لەقوو ڕەحاو کۊمەڵەو مافشناسا پەی ئازاڎی (ئۊهەدە)، جە چوارچوەو  دیدارینە چەنی زینڎانییا  جە زینڎانەکاو جۊروو تی ژمارەو یەکی و ژمارەو دووۍ ڕحای ڕاپۊرتێوەش وەڵا کەرڎۊ.  

ڕاپۊرتەکێنە ئامان، کە هۊڵو زینڎانو نۊعو تی ژمارە دووۍ ڕحای ئینۍ مانگێرتەینە و بارەو دیداریوە چەنی زینڎانیێوە  بە نامۍ ئەمین گولەری، کە بە ڕێژەو سەدەنە ٩٠ کەمئەنداما و بەشدارییش مانگێرتەکەینە کەرڎەن ئی زانیاریێشە ئەرەیاونێنێ:  

گولەر ئەرەیاونانش، کە یوەم ڕۊ کە دەسش بە مانگێرتەی کەرڎەن ڕاوەبەرایەتیی زینڎانەکەی بە بەهانۍ  'گەرەکمانە تۊ چێروو چەمداری و وشکناینە بی' کشا بییەن ڕوانەو ژووری تاکەکەسیش کەرا، وەلۍ دماتەر چا قەرارەیە پەشیمانۍ بیێنێوە. گولەر وستەنیچش ڕووە، کە بۊنەو مانگێرتەکەیشۊ، وەنەپەرسایوە دیسپلینیش چەنی کریان و دژو ئا قەراروو یەک مانگ بێبەشکەرڎەی جە چالاکییەکا دریان واتش، کە ئیساتۍ چەنی مەسعود دورموشی یەک هۊڵنە جە مانگێرتەی بەرڎەوامێنۍ.

فشاری دەرونی وزیۊ سەروو مانگێرتا

حەر چا ڕاپۊرتێنە ئامان، کە ئادۍ چەنی سەلامی چیفتچی زینڎانو ژمارە یەکو نۊعو تیچنە دیدارشا کەرڎەن. ڕاپۊرتەکێنە ئانە وزیان ڕووە، بارەو چیفتچیوە، کە بەشداریی مانگێرتەیش کەرڎەن، وەنەپەرسایوە دیسپلینی دەسش پەنە کەرڎەن، باسو ئانەیچە کریان، کاربەدەساو زینڎانی چیفتجییشا ناچار کەرڎەن، کە چەنی دەروونشناساو دلۍ زینڎانی کۊ بۊوە و چا ڕێوە هەوڵێشا دێنۍ، چیفتچی ڕازی کەرا واز جە مانگێرتەی بارۊ.

ڕاپۊرتەکێنە ئاماژە پانەیە کریان، کە دووۍ زینڎانیۍ تەرۍ بە نامەکاو ئایدن ئۊبا و قادر دەمیری جە هەمان زینڎاننە چەنی چیفتچی ماوەو چوار ڕوا دەسشا بە مانگێرتەی کەرڎەن.

دژو بەرڎەوامیی گۊشەگیریی ڕەهای جە دوورگەو ئیمراڵینە و چوارچوەو هەڵمەتەو 'ئازاڎیی پەی ئۊجالانی و چارەسەری سیاسی پەی پرسەو کورد'ی  ٢٧ی تشرینو دووەم/ نۊڤەمبریوە زینڎانییە سیاسییەکۍ زینڎانەکاو تورکیای و سەرنیشتوو کوردستانی دەسشا بە مانگێرتەی جە وارڎەی  کەرڎەن بەنۊرە و قەرارا مانگێرتەکەی تا ١٥ شوباتی، کە هاموەختا چەنی ٢٥ەمین ساڵیادو پیلانگێڵنیی میاننەتەوەیی دژو ڕابەرو گەلو کوردی عەبدوڵا ئۊجالانی بەرڎەوام بۊ.