ماچمۍ ئێمە ئینایمۍ چۍ و خۊتان ئیراڎېنمۍ و پېسە پارتو چەپی سەوزی یوۋەمۍ بیمۍ. ئارۊ ئی جۊش و خڕۊشە دیارا. مەردمو وانی قەرارو ۋېش دان. ئیسە جە مەیڎانەکانە گېڵمۍ، جە گرڎو تورکیا ینە گېڵایمۍ. جە گرڎ شۊنېنە پەیامو ۋېما ۋەڵاکەرڎۊ.

ئێمە متمانەما بە ۋېما هەن، ئاڎیشا کیانمۍ، دمایی بە دوژمنو کورڎی مارمۍ، ئانۍ جە ۋەران وەرو کۊکوژیەکانە بێدەنگېنۍ کیانمېشاوە، دزو خەیاڵو جوۋانا کیانمۍ. مۊرەو ۋېما چېرو لۆگۊو پارتو چەپی سەوزی دەیدۍ با ئاشتی، داڎپەروەری و ئارامی بېنە ئی ۋڵاتە. تانسو چیلەر ۋاتەبېش ' ئەگەر ئەردۊغان بلۊ، ۋڵات وڕۊ'. ئایا وەختۍ تۊ لوۋای چېش بە ۋڵاتی ئاما؟ ئەردۊغانیچ پېسە تۊ ملۊ. ئێمە ئینایمۍ چۍ، بیېنمۍ  و بیمۍ. یۊ بیەیمۍ، بیەیمۍ هەزار و یۊما گېرت و بیەیمۍ بە ملۋېن. سەڎان ساڵېن سەرو ئی خاکیۊ هەنمۍ و بیمۍ. ئێمە شکۊ و ئاشتی مارمۍ پۍ ئی ۋڵاتیە."

ھ . ش