ھێزێۋە ئەمنی ھۊلێری دۊڵەمەنێۋە شارو سلێمانېشا بەنامۍ "ھېوا ڕەئوف"یۊ گێرتەن ۋچیۊ ئا دۊڵەمەنڎە سەرو سکاڵاو ھامبەشەکاش گېریان.

بەپاو زانېاریەکاو ڕۊژنېوزی کە جە تەیارە خانەو ھۊلێریۊ دەسش کۊتەن، دما نېمەڕۊو ئارۊی دلۍ تەیارە خانەو ھۊلێریەنە ھێزێۋە ئەمنی "ھېوا ڕەئوف" دۊڵەمەنو دیارو شارو سلێمانېشا گێرتەن، جە ۋەختێنە نېازش بیەن بلۊ پۍ بەرو ۋڵاتی.

سەبارەڎ بە مەڵامەتو ئەرەگێرتەکەیش، ئا سەرچەمە ئاشکراش کەرڎ، کە ئا دۊڵەمەنە سەرو سکاڵاو ھامبەشەکاش گېریان کە سەرشا تۊمار کەرڎەن، ۋەڵتەریچ فەرمانەو گێرتەیش بېێنە.

حەرپاسە ئاماژەش پانەی کەرڎ؛ کە ئا دۊڵەمەنڎە بە تۊمەتەو بەرڎەی ھەشت ملۋێنێو ٥٠٠ ھەزار دۊلارا سکاڵاش سەر تۊمار کریان، پۊکەی ئارۊ جە تەیارە خانەو ھۊلێری گېریان.

ھ.ش