لاو گەشمەرڎە ئیبراهیم ساریۆ کە گەرەکش بۍ کولتوروو دەنگواچی درێژە پنە بڎۆ و سەروو رێبازوو هۆزان مزگین، هۆزان سەفکان، هۆزان سەرحەد، دەلیلا و ڤیان پەیمانەکاوە ڕا کەرۆ، بەرهەمی هونەری بەشێوەبۍ جە ژیۋایش.
چی ڕووانە کە کۊشیای ئازاڎیی کوردسانی ڕۆ دماو ڕۊی گەورەتەر بۆ، دەوڵەتوو تورکی ئەرەگیری فشارەکۍ ۋێش سەروو گەلی زیاڎ کەردێنۍ. گەلوو کوردسانی بە هەزاران ساڵێن ئینا چێروو هجومی و ستەمینە، گرڎ وەختۍ جە دژوو ئەرەگیری ۋێڕاگری کەرۆ. جە کەشەکا کورڎسانینە جەنگەوانا ئازاڎیی بە چالاکیەکاشا گورزەی گۊرێشا جە دوژمنی شانا. یۆ چا جەنگەوانا ئەمرە ئاتابای (ئیبراهیم ساری) بۍ.
ئەمرە ئاتابای ساڵەو ١٩٩١ مەنتێقەو ئەبەخوو وانینە پەیدا بییەن. وەختێوە کە کوردستان چێروو هجوومی دژوارینە بێ، بنەیانێوە وەڵاتپارێزنە بە کولتووری وەڵاتپارێزنی گەورە بییەن. ئەمرە ئاتابای کە زارۆڵەییوە ئازار و ستەموو سەروو گەلوو کوردییش دییەن، ئا چێوەشە قبووڵ نەکەرد کە سەروو گەلوو کوردیرە سەپیێ. پەوکای عومرێوە گولانەنە دەسش بە پەیجوری و گێڵای کەرد و جمیەری ئازادیی کوردیش نزیکۆ ئشناسا. ئاتابای کە دلێ خەباتوو گەنجانە بەشدار بێ، گەرەکش بێ وەڵیوەلواێوە گەورەتەر بارۆ کایەوە، تا تەنیا یەک ڕا بێ، ئانەیچ کەشەکاو کوردستانی بێ.
ئاتابای ساڵەو ٢٠٠٩ لوا کەشەکاو کوردستانی و ژییواێوە تازە وەرڎەمشنە بێ، ئیتر کەشنە درێژەش بە کۆشیای دا. ئا بە دەنگ و ڕەنگش کەش و دەشت و دۆڵەکاو کوردستانیش ڕازنێوە. ئیبراهیم ساری نامێ وێش جە فەرماندەی گەورەو پەکەکەی ساری ئیبراهیم-یوە ورگێرت. گەریلا ئیبراهیم ساری کە گرد وەخت گەرەکش بێ ڕاو گەشمەردا گێرۆرە وەر. خەباتی هونەرییش پێسەو بەشێوە جە ژیوای وێش وینێ. گەرەکش بێ درێژە بە کولتوروو دەنگواچی بدۆ سەروو ڕاو هۆزان مزگین، هۆزان سەفکان، هۆزان سەرحەد، هۆزان ئارگەش، دەلیلا و ڤیان پەیمانێوە بلۆ.
ئیبراهیم ساری کە کەشنە ئا ژیوایشە وێستۆ، کە گێڵێ شۆنیشەرە دماو ئانەیە بەشدارییش ڕیزەکاو گەریلاینە کەرد، زوو فێروو ژیوای گەریلایەتیی بێ. ئیبراهیم کە بە دەنگ، خوە، بە جۆش و ورە و بە زیرەکییش پراتیکنە دا سەرنجەو گردوو هامڕایاش کێشتە. گەشمەرڎە ئیبراهیم زیاتەر سەرنیشتنە و هەرێمەکەو وێشنە پێسەو گەریلای کۆشیێ. ئیبراهیم ساری بەتایبەتی واننە کە یاگێ پەیدابییەیش بێ گەریلایەتییش کەرد، هەرێموو جۆلەمێرگیچنە چالاکیی سەرکەوتانەش کەرد.
چەنی ٨ هامڕا قارەماناو وێش وێگێرییشا کەرد
ئەوینداریی ئازادیی ئیبراهیم حەر کە گێڵا کەشەکاو کوردستانیرە، چندین چیرۆکێ قارەمانیێش ژنیێ. گەریلا ئیبراهیم کە پەی هەقسانایۆ هامڕا گەشمەرداش و ئارڎەییدی وەرمەکاشا بە قەرارداری ڕاو ئازادیینە درێژەش بە هەنگامەکاش دا، کەشەکاو کوردستانییش بە مەقام و گۆرانییەکاش لاونێوە. ڕاسییوە کە ئیبراهیمنە یاگێش گێرتێبێ، ڕاسیی ئامێتەبییەی شۆڕش و هونەری بێ. پێسەو پردێوە بەینوو شۆڕشی و هونەرینە، بەینوو هونەر و گەریلاینە.
گەشمەرڎە ئیبراهیم کە سەروو بنەماو فەلسەفەی ڕابەروو گەلوو کوردی عەبدوڵا ئۆجالان وێش وست وەڵێ، بە بەشداربییەیش ئۆپراسیۆنی شۆڕشگێڵنیی ئەلکێ-نە ساڵەو ٢٠١٥ینە گورزی قورسش وەنەو دەوڵەتوو تورکی ئەرەگیری شانا. ئیبراهیم ساری و هامڕێش کە چا ئۆپراسیۆنەنە ٢٤ سەعاتێ بە قارەمانێتی دژوو دوژمنی گژیێ، گورزی قورسشا وەنەو سوپاو تورکی دا. دوژمن ئیتر حیچ بارەگایەکێوەشنە ئاسوودە نەبێ. ئیبراهیم ساری دماو جەنگێوە ٣ ڕوەی چەنی ٨ هامڕایاش بە قارەمانێتی وێگێرییشا کەرد و تێکەڵ بە کارەوانوو گەشمەردا بیێ.
گەشمەرڎە ئیبراهیم کە بە گیان، چالاکی و گۆرانییەکاش دڵوو هامڕایاش وەش کەردێ، بی بە گۆرانییەو وەڵاتەکەیش، تا دماهەناسەش پەی وەڵاتی و گەلەکەیش گژیا. گەلوو کوردی گرد وەختێو شانازی بە جەنگەوانی پێسەو ئیبراهیم سارییوە کەرۆ.
