بۆنەو ٤٥ ساڵەو کۊکوشی مەڕەشیۆ دەم پارتی ئەرەیاۋنېوەش وەڵاکەرڎۆ و ئەرەیاۋناش، تا ئا وەختەی کۊکوشیەکۍ دژوو کوردی، عەلەوی و گرڎوو کەمینەکا تورکیانە ۋنەپەرسایۆیشا چنە نەکریۆ، دیموکراتیزەکەرڎەی تورکیای نمۍ دی.
یوکسەل موتلوە و مەحفوز گولەریوز هاموتەواچا کۆمیسیۆنوو گەلی و ئایینیەکا دەم پارتی ئەرەیاۋنېوەشا وەڵا کەرڎۆ.
جە ئەرەیاۋناکەینە باس چانەی کریان،"٤٥ ساڵۍ چېوەڵتەر، جە بەینوو ١٩پۍ ٢٥و کانوونوو یوۋەموو ١٩٧٨ی بەپاو ئامارە ڕسمیەکا، ١٠٥ کەسۍ جە کۊکوشیەکەو دژوو عەلەوی، کوردی و چەپەکانە تیرۆرکریۍ و بە سەڎان کەسېچ بە قسۍ شایەتحاڵا، گیانشا جە دەسدا و هەزاران کەسۍ زامڎارۍ بیۍ، بێ تاتە و بێ ئەڎا و بێ واڵە و برا کریۍ چا کۊکوشیەنە ، تاڕادېوە فرە جە عەلەوییەکا دوور وزیاوە. حەرچنە ماوېوە فرە ۋیەرد، بەڵام ئی خاکە وڵاتێوە گونجیا نەبۍ پۍ ژیۋایۍ ئەمن و ئارامی پۍ عەلەوییەکا."
ئانەیچ ئامان، کە حەرچنڎە ٤٥ ساڵۍ ۋییەرڎەن بەڵام ئاشکراکەرڎەی هێزەکاو پەشتەو کۊکوشیەکەی زیاتەر تێکەڵېنۍ چنی دەوڵەتی. دەم پارتی ئەرەیاۋناش، کە قەرەبوو ئێشی و زەرەرەکا نەکریانۆ، داواو چنەویەرڎەیچ جە کەسوکاروو کوشیایەکا نەکریان.
جە ئەرەیاۋناکەینە ئاماژە پانەی کریان کە پەنەوازەن حکومەتوو ئاکەپە-مەهەپەی کە فرەینەو پەرلەمانینۍ دەس جە ڕاگیریەکاشا هۊرگېرا و تەئکید کریانۆ،"حەتا تورکیا قەرەبوو شەرمەزاری ۋیەرڎەیش نەکەرۆوە، حەتا کۆکوشی دژوو عەلەوییەکا، کوردی و کەمینەکا ڕۆسن نەکەرۊوە، وەرپەرسا ئی هەرمانۍ ئاشکرا نەکریا، ۋەروو چەما وەڵینگەینە سزا نەدریا، دیموکراتیک بیەی ڕووە مەڎۆ.
پۍ ئانەی ڕا جە کۊکوشی تازەی گېرمۍ، حەجگیز حۊڵوو جە ۋیربەرڎەیۆ مەڕەشی قبوڵ مەکەرمۍ و بەردەوام چنی کەسوکاروو قوربانیاو کۊکوشیەکەی بیمۍ."
جە دمادمایی ئەرەیاۋناکەینە قوربانیاو کۊکوشی مەرەشی بە ڕێزۆ یاڎ کریېوە.
