پەرلەمانتاروو مێرسینوو دەم پارتی عەلی بۆزان جە بارەو ڕاپیمای گۆرەو ئازاڎییوە کە پەی ئازاڎیی جەسڎەیی رابەروو گەلوو کوردی عەبدوڵا ئۆجالانی و چارەسەری دیموکراتیکی پرسوو کوردی چن ڕووێوەن بەردەواما، قسێش پۍ ئاژانسوو هەواڵوو فوراتی (ANF)ی کەردۍ.

بۆزان واتش، " ٣٥ مانگێن حیج هەواڵێوە جە بەڕێز ئۆجالانیوە ۋەردەس نییا، دوورگەو ئیمراڵینە گۆشەگیریێوە دژوار ئینا ئارانە. ڕاپیمای ئازاڎیی کە ئێمە ٥ ڕووێن دەسما پنەکەردەن، چالاکیێوە جیا و تاکوتەرا نییا، بەڵکم بەشێوەن جە هەڵمەتەو 'ئازاڎیی پۍ ئۆجالانی، چارەسەری پۍ پرسوو کوردی'. وەڵتەر بەرەو گەملیک ڕاپیمایما کەردەبۍ، زینڎانەکانە مانگرتەی جە واردەی هەن، حەرپاسە پۍ ئانەی بانۍ بە دەنگوو زینڎانیا مانگرتەی، جە بەروو زینڎانیچ ئێشکگیریی ئازاڎیی بەردەواما. ئێمە ئارۆ ئینایمۍ پەنجەم ڕۊو ڕاپیمای گۆرەی ئازاڎینە کە جە قەرس و وانۆ دەسشپنەکەرد و تا ١٥و شوباتی بەردەوامیش بۆ".

بۆزان یاڎش ئاردۆ، کە ڕاپیمای گۆرە جە قەرس و وان_ۆ جە دووۍ قۆڵێوە بە ٧٥ کەسێوە دەسشپنەکەرد و واتش، "ئا ٧٥ کەسە بەنوێنەرایەتی ملۋێنان کەسا ڕاپیمای کەرا. چا شاروو، مەنتیقارە کە پۊرەشارە ۋیەردیمۍ، بە دەیان هەزار کەسێما جە خەڵکوو ۋێما دیۍ، جە بارەو گۆشەگیری بەڕێز ئۆجالانیوە قسۍکریا، گفتوگۆ ئەنجامدریا و جە گرڎ یاگێوەنە هەڵوێسی هامبەش نیشانەدریا. گەلوو کوردی بەڕێز ئۆجالانی پېسە ئیراڎەو ۋێش وینۆ و چارەسەری پرسوو کوردیچ بە تەنیا حەل منیۆرە. ۋەروو ئانەیچ گەرەکشا بەرەکۍ ئیمراڵی کریاوە.

بۆزان ئانەیچش وست ڕووە کە جە چالاکیەکانە تا ئیسە داواو هۆرگێرتەی گۆشەگیری کریۍ و واتش، "رەنگە ئەوەڵجاربۆ بە دەنگێوە بەرز داواو ئازاڎیی جەسڎەیی کریۆ".

'گۆشەگیری کاریگەری سەروو ٨٥ ملیۆن مرۆڤاوە منیۆرە، ئێمە سورێنمۍ سەروو ئانەی ئامانجەکەیما بارمۍ دی'

پەرلەمانتاروو پارتوو یەکسانی و دیموکراسی گەلا (دەم پارتی) عەلی بۆزان جە دمادماینە واتش ، "وەختۍ کە ئێمە جە بارەو گۆشەگیرییوە قسۍ کەرمۍ، ئێمە باس جە گۆشەگیریێوە چڕی ٣٣، ٣٤، ٣٥ مانگی کەرمۍ. بەڵام جە ئیمراڵینە ٢٥ ساڵێن گۆشەگیری هەن. جە ئیمراڵینە حیچ چێوۍ بە پاو یاسا و رێسا نەتەوەیی و میان نەتەوەییەکا جابەجێ مەکریۆ. وەختۍ مرۆڤ لا جە سیاسەتوو دلێینەو تورکیای و قۊمیایەکا ۋەرکەوتوو دلێڕاسەی مڎۆوە، ئا وەختە وینیۆ کە ئەگەر ویست پۍ چارەسەرکەردەی قۊرتەکا ئی وڵاتیە هەن، مشۊم بەڕێز ئۆجالان ئازاڎ بکریۆ. ئی ڕاپیمایە تەنیا پۍ کوردەکا نییا، گۆشەگیری سەروو بەڕێز ئۆجالانی کاریگەریش سەروو ٨٥ ملۋێن کەساوە نیانەرە. چارەسەرنەکەردەی پرسوو کوردی یۆ جە گرنگتەرین مەڵامەتەکا وەشبیەی و بەردەوامبیەی قەیرانوو داراییا. تا ڕاپیماکەیما ئامانجەکا ۋێش پێکۆ، تا ئا وەختەی بەڕێز عەبدوڵا ئۆجالان ئازاڎ بۆ، ئێمە درێژە بە کۊشیای ۋێما مڎەیمۍ".