ئامانجوو پارتوو چەپی سەوزی واننە ئانەن، کە  وێش حەر ٨ پەرلەمانتارەکەو وانی ڕوانەو پەرلەمانی کەرۊ. شەنگول پۊڵات هامسەرۊکوو هەدەپەی و ئەلباک و مەدەنی ئۊزەر هامسەرۊکوو شارەوانیی ئارتەمێنتی ئەرەیاوناشا، جە ١٤و ئایارینە ئا سیستمی فاڕا، کە کودەتا دژوو ئیرادە و حەزوو گەلی کەرڎەن.

 شەنگول پۊڵات هامسەرۊکووهەدەپەی ئێلبەک بە ئاژانسوو هەواڵوو فوراتی (ANF)ی یاونا، ورچنیەیەکاو ١٤و ئایاری ورچنیەیۍ فرە گرنگێنۍ پەی ژەنا و گرڎوو گەلا. پۊڵات ئاماژەش پانەیچە دا، ئەنەیاوایۍ و عەقڵییەتێوە هەن، کە ماوەو ۲۲ ساڵان گلێرگە جە دژوو یۊی هانی مڎۊ، ژەنیش وچکلۍ کەرڎێوە خەڵکش لات وست. واتش، "چێگە گرنگیی ورچنیەی بەرگنۊ. ئێمە، پارتوو چەپی سەوزی، فرەو وەختا حەوڵۍ مدەیمۍ، ئی سیستمی فاڕمۍ. چی سیستمە ٢٢ ساڵییەنە، ژەنی زیاتەر جە گرڎیما  کاریگەریی خراپشا سەرۊ بییەن. ئێمە ڕووبەڕووۍ دەسەڵاتێوە بێیمێوە، کە کوشتەی ژەنا ڕەوا کەرۊ و ئانۍ ژەنی کوشا بە سزای سووکە ڕزگارشا بۊ. ئێمەی ژەنی بەقووەتێنمۍ و ئەگەر یۊی گێرمۍ و یۊگێرتۍ بیمۍ، متاومۍ ئی سیستمی فاڕمۍ. ئێمە تاومۍ ئایندەو وێما جە ڕاو پارتوو چەپی سەوزیوە دووەبارە و سەرجەنۊ بنیات بنیەیمێوە. ئێمە بە ئیرادە و حەزوو وێما و هێزوو ژەنا سەرۍ گنمۍ."

'ئێمە ئایندەو وێما و شارەکەیما بەرمۍ ڕاوە'

پۊڵات ئاماژەش پانەیە کەرد، نزیکەو گرڎوو شارەوانییەکاو هەدەپەی قەیومشا ملەرە سەپیان و واتش: "سەبەبوو یەکەمیچ ئانەن، کە گەل بە ئیرادە و حەزوو وێش مەبەرۊش ڕاوە.  دووەم- ئانەن، کە ڕاگێری جە سیستموو هامسەرۊکایەتی و ڕاوەبەرڎەی کریۊ، کە بەتایبەت ژەنی و گرڎوو بەشەکاو گلێرگەی متاوا دلێشەنە بەشدارۍ با و دەورش چەنە گێڵنا. سەپنای قەیومی کوردساننە کودەتان دژوو ئیرادە و حەزوو گەلی. لە ١٤و ئایارینە ئی سیستمەی فاڕمۍ، کە کودەتاش جە ئیرادە و حەزووو ژەنا و گەلی کەرڎە. ئێمە تاومۍ بە یەک دەنگ ئی دەسەڵاتی فاڕمۍ. ئانۍ کە دەنگ مڎا مشۊم هاگایچشا جە سندوقەکاو دەنگدای بۊ و پارێزناشا، چونکوم گەرەکمانە حەر ٨ پەرلەمانتارەکەو وانی  بەدەس بارمێ".

'دەنگێوە بە ماناو دەنگدانێوە فرەی و گرنگین'

مەدەنی ئۊزەر هامسەرۊکوو شارەوانیی ئارتەمێنت واتش، " پەنەوازا گرڎوو خەڵکوو وانی چی ورچنیە گرنگ و مانادار و چارەنویسسازەنە بلا بنکەکاو دەنگدای و دەنگ بڎا. مەبۊ واچا، بە یەک دەنگوو من حیچ مەفاڕیۊ. یەک دەنگ بە ماناو دەنگی فرەی و دەنگداێوە گرنگین. مشۊم پەی دیموکراتیککەرڎەی وەڵاتی گرڎ کەسێوە بلۊ بنکەکاو  دەنگدای و دەنگ بڎۊ."

س.ز