دەوڵەتوو تورکی ئەرەگیری ماوەو چنڎین ساڵان بە گرڎ جۆرە چەکێوە قەڎەغەکریا پانیشت و ۋەرنیشتوو کوردسانی بۆردومان کەرۆ و زەرەرۍ فرەیچش بە ژیۋگەی یاۋنان و چالاکێوەیچ ئا هجوما بە جینۆسایدوو ژیۋگەی نامۍ بەرۆ و داوا کەرۆ بە یاسا ڕا جە دەوڵەتوو تورکی گیریۆ.
سۊچنای و بڕیەیۆ دارسانەکا، بە ئامانج گێرتەی رەز و باخ و لەوەڕگەکا و تێکدای هاناوەکا و بەکارئاردەی چەکی کیمیاۋیی و قەڎەغەکریا، بەشێوەنۍ جە پاشێلکارییەکا دەوڵەتوو تورکی ئەرەگیری دژوو سروشتی و ژیۋگەو کوردسانی کە چن ساڵێوەن بەردەواما سەروو ئا تاواناشە.
شکۆفە محەمەڎە چالاکەو بواروو ژیۋگەی و سەروو ئا قڕکاریەو دەوڵەتوو تورکی ئەرەگیری بە ئاژانسوو رۆژنیوزیش وات، "پێسە مزانیۆ قڕکەردەی نۊعش فرەن، تازەتەرین قڕکەردەی کە باس کریۆ یۊن جە تازەتەرین قڕکاریەکا کە سیاسەتش سەر کریۆ قڕکاری ژیۋگەیا، بڕۍ جە شارەزاکایچ بە ئیکۆسایدی ژیۋگەیی نامێش بەرا، ئی مژارە فرە مەترسیڎارا، بە تاییەت چی وەختەنە کە فاڕیای ژیۋگەیی جە مەنتیقەکەنە ڕووە مڎۆ، مشۊم ئێمە ۋێما پۍ وەرگیریکەردەی جە فاڕیایەکا ئاماڎە کەرمۍ، دەوڵەتوو تورکی و ئێرانی بە درۆن کوردسانی بۆردوومان کەرا".
باسش چانەیچ کەردەن، "بۆردوومانەکۍ بیێنۍ بە مەڵامەتوو زەرەرۍ فرە گۊرەی بە ئاژەڵداری و بەرهەموو ڕووەکە سرووشتیەکا، بە تایبەتی جە دارسانە چڕەکانە دووۍ پۍ چوار هەزارا ڕووەکۍ ۋێڕسکۍ و سرووشتیێش چنە مزