دەسەو سەرۊک عەشرەتەکاو شەنگالی‌ هۊشداری مڎۊ بە پەدەکەی و میری

دەسەو سەرۊک عەشرەتەکاو شەنگالی هۊشدارییش دا، کە پەدەکە میرتەحسین حازم بەگش پەی بەرژەوەندییەکاو وێش دژوو شەنگالی بەکار مارۊ و دەستنیشانش کەرد، کە ئانە مایۍ قبووڵکەرڎەی نییەنە.

دەستەو سەرۊک عەشرەتەکاو شەنگالی بارەو پیلانەکاو ئی دماییەو سەروو شەنگالی کۊنفڕاسێوە ڕۊژنامەوانییش بەست. کۊنفڕانسەکە جە ناوەندوو شەنگالینە ساز کریا و دلێشنە لاو دەخیل مورادیوە ئەرەیاوناێوە ونیاوە.

دەخیل موراد واتش، پلانەکانی پەدەکەی سەروو شەنگالی یاوێنۍ ئا ئاستە، کە جە ڕاو میروو ئێزدییەکاوە دەسۍ وزانە شەنگالی و واتش، "جە وەڵتەرنە وەروو ئانەی شەنگالنە ئاژاوۍ بنیاوە، دەسشا بە پلانەو نیایۊ دووەبەرەکی بەینوو پێکئامایەکاو شەنگالینە کەرڎەن. گەرەکشابۍ پێوەژیوای هامبەش شەنگالنە تێک بدا، بەڵام گردلایۍ ڕاسییی گلێرگەو ئێزدی مزانا، کە ئێمە دژوو حیچ ئایینێوە نیەنمێ".

درێژەو ئەرەیاوناکەینە هاتووە، "پەدەکە زانابێش کە بە سەردای سەرۊکوەزیرانوو عێراقی پەی شەنگالی پلانەکێشا و ئانە کە دژوو شەنگالینە ماچاش ئاشکرا بۊ و ڕاسییی ئادیشا وینیۊ. وەروو ئانەی ئا ڕاسیۍ شەنگالنە ئاشکرۍ نەبا، حازم تەحسین بەگ کە پێسە میری دەسنیشان کریان، وستشا جووڵەوە و بە قسۍ ناڕاسۍ قۊرتێش پەی سەردایەکەی سازۍ کەردێ".

جە ئەرەیاوناکەینە داوا جە حازم تەحسین بەگی کریان، کە بە پاو بەرژەوەندیی پەدەکەی نەجووڵیۊوە.

س.ز