بورجوگوڵ چوبوکە پاڵێویۍ پارتوو چەپی سەوزی ئیزمیرنە پەی پەرلەمانی، قسێش پەی ئاژانسوو هەواڵوو فوراتی (ANF) کەرڎۍ.

چوبوکە ئەرەیاوناش، ئی ورچنیەیە پەی دەسەڵاتی فاشیست ئەوەڵ و ئاخیرا و واتش، "وەرانوەروو ئێمەوە هامپەیمانیی فاشیستیی ئاکەپەی و مەهەپەی هەن، کە ساعیبوو ڕانتوەری، تاڵانی و کۊکوشیین. هامپەیمانیی فاشیستی جە پڕۊسەو ورچنیەینە هامکارییە نهێنییەکاو وێش ئاشکرۍ کەرڎۍ. مەرگی ملوو گەلاو تورکیای و کوردسانیرە سەپنۊ. ئێمە ئا سیستمەو ئاڎیشاما ماڕان، کە گەرەکشا بۍ ملمارە سەپناش".

'ئێمە ئینایمۍ قەراخوو سەرکەوتەیۍ تاریخیینە'

چوبوک واتش، ئینە پەی ئەکەپەی و مەهەپەی ئەوەڵ و ئاخیرا، پەی ئاڎیشا چارەنویسسازا و واتش: "هەرچی جە دەسشا بۍ درێغی مەکەرا. هەڵای ٢٤ سەعاتۍ ملوو بوومەلەرزەکەو ٦وو شوباتیرە نەلابۍ، کە وەرنیشتشا بۊردومان کەرد. فرە جە دۊڕیای و کەوتەی تەرسا. پێویسا خاس بزانا، کە چێشی جەدەس مڎا و چی جەدەسش مڎا. هامپەیمانیی ستراتیژیی جمیەروو ئازادیی کوردسانی و سۊسیالیستەکۍ، خەباتوو فێمێنیستەکا و مدرامانوو کرێکارا، ڕاشا پەنە نەدۍ دەسەڵاتوو وێشا بەقووەت کەرا. جە ئەنجاموو خەباتوو ئێمەنە، ئی دەسەڵاتە لەقان. ئاڎۍ هجوومشا کەرد سەروو ئێمە، زیندانەکۍ و قەبرسانەکۍ پەڕۍ بیۍ جە خەڵکەکەیما. ئاڎۍ گەرەکشابۍ باخچڵێوە بێدڕەی وەش کەرا، وەلێم نەتاواشا و ئێمە ڕاما نەدۍ. جە دژوو ئی دەسەڵاتی، کە بکوشوو کرێکاران، دوژمنوو ژەنان و ئەرەگیر و چەوسنەوەن، ئێمە ئینایمۍ قەراخوو سەرکەوتەیۍ تاریخیینە. پەی پەرسایۊ جە بکوشاو کۊنجا کوریشی و فرێوە تەریچ جە ژنایچ ئێمە سەرۍ گنمێ".

'ئێمە پەی پەشتیوانیکەرڎەی ئینایمۍ چەنی یۊترینی'

چوبوکە ئەرەیاوناش، ئاڎۍ پاڵپەشتۍ ژەنانۍ تا دژوو مەژگوو دەوڵەتی پیاسالاری کۊشیا و واتش، "ئاڎۍ خەڵاتوو بکوشا "فەتما، ئیپەک، پنار، ئەمینە"ی و شوعلەکاشا کەرد. دەسدرێژیکەرڎەی سەروو زارۊڵاشا یاونا حەدوو بەڵگەی ماددی. جە هەرمانگەکانە باخچەو ساواڵاشا وسترە. ئا پیۍ کە دێنۍ وەنەو ژەنا، سەروازگەکانە و بنکەکاو پۊلیسینە مێماندارییشا کەرێنۍ، داڎگێکۍ، یانەکۍ، هەرمانگەکۍ و پەرلەمان بیۍ یاگۍ هامپەیمانیی پیایا. جە کوردسانیچنە کاریگەری کۊلۊنیالیزمی و ئەرەگیری بۍ. سەروو گرڎوو جادە و کۊڵانەکانە هێزی میلیشیایی وەڵۍ کریێوە. ژەنی و زارۊڵۍ نەتاوێنۍ بەئاسانی یانەکاشاوە بلا سەروو جادەکا و جە مەکتەبەکاشانە گێڵا. تنڎوتیژیی دەسەڵاتی تنڎوتیژیی پیایاش زیاڎتەر کەرد. هەردووە ڕواو جەنگیش سەروو ژەناو تورکیای و کوردسانیرە سەپیا. بە نامۍ پاریزنای وەڵاتیوە، بە فشار و گۊشەگیریوە ژیوایشا جە ئێمە وەرتەسک و سنوورڎار کەرڎۊ. ئینە کوردساننە فرە جیددیتەر بی. هامپەیمانیی پیایا جیاوازیی بەینوو نەتەوەکانە وەش مەکەرۊ، ئێمە پەی پەشتیوانیی یۊترینی ئینایـمۍ پێوەرە."

'هامکارییەکۍ پەی کۊکوشکەرڎەی مەمەنا'

بورجوگوڵ چوبوکە ئازیروو قسەکاشنە واتش ، " ئانە کە پڕۊسەکەش یەکلایی کەرڎۊ، کۊشیای ئێمە بۍ پەی ڕێککەوتەینامەو ئیستەنبولی. ئێمە دیما، کە هامکاریی پیاسالاری گۊش جە پەیلوای و قساو ژەنا مەگێرۊ، چێوە ئێمە حیچ داواکاریێما چاڎیشا نییا. پێوەرە کۊشیای و پەشتیوانیکەرڎەی یۊترینیما هەن.ماڕای ئی دەسەڵاتی زەرەرۍ گەورە پی هامپەیمانێتییەی یاونۊ. ئامانجی سەرەکیما ماڕای ئا هامکارییەینە، کە کۊکوشی کەرۊ".

س.ز