"محەمەڎ ئەمین ئاکتار" پاڵێویاو ڕیزبەندوو ٩و لیستوو پارتوو چەپی سەوزی ئامەڎنە پەی پەرلەمانی، ساڵەو ۱۹۸٦ یاسا و مافش جە ئیستەنبولنە تەمامنان. ساڵەو۱۹۸۷یوە پێسە پارێزنەرێوە سەربەوۍ دەسش بە هەرمانۍ کەرڎەن. بەینوو ساڵاو ۱۹۹۲ پەی ۲۰۱۱ ئەنداموو دەسەو ڕاوەبەریی کۊمەڵەو پارێزنەراو ئامەڎی بییەن. بەینوو ساڵاو ۲۰۰۸ پەی ۲۰۱۲، سەرۊکوو کۊمەڵەو پارێزنەراو ئامەڎی بییەن.

ئی ورچنیەیە فرە گرنگ و هەستیارا

"محەمەڎ ئەمین ئاکتار" بە ئاژانسووهەواڵوو فورات (ANF)یش وات، تا ئیساتۍ ڕێکوزیایەکاو گلێرگەی مەڎەنینە هەرمانەش کەرڎێنە، وەلۍ پڕۊسەو ئیساتۍ چارەنویسسازا، پەوکای وێش پاڵێونان پەی پەرلەمانی و واتش: "ماوۍ فرە جە بواروو مافەکاو خەڵکی و کۊمەڵەو پارێزنەراو ئامەڎینە ڕاوەبەر بێنا. بەینوو ساڵاو ۲۰۰۸ پەی ۲۰۱۲، سەرۊکوو کۊمەڵەو پارێزنەراو ئامەڎی بێنا. ئەنداموو ڕێکوزیاوەکاو گلێرگەی مەڎەنی و کۊمەڵەکا بێنا، پەوکای ئی چند ساڵە ئەندامبییەی چالاکم دلۍ حیزبە سیاسییەکانە نەبییەن. ئی ورچنیەیە فرە گرنگ و هەستیارا، پەنە مشۊ بۊ بە یووەم هەنگام پەی وڕنای ڕژێموو دەسەڵاتپەرسی و لوای ڕووەو پڕۊسێوە تازەی. پەوکای قەرارم دا بەشداریی هەرمانۍ سیاسیێنە کەروو، وەڵێنیازوو وێپاڵاوتەیم سەروولیستوو پارتوو چەپی سەوزی پەی پەرلەمانی قبووڵ کەرد.

گەل بێدەنگ نییا، بەڵکوم تووڕەن

ئاکتار واتش، "ماوەو ٧ ساڵان حەوڵۍ بێدەنگکەرڎەی ئامەڎی مدا. جە سەپنای قەیومیوە پەی فشاروەشکەرڎەی، گێرتەی، زیندانیکەرڎەی و سزادای سیاسەتمەڎارا. ژمارێوە فرە جە سیاسەتمەڎارا گیریێنۍ و بڕێچشا ناچارۍ بیێنۍ بیێنۍ وڵاتەکەی جیا بازا. وەختۍ چا لایەناوە ور سەنگیۊ، جەدەسدایۍ وەرچەم هەن، وەلێم ئامەڎ  شارێوەن دایمە پوتانسێل و توانا و وێش هەنەش. ئی توانۍ تایبەتمەندیی تازە بە ڕێکوزیایەکا و ڕێکوستەیە کۊمەڵایەتی و سیاسییەکا خشۊ.

فشارەکاو ڕژێمی دماو ١٥و تەمووزیوە بی بە فاشیزم. جە ئەنجامنە، دەسشا کەرد بە ڕاگیریکەرڎەی جە هەرمانۍ و خەباتی دیموکراتیکی. وەروو ئانەی گرڎ ئەجێشا، کە گلێرگەی کورڎی بێدەنگ کریان، یان چەوسییانۊ، وەلۍ ئێمە چی پڕۊسەیەنە وینمۍ، کە گلێرگە فرە تووڕەن. ئانە ئێمە وینمێش ئینەن. کە مشۊم ئی تووڕەییە خاس بەکار بۍ. ئەر ئینە سیاسی کریۊوە ئی تووڕەییە، ئەر تاومۍ ئی پەشتیوانییە بەدەس بارمۍ، تاومۍ کەرمێش ئەنجامێوە عال. بەبۍ وەشکەرڎەی و نیایۊ ئاژاوۍ و ئاڵۊزی، پێویسا خاس جە وێما حاڵیۍ بیمی، ویرما نەشۊ ئی ماوا، ئی شارەو ئێمە پێسە هەرمان کەرۊ. چوون گەل ئینەش نیشانەو ئێمە دان، ئادۍ ویرما وزاوە، کە ئادۍ ساعیبۍ ئی وارگە و وەڵاتەینۍ، پەوکای مشۊم ئێمە نوێنەرۍ ئادیشا بیمۍ و ئێمەیچ پا یاوینەوە هەرمانە کەرمێ".

بەدڵنیاییوە پێویسا دەنگ بەکار بۍ و پارێزیۊ

ئاکتار ئاماژەش بە گرنگیی ورچنیەکەی کەرد و داواش کەرڎە گرڎ کەس  دەنگ بڎۊ و واتش، "پێویسا سەرەتا و وەڵۍ گرڎ چێوێنە دەنگ دریۊ. ئینجا دماو دەنگدای خەڵک دیفاع جە دەنگەکەیش کەرۊ. چونکوم مشۊم بەها و دەنگەکاما بزانمۍ و پارێزنمێشا. ئێمە جە بەیانیی ١٥و ئایارینە جە وەڵاتێوە ڕۊشننە ورۍ مێزمۍ کە وەرش چەنە ور مۍ. بێگومان گرڎ چێو بە ڕوۍ خاس مەبۊ. گێرا پڕۊسێوە قورسیچ دەس پەنە کەرۊ، چونکوم ئەگەر پێویس بە سەرجەنۊ وەشکەرڎەیۊ بۊ، مشۊم بلۊ قۊناغێوە تازەو. پێویسا سیستەمێوە تازەی دەستووری بۍ ئاراوە. وەختۍ چێوە ورش سەنگنی، مشۊم پەرلەماننە وینایۍ ئازادیپارێزن، وێڕاوەبەری بۊ، کە قورساییش سەروو چارەسەروو قۊرتەکاو کورڎی بۊ، ئانە پەیلوای ئێمەن،  پەوکای پڕۊسێوە قورس دەس پەنە کەرۊ. تەنیا بە ماڕای ئی دەسەڵاتی دمایی بە قۊرتەکا نمۍ. پێویسا ڕاگێری جە وەشبییەی دەسەڵاتۍ و ڕژێمێوە سەرکوتکەری و زۊرڎاری گیریۊ. پارتوو چەپی سەوزی داراو ئا پایە و هەڵوێسەینە".

س.ز