مانگەو ئادارو ئێساڵی ڕاپۊرتێوە گردگیرە و تێر و تەسەلەو وەزارەتو بەرو ئەمریکاینە  باس جە نیگەرانیەکاشا بارەو دۊخو مافەکاو ئینسانیوە پانیشتو کوردسانینە کریابۍ. ئانە کە دەوڵەتو ئەمریکای دۊخو مەنتێقە جیاجیاکاو جیهانی وزۊ چێرو چەمداریوە یاگۍ سەرەسڕمەنەی نییەنە، چونکوم جە حەرشۊنێوە جیهانینە بەرژەوەندییشا بۊ پەی دڵنیابییەیوە جە سەقامگیریی دۊخوو ئایاگانە و حەر شۊنێونە بەرژەوەندییش نیا، تا بەرژەوەندیی بەدەس بارۊ، دۊخەکەی وزۊ چێرو چەمداریوە و ئینەیچە تایبەتمەندیێوە سروشتی دەوڵەتان و جگە چینەیە مەتاویۊ چەمەڕوانیی تەرشا چۊوە کریۊ. وەلۍ وەختۍ ئا چەمداری و زانیارییۍ کریا ڕاپۊرتێوە گردگیر و وەڵا کریاوە، بەرگنۊ کە چندە دۊخەکە خەتەرا. ئانە کە یاگۍ سەرەسڕمەنەینە ئانەن، کە سەرباروو ئا کێشە و پاشێلکارییە گەورەیە جە بواروو مافەکاو ئینسانینە چی ئەرەیاونایەکاو پانیشتی لاشا چی مەسەلۍ نەکەرڎەنۊ، وێش پەی وێش ئینە بەڵگەن سەروو پاشێلکاریی وەروەڵاو مافەکاو ئینسانی و بییەی سەرکوتی و دەمکوتی میدیایی.

یوە جە خاڵەکاو ڕاپۊرتەکەینە ئاماژە پانەیە دراین، کە پەدەکە و یەنەکە حەرکامێوەشا هێزی ئەمنی و سەروازیی تایبەت بە وێشا هەنشا و بنەڕەتنە ئی هێزۍ نەک پەی پارێزنای ئاسایشو هاموەڵاتاو پانیشتی، بەڵکوم پەی پارێزنای بەرژەوەندیی حزبیی وێشا هەنۍ.  

جگە جە ئامانجە حزبییەکاو ئا هێزا، هەمان وەختەنە ئینۍ لای سەریی دەسەڵاتی دادوەرییوە و هێزە ئەمنییە حزبییەکۍ نۊعۍ پارێزبەندیی دادوەرییشا هەن و ئینۍ لای سەریی وەنەپەرسایوەیۊ. لاو گرد کەسیوە ئاشکران، کە کۊکەرڎەیوە گردوو دەسەڵاتەکا یەک شۊننە گەندەڵییش جەنە گنۊوە و ئا دەسەڵاتە ڕەها پا هێز و دەزگا ئەمنییا دریان بۊ بایسوو پاشێلکەرڎەی سیستماتیکو مافەکاو ئینسانی.  

تۊمەتێوە تەر، کە ئاراستەو سەرکرڎەکاو ئا دووە حزبە دەسەڵاتدارەیە کریان، ئانەنە کە نیایرەی و لادای وەرپەرسە دادوەرییەکا ئینا بەروو ڕاکارە ئاساییەکاوە، شێوازو شۊنیرەلوای و وەنەپەرسایوەی دادوەرییچ بەجۊرێوەن، کە وەختێوە وەرپەرسێوە باڵاو ئا دەسەڵاتەیە لا دریۊ، سیستمەکە بەجۊرێوە جووڵییۊوە، کە ڕەوتوو وەنەپێتەیوە  سەروو دۊسیەکا بەتەمامەتی فاڕیۊ.

بەشێوە تەرو ڕاپۊرتەکێنە ئامان، کە دەزگا ئەمنییەکۍ تەنانەت وەڵۍ لوایڕاوەو ناڕەزایەتی و وێنیشانەدایەکانە چالاکۍ و ورسووڕیۍ مەدەنییەکا بە وەروەڵایی گێرا جەلاو کەسە دەسلوایەکاشاوە دەسەڵاتی دادوەریینە بەکرڎەوە ڕا وەنەو جووڵیایوەی دادپەروەرانەی پەی دۊسیەکاشا گێریۊ.  

هەرپاسە تۊمەتبارۍ کریێنی پانەیە کە قۊرطی وەش کەرا وەرڎەموو ئەرەیاونایە سەربەوێکانە، جە دەسیاوایشا بە زانیاریی گردینوو دامودەزگا ئیداری و حکومییەکا، جیای ئانەیە وانایوەی قۊرخکارانەشا سەروو گلێرگەیرە مسەپنا و ئینەیچ لاو حەر کەسێوە، کە پەی ماوێوە کوڵی چا ژیوا بۊ، شاریاوە نییا.