پلاتفۊرموو ڕەنج و دیموکراسی ئێلیحی سەبارەت بە هجوومەکاو دژوو یۊ جە سەرۊکەکاو گەلوو کوردی شێخ سەعیدی پارکوو یڵماز گونەینە بەیاننامێوەش واناوە. بەیاننامەکەنە نویساو "دەس و زوانە پیسەکاتا جە بەهاکاما ورگێرڎێ" بەرز کریاوە و کۊشەراجمیەروو ژەنە ئازادا (تەژەئا)ی و ئەنداماو مەجلیسوو ئەدایاو ئاشتی و ڕێکوزیایەکاو پارتوو یەکسانی و دیموکراسیی گەلا (دەم پارتی) و پارتوو هەرێمە دیموکراتییەکا (دەبەپە)، سەندیکای پارێزنەراو ئێلح و ئەنداماو پلاتفۊرمی بەشدارۍ کۊبییەیوەکەی بێنۍ.

 ڕەمەزان بیلمەز، وەرپەرسوو لەقوو ئەیتیم سەنی ئێلیحی بەیاننامێوەنە قسێش کەرڎۍ و واتش، شێخ سەعید و هامرێکێش کۊشیێنۍ پەی مافەکا و پەوکای سووکایەتی بە بەهاکاو گەلوو کوردی قبووڵ مەکەرمۍ.

بیلمەز باسیچش کەرد، کە شێخ سەعید و هامڕێکێش پێسە سەید ڕەزا و نوری دێرسیمی بەها گرنگەکاو گەلوو کوردینۍ و درێژەو قسەکاشنە واتش:"بۊنەو ئانەیوە  بلوارێوە بە نامۍ ئادیوە نریابێرە، هجوومی ڕەگەزپەرستی  دژوو شێخ سەعیدی و هامڕایاش دەسش پەنە کەرد. ئێمە ئی هجووما و دروا قبووڵۍ مەکەرمۍ."

ئینجا پێسە بیلمەز دماییش بە وتارەکەیش ئارد:"بۊنەو سیاسەتوو دلێنەبەرڎەی، نکۊڵیکەرڎەی و چەوسنایوەیۊ، کێشە بنەڕەتییەکاو تورکیای چارەسەرۍ مەکریا، ئێمە واوەی پڕۊسێوە ئەزموون کەرمۍ، کە سیاسەتوو تندوتیژی و جەنگی گردوو بوارەکاو ژیواینە وەڵا بیەنۊ، دیموکراسی، یاسا، سەرەتاییتەرین ماف و ئازادینۍ وەلۍ ئادێچشا ناستێنۍ. ئێمە خاوەنداری وەنەو بەهاکاو گەلوو کوردی کەرمۍ، کە کۊشیایشا پەی ئاشتی، یەکسانی، دادپەروەری، ئازادی، دیموکریاسی و چارەسەرکەرڎەی کێشەو کوردی کەرڎەن چی جوگرافیانە. ئێمە ئا هجوومە ڕەگەزپەرستییانەیە، کە دژوو شێخ سەعیدی و هامڕاکاش هەن، قبووڵ مەکەرمۍ."