شاروو خورماڵی یەرێ ڕوێ جیاوازێ هونەریێ و شانۆییش ویەرنێ، دماو ساڵانێوە کپی و بێدەنگی شانۆی خورماڵەنە بە ستایلێ تازە و جیاواز و تایبەت و بە فۆڕمێ زانستیوە شانۆیی کەللەپووچی خورماڵەنە ئەرمانیا.

شانۆیی کەڵڵەپووچی  دماو ماوەو ٤٠ ڕوا پڕۆڤە کەردەی کەوت سەروو سەکۆی و خێرامایێ خاسش لاو وینەراوە وەنە کریا، ئینە قسێ بەرئاوەروو ئامادەکاروو شانۆییەکەی "ژیوار محەمەد"ینێ پەی ئاژانسوو هەواڵوو فوراتی و ئەرەیاوناش: گروپوو شانۆ خورماڵی ماوە یەرێ ساڵان مردان ماوەو ئایەرە ساڵینە ئامادەکاریما کەرد پەی ئانەی هۆڵێ شانۆیی گونجیا دەڤەروو هەورامان- خورماڵینە کەرمێوە دماو مانیایێ فرەی هۆڵەکە تەمامیا و دماو تەمامیای هۆڵەکەی بە ئامانجوو ئانەی هەرمانێ جیاوازە کەرمێ، واوەی وینەری بارمێوە دلێ دنیاو شانۆی، پەی هەوەڵ جاری دەقێ شانۆیی بێگانە و جیاواز، جە نویستەی "ئەنتوان چیخۆڤ"ی نیشانەو هەورامانی دریا. بەرئاوەرەکە  ئەرەیاوناش کە ئینە یوەمین جارا شانۆییێ پی ستایلە شاروو خورماڵینە مرمانیۆ، بارەو خێرامای وینەرەکاوە و ئاستوو چەمەڕوانیی خەڵکیوە بەرئاوەرەکە ئەرەیاوناش سوپاسوو وینەرەکاما کەرمێ کە ماوەو یەرێ ڕوا نمایشیمانە ئامادەیێ گەرموگوڕشا بێ و ئانەیچ مایێ دڵوەشیینە پەی مەنتێقەکەی، چونکوم گەرکما بۆ و گەرەکما نەبۆ ئی سەبکە چێوێ جیاوازوو ئەرماناین بە نیسبەتوو مەنتێقەکەیۆ، یوەمین جارا وینەر چی شارەنە بلیت بڕۆ و مێ دلێ هۆڵێوە شانۆییوە.

"ئامانجما بەکولتوورکەردەی شانۆگەریین هەورامانەنە"

بارەو دەقوو شانۆییەکەیوە ژیوار محەمەد واتش، شانۆییەکە بەرهەموو گەورەنویسەری ڕووسی ئەنتوان چیخۆفی ڕووسیین، بۆتان جەلالی ورگێڵنان و ژیوار محەمەدی ئامادە کەردەن و بەرش ئاردەن، بەرئاوەرە گەنجەکە ئانەش وست ڕووە، کە ئامانجما بەکولتوورکەردەی شانۆگەریین هەورامانەنە و ئێمە وەڵتەر وەڵینە و فیلمی و کوڵە فیلمیما بییەن مەنتێقەکەنە و ئیسەیچ مایێ وەشحاڵیمانە کە خەڵک خێرامای خاس وەنەو هەنگامە شانۆییەکەیما کەرا.