ڕێککەوتەی کۊمەڵایەتیی سەرنیشت و وەرکەوتو سوریای پەشتی بە گلێرگەی ئیکۊلۊژی-دیموکراتیکی، گلێرگەی ئازادیی ژەنا، ئابووری-کۊمەڵایەتی، وێڕاوەبەری، دادپەروەری کۊمەڵایەتی و کۊنفیدڕاڵیزمی دیموکراتیک بەسۊ.

 ئەندامەو ئەنجوومەنو ژەناو سەرنیشت و وەرکەوتوو سوریای، ستێر بشار قاسمە، کە ئینا کۊمیسیۊنو ئامادەکاریی ڕێککەوتەی کۊمەڵایەتینە، چەنی ئاژانسو هەواڵو فورات قسێش کەردۍ و واتش، سەرنیشت و وەرکەوتو سوریاینە، نەتەوە، ئایین و دینە جیاوازەکۍ سەرو بنەماو یەکسانیی گەلا مژیوا، مافەکێشا جە ڕووەو یاساییوە مسۊگەرۍ کریا، وەروو ئانەیە دایمە چێوی تازۍ نوۍ ڕووە مدا، پەیماننامەی کۊمەڵایەتی پێویستیێوەن. هەرپاسە پێویسا ئەنجوومەنو ژەنا دەورێوە کارا جە ڕێککەوتەی پەیماننامەکەینە گێڵنا و واتش، کە پێویسا کۊمیتەکاو ئابووری، تەندروستی و پەروەردە بەرهەمدارتەرۍ و وەرپەرستەرۍ دەور وینا. بشار قاسمە واتش:"بە پاو  ئەزموونو شۊڕشوو ئی ١١ ساڵەیە، پێویسش بە فاڕیای بێ".

 گەرەنتی یاسایی پەی گردوو پێکئامایەکا نریانرە

ستێر بشار قاسمە بییەی گەلاو کورد، عەرەب، ئەرمەنی، سووری، چەرکەسی، چیچانی و ئایینەکا پێسە موسڵمان، مەسیحی، جوولەکە و ئێزدی سەرنیشت و وەرکەوتو سوریاینە ئاردێوە یاد و واتش:" پەوکای پەی گەلە جیاوازەکا پێویس بۍ ئاسایشو ئایین و مافەکاشا مسۊگەرۍ کەرمۍ و ژیواێوە هامبەش بنیات بنیەیمۍ. ئی ڕێککەوتەیە لاو  ئیدارەو وێڕاوەبەری سەرنیشت و وەرکەوتو سوریایوە جە چوارچوەو نەتەوەی دیموکراتیکینە پەسەند کریان. نوێنەرو ئەرەمەرزیا، ڕێکوستەیەکا، ئایین و دینەکا گرد بە ورچنییەی پەسەندۍ کریێنۍ. مەکریۊ کە تەنیا یەک نەتەوە بلۊ دلۍ ئیدارە و گەلای تەر یاگە کەمینەکانە وەرەچەم نەگیریا. بە پەیماننامەی کۊمەڵایەتی مافو نەتەوەی، ئایینی و دینە جیاوازەکا مسۊگەرۍ کریا."

 سیستمێوە تازە حەر جە تەندروسییوە هەتا ئابووری

ستێر بشار قاسمە ئاشکراش کەرد، کە هیچ فاڕیاێوە جە پرەنسیپ و پەیڕەونە نەکریان و ئاماژەش پانەیە دا، کە تەسەور کریۊ سیستمێوە تازە جە کۊمۊنەوە هەتا مەجلیس، ئابوورییوە هەتا دارایی، تەندروستییوە هەتا پەروەردە، پەنەوازییەکاو تەماموو هەرێمی دابین کەرۊ.  

 وێش ٧ کانتۊنانە ڕێک وستەن

هەرپاسە ستێر بشار قاسمە واتش، تەنیا نامۍ ئیدارەو وێڕاوەبەری سەرنیشت و وەرکەوتو سوریای فاڕیێنە و بە 7 کانتۊنۍ ڕێکوزیانوەو ماچۊ:"سیستمەکە فاڕیان پەی 7 کانتۊنا، یانۍ کانتۊنەکاو جەیز، فورات، ڕەقە، تەبقە، دێرەزۊر، منبج، عەفرین-شەهبای. گردوو ماددەکاو پەیماننامەی کۊمەڵایەتی گرنگێنۍ، پەروەردە و تەندروستی پێسە بابەتی سەرەکیی پەیماننامەکەینۍ. پەی بنیاتنیای ژیواێوە ڕێکوزیای سەروو بنەماو دیموکراسی ڕاستەوخۊ بەبۍ خەڵکی هیچ هەنگامێوە ورمەگیریۊ . گفتوگۊ پەی بنیاتنیای سیستمێوە گلێرگێوە هۊشیاری و تەندروستی و پەروەردەیی ڕێکوزیای لوا ڕاوە.

 ئامانج کۊمارێوە دیموکراتیکا

ستێر بشار قاسمە باسوو ئانەیچش کەرد، کە ئادۍ پەی بنیاتنیای سوریاێوە دیموکراتیکی جە کۊشیاینە بەردەوامێنی و واتش:"مۊدێلوە کە گردوو ڕەنگەکا گێرۊ وۍ، سەروو بنەماو کۊبییەیوەی گەلی ئەرەمەرزیان و دوور جە سیستمی ناوەندپارێزنی بنیات نریان. ئەنجاموو سیستمی ناوەندی سوریای ئینا وەرەچەماوە، مافو نەتەوە، ئایینی و مەزهەبە جیاوازەکا پاشێل کریان. حەر پەوکای هەم جە گفتوگۊکامانە و هەم جە هامپەیمانییەکامانە ئامانجما بە کۊمارو دیموکراتیکین جە سوریانە، ئەگەر ڕێککەوتەێوە سەروو دەستورێوە دیموکراتیکی بۊ، ئا وەخت فاڕیای ڕێککەوتەیەکەینە. هەرپاسە واتش:"دیموکراسی سیستمێوەن کە سەروو بنەماو یەکسانی و دادپەروەری گرنگی بە ژیوای کۊمیناڵی مدۊ، کە بە قەراروو گەلی ملۊ ڕاوە و پێوەژیوای گەلا مارۊ شۊنەو  وێشەرە."