چەمڎارە بەیننەتەوەییەکاو ورچنیەی ٤٠٣ چەمڎارێنۍ و سەرانسەروو تورکیاینە چەمڎاریی ورچنیەیەکا کەرا. ١٧٥ کەسۍ جە چەمڎارە بەیننەتەوەییەکا، پەرلەمانتارۍ پەرلەمانی وەڵاتە جیاوازەکا، نوێنەراو حیزبەکا و چەتر و هامپەیمانییەکا، نوێنەراو ڕێکوزیایەکاو گلێرگەی مەدەنی، پارێزنەرۍ، ئەکادیمییەکۍ، ئەوەکۊڵنەکۍ، ڕۊنامەنویسۍ و چالاکۍ وەڵاتاو ئەورووپای بێنۍ. ئا ١٧٥ چەمڎارۍ جە شارە کورڎییەکانە چەمڎاریی ورچنیەیەکا کەرا جە بواروو چەمڎاریکەرڎەینە جە شارە کورڎییەکانە.

دەرویش چیمەن نوێنەروو هەدەپەی جە ئەورووپانە واتش، "بە پاو کەشوهەواو وەڵی ورچنیەی، چەمەڕوان مەکریۊ ورچنیەێوە دیموکراتیک و یەکسان و ئازاڎ تورکیانە کریۊ."

چیمەن واتیچش، "ئەرڎۊغان بە کۊنترۊڵکەرڎەی دەسەڵاتوو دادوەری، میدیای و گردوو ئەرەمەرزیایە سیاسییەکاو دەوڵەتی هەڵمەتەو ورچنیەی بەرد ڕاوە. ئیساتۍ گرد کەس وینۊ، کە دەسەڵاتوو ٢١ ساڵەی دەسەڵات بییەن بە ڕژێمێوە دەسەڵاتپەرسی دیکتاتۊری. شاندوو چەمڎاریی سەربەوۍ و ڕسمی لاو ڕێکوزیایە بەیننەتەوەییە جیاوازەکاوە کیانیێنۍ پەی چەمڎاریکەرڎەی ورچنیەیەکا".

چیمەن ئانەیچش وات، جە فەڕەنسا، ئیتاڵیا، ئیسپانیا، ئینگلتەرا، ئەڵمانیا، هۊڵەندا، سویسرا، نەمسا، نەرویج، دانیمارک، سوید و فینلەندانە ١٧٥ چەمڎارۍ سەربەوۍ چەمڎاریی ورچنیەی جە شارەکاو ئامەد، چەولیگ، موش، رحا، مێرڎین، سێرت، شرنەخ، جۊلەمێرگ، ئاگری، قەرس، ئەرڎەخان، مەلەتی و ئیستەنبوڵی کەرا.

چیمەن واتیچش، نوینەرایەتیی هەدەپەی ئەورووپانە ئینۍ جە پەیوەندیی بەرڎەوامنە چەنی چەمڎارە بەیننەتەوەییەکا و بەورڎی چەمڎاریی ورچنیەیەکا کەرا.

س.ز