شاندو ئیمراڵیی دەم پارتی کە پێکمۍ جە سری سورەیا ئۆندری و پەروین بوڵدانۍ و ئەحمەد تورکی، چنی هامسەرۆکو گرڎیی وەڵینو هەدەپەی سەڵاحەدین دەمیرتاشی جە زینانو جۆرو F و ئەدرنەینە کوۍ بیێوە. سەڵاحەدین دەمیرتاش دماو گلێرۆبیەکەی، جە پەلیانەو ۋێشەنە ئینەش وەڵا کەرڎۆ:

"واڵە و برایا وەشەسیایم، بۊنەو سەردای شاندو ئیمراڵیی دەم پارتی پەی لاو ئێمە، سڵام و وەشەسیایی ۋێم پەی گرڎ لێوە مکیانو. سوپاسو شاندەکەیما مکەرو کە بە فیداکاری و جدییەتۍ گۊرۆ درێژە بە کۊششی مڎەیمۍ، منیچ ئەرەیاۋنوش کە متمانەم قەوەتا بە پارتەکەیما (دەم پارتی) و بەتایبەت ئێژا عەبدوڵا ئۆجالانی کە پەی چارەسەری دیموکراتیکی و ئاشتی جە دوورگەو ئیمراڵینە کۊششی گۆرە مکەرۆ.

مژاری سەرەکی چی قۆناغەنە، پەشتگیری ڕای گرڎینین. پۊکەی شەفافیەت فرە گرنگ و پەنەوازا. مشۊم شاندەکەما لایەنە سیاسییەکاو دلۍ پەرلەمانی ئاگاڎار بکەرۆوە، وە جە ڕووانی ئایندەنە ڕێکوزیاکا گلێرگەی مەدەنی و لایەنە سیاسیی و کۆمەڵایەتییەکا ئاگاڎار بکەرۆوە. هەرپاسە گرنگا زوانو ئاشتی جە گرڎ لێوەنە زاڵ بۆ. هەرکەسێ سەرو ئا مژاریە قسۍ بکەرۆ پەنەوازا ۋێش جە هەڕەشا و سوکایەتی و قسۍ ئاژاوەگێڵنانەی بەدوور گێرۆ و جیای ئانەی باسو قسۍ پووچ و بێمانای سەرو سەرکۊتەی و شکسی بکەرۆ، باس جە ئایندێوە هامبەشی بکریۆ کە گرڎ چنەشەنە سەرۍ گنا.

هەرچڼە هەوڵبڎەیمۍ ۋێما دوورۍ وزمۍ جە نامەنیای پرۆسەکەی، جە لاو ئێمۆ ئی پرۆسە، نامۍ بریۆ بە پرۆسەو "دیموکراتیکبیەی، ئاشتی و واڵە و برایەتی". پېسە ئا ئەکتەرا سەرو بناغەو دیموکراتیکی و ئاشتییانەی سیاسەت مکەرمۍ، داوا مکەرمۍ و پەشتگیری مکەرمۍ جە دمایی ئاردەی بە جەنگی و تنوتیژی. واوەیش مکەرمێوە، ئەر هەلومەرجو ئێژا ئۆجالانی مسۆگەر بکریۆ و چی ڕووانگۆ دەسوەڵێوستەی بکەرۆ، ئێمە پاڵپەشتیش ۋنە مکەرمۍ. هەڵبەتە دەسوەڵێوستەی بانگەوازکەردەی ئینا لاو ئاڎیۆ. پېسە ئانەی ئەرەیاۋناش، ۋەرپرسیاری بەدیئاوردەی بناغەی یاسایی و سیاسیی و بانگەوازەکە ئینا ملو حکومەتی و پەرلەمانینە. چی قۆناغەنە، پاڵپەشتی گرڎ هەوڵێوە ئاشتی مکەرمۍ. بەڵام ئانەی ئی بانگەوازیە بکەرۆ و مخاتەبو ئی بانگەوازەینە، ئێمە نیەنمۍ. پېسە سیاسەتمەدارا، دەور و ئەرکو ئێمە هێقمکەردەی بناغەو ئاشتییا، هاندای لایەنەکان پەی ڕاوەشکەردەی پەی ئاشتی. بەڵام چانەی زیاتەر، ۋەرپرسیاری بنەڕەتیما ئینەنە؛ پەی دیموکراسی و ئازادی و یەکسانی و دادپەروەری و مافو بنەڕەتی مرۆڤەکا ئەوەکۊشای ئاشتییانە و مەدەنی و سیاسی فراوان بکەرمۍ. پەنەوازا ئیتر ڕا و دەرفەتی پەی ئی ئەوەکۊشایە بکریۆوە و بناغەو ئاشتی هێقم بکریۆ. گەرەگمانە ئی مژاریە بیاونمۍ بە کەسانی پەیوەندیداری.

