پەروین بوڵدانە هامسەرۊکەو هەدەپەی جە کۊبییەیۊ پارتوو چەپی سەوزینە جە ئەنتالیانە واتش: "بەدڵنیاییوە ئا زەلامە مەڕیۊ و ئاکەپە دماییش مۍ. پەی ئانەی ئاکەپە مەڕیۊ، پەنەوازا گرڎ کەسێوە چێروو چەترەو پارتوو چەپی سەوزینە بۊ و ئا ستەمکارا لابەرا."
پەروین بوڵدانە هامسەرۊکەو پارتوو دیموکراتیکوو گەلان (هەدەپە)ی و سەرۊکوو فراکسیۊنوو هەدەپەی و پاڵێویۍ پارتوو چەپی سەوزی پەی پەرلەمانی ئەنتاڵیانە ساروخان ئۊلوچە ئامادۍ کۊبییەیۊ جەماوەرییەکەی بێنۍ.
سەرەڕاو وارانێوە فرەی، هەزاران کەسۍ مەیدانوو کۊبیەیۊکەیشا پۊژنابێرە، مەیدانوو مەنتێقەکەی بە عەلەمەکاو پارتوو چەپی سەوزی ڕازیێبێنێوە. جە کۊبییەیۊکەینە بە بەردەوامی دروشمۍ وچیێنێوە و پۊستەرۍ و پانکارتۍ بەرزۍ کریێبێنێوە.
کۊبییەیۊکەی بە ڕێزگرتەی دەسش پەنە کرد. پاڵێویۍ و هامقسەکەرەکاو پارتوو چەپی سەوزی جە ئەنتالیانە لوۍ سەروو ستەیجی و سڵامشا جە گەلی کەرد.
پەروین بوڵدانە هامسەرۊکەی گرڎینەو هەدەپەی جە واچێوەشنە پەی گەل چا کۊبییەیۊو ئانتالیاینە واتش، "جە ورچنییەکاو ۱٤و ئایارینە گرڎلایۍ وەرپەرسبییەیۍ گەورەشا ئینا گەردەننە. ئێمە جارێوە تەر ڕا مەدەیمۍ دزۍ و تاڵانکارۍ سەرۍ گنا. ئێمە ئاکەپەی و ئەردۊغانی لا بەرمۍ. جە وەراوەروو دروشموو ئانیشانە کە ماچا، 'وەختی گونجیا، زەلامی گونجیا' ماچمۍ، وەختەکە ڕاسا، وەلێم زەلامەکە غەڵەتا. بەدڵنیاییوە ئا زەلامە مەڕیۊ و ئاکەپە دماییش پەنە مۍ. پەی ئانەی ئاکەپە مەڕیۊ، پەنەوازا گرڎ کەسێوە چێروو چەترەو پارتوو چەپی سەوزینە بۊ و دمایی پا زاڵمانە بارمۍ. پەنەوازا لاو کەمیوە دووۍ پەرلەمانتارۍ چی شارۊ بلارە پەرلەمان. کەلیمەکۍ مۊرەکێچ هینۍ شمەنۍ. مشۊم ئانتالیا ڕا نەدۊ ئەردۊغان ورچنیوە. ڕاو شمە و ڕاو ئێمە کریێوێنە. پەی گرڎیما هومێدوو سەرکەوتەی وازوو. بەتایبەتی سەرکەوتەیم پەی ئانتالیای گەرەکا. ئێمە ئی کۊبییەیۊ قبووڵ مەکەرمۍ، ئێمە جارێوە تەر پەی مەبارەکبایی مەیمێوە ئێگە، بەدڵنیاییوە ئێمە سەرۍ گنمۍ."
دماو وتارەکەو بوڵدانۍ گرووپوو ژەناما لوۍ سەروو ستەیجی و جەماوەروو ئامادەبیۍ کۊبییەیۊکەی بە دەموو مۊسیقای و گۊرانییەکاو گرووپەکەیۊ ورپڕۍ و شاڎیشا بەر وست و دماتەر دمایی بە کۊبییەیۊکەی ئاما.
س.ز
