•  پێنجشه‌ممه‌, 14 Mar 2024, 19:26

ئیشکگێریی دادپەروەری کە بە داواکاری ئازادیی جەستەیی ڕابەروو گەلوو کوردی عەبدوڵا ئۆجالان و چارەسەرکەردەی کێشەو کوردی دەسش پەنە کرد، فرەو شارەکانە بەردەوام بی.

مێرسین

کۆمەڵەو پەشتیوانیی بنەیانەکاو چوکورۆڤا، لەقەکاو کۆمەڵەو پارێزنەراو ئازادیی ئۆهەدە و کۆمەڵەو پارێزنەرە هاوچەرخا چەهەدەو مێرسینی بەیاننامێوەشا وەڵا کەردۆ.  

پەریهان کۆجا و عەلی بۆزان پەرلەمانتاراو دەم پارتی و ئەدایاو ئاشتی، پارێزنەرێ و داکۆکیکارێ مافوو ئینسانی مرۆڤ و هاموەڵاتێ بەشدارییشا دلێنە کرد. ئاماژە پانەیە کریا ماوەو ٣٦ مانگی ویەردەینە هیچ زانیاریێوە جە عەبدوڵا ئۆجالانی و زیندانییای تەروو زیندانوو ئیمرالی نیا و سەرجەموو داواکارییەکاو کۆبییەیۆ پارێزنەرا و بنەیانەکا بە شێوێوە نایاسایی ئەرەگیریێنێ.هەرپاسە ئاماژەیچ پانەی کریا، قەدەغەکەردەی کۆبییەیۆ پارێزنەرا چەنی عەبدوڵا ئۆجالانی ساڵەو ٢٠١١ تا ٢٠١٩ بەردەواما سەرنجە پەی ڕاپۆرتەو سی پی تی کێشیا، کە ساڵەو ٢٠١٩ سەرێ زیندانوو ئیمرالییش دان و ٥وو ئابوو ٢٠٢٠ وردەکارییەکەش وەڵا کەردەنۆ.

 درێژەو بەیاننامەکەینە ئامان، دەوڵەت وەرپەرسا جە پارێزنای مافوو زیندانییا. قەراروو قەدەغەکەردەی و گۆشەگیری بە نایاسایی مدریۆ. وەراوەروو ئی دۆخەینە، ٧٧٥ پارێزنەرێ جە ٢٩ ناوەندە جیاوازانە تورکیانە و سەدان پارێزنەرێ وەڵاتە جیاوازاوە پەی دیداری چنی عەبدوڵا ئۆجالانی کەوتێنێ هەوڵدایوە بەڵام دەسەڵاتداراو تورکیای جوابشا نەدانۆ."

درێژەو بەیاننامەکەینە وچیان: "بە مەبەسوو دمایئاردەی بە گۆشەگیری و چارەسەری سیاسیی کێشەو کوردی بە ڕای دیموکراتیکە، زیندانییەکێ ٢٧وو تشرینوو دووەموو ٢٠٢٣ دەسشا بە مانگێرتەی جە واردەی کەردەن". ئیساتێنە زیاتەر جە سەد و پەنجا زیندانییا مانیشا جە واردەی گێرتێنە و کاریگەریی نەرێییش سەروو تەندروسیی زیندانییەکا وەش کەردەن. بە مەبەسوو پەشتیوانی وەنەو زیندانییا، ماوەو ١٠٠ ڕوا بۆ  بە سەرمەشقایەتیی ئەدایاو ئاشتی، ئیشکگێریی دادپەروەری ملۆ ڕاوە.

لە بەیاننامەکەنە داوا کریۆ، پەی چارەسەری هەمیشەیی پێویسا داواکاریی زیندانییەکا قبووڵ بکریۆ و دەوڵەت و دەسەڵات گۆش جە داواکارییەکا گێرا. چا چوارچوەنە پێویسا دمایی بە گۆشەگیریی ئیمرالی و سەرجەموو زیندانەکا بێ و ڕا بدریۆ پارێزنەرێ و بنەیانەکێ بەئاسانی سەرێ زیندانییەکا بدا و دەمودەس داواکاریی زیندانییا قبووڵ بکریۆ.

هەرپاسە ئیشکگێریی دادپەروەری شارەکاو مێردین، ئێلح، ئیزمیر و ئامەدینە بە هەمان مەبەس و داواکاری، بەردەوامییش هەن.