پەنەوازا گرڎ کەس بزانۆ، نیازی خاس هەن، ئامادەکارییەکۍ بەپاو ئی نیازە عالا هەنۍ. بەڵام پەی ئانەی پرۆسەکە مسۆگەر بکریۆ، پەنەوازا هەنگامەی دەمودەسیە بنریۆ. پەی ناستەی ناکۆکییەکا کە چڼین ساڵێن چی خاکانە بیێنۍ بە مەڵامەتو ئێشی و گرڎو وزەو وڵاتیش بەردەن و پەی بەدیئاوردەو ئاشتی سیاسی، ئامادەو گرڎ جۆرە پاڵپەشتیێوەنمۍ.

بەڵام ئەر ڕاو ئاشتی سیاسیی بکریۆوە، بەجۆرێوە گرڎو ڕایەکا ئەوەکۊشای پەی ئاشتی کۆمەڵایەتی و دیموکراتیکبیەی و یەکسانی و دادپەروەری و ئازادی کراوۍ با، ئینە دەردەو گرڎ کەسی و وڵاتی مووەرۆ. پی جۆرە پەشتگیری کۆمەڵایەتی پەی ئاشتی سیاسی زیاتەر مەبۆ و قبووڵکەردەی هەمەڕەنگی گەلی، گرڎو ئاژاوەگێڵنی و هەوڵەکا شێونای پووچ مکەرۆوە.

سوپاسو ئێژا سەرۆککۆماری و ئێژا دەوڵەت باخچەلی و ئێژا ئۆزگور ئۆزەلی و گرڎو سەرۆک پارتەکا مکەرو کە چی قۆناغە چارەنوویسساز و تاریخیەنە، دەسوەڵێوستەی ئاشتی گێڕانە دەس. واوەیش مکەرمێوە، بێ ڕەچەم کەردەی بەرژەوەندیی شەخسی و حزبی، بێ دووە دڵی پەشتگیری گرڎ هەنگامێوە مکەرو پەی هێقم کەردەی دیموکراسی.

جە دما دماینە گەرەکما ئانەی واوەی بکەرووە؛ کوردا بەتایبەت ڕووەشا جە تورکیاینە. باوەڕم چامنەن ئەر ئاشتی و دیموکراسیێوە بەهێز بنیات بنریۆ، پێوەرە چی پرۆسەنە بە سەرکۊتەیی بەرۍ مشمۍ. پۊکەی هیواڎارەنا و داوا مکەرو کۆمارو تورکیای ڕووەبکەرۆ کوردا و ئاشتیێوە گۆرە و شکۆدار بەدی بارۆ.

دیسان سوپاسو شاندەکەیما مکەرو، سڵام و وەشەسیای گەرمو ۋێم پەی گرڎ لێوە مکیانو و هیواو سەرکۊتەیتا پەی موازو.

سەڵاحەدین دەمیرتاش، ١١ /١/ ٢٠٢٥، زینانو ئەدرنەی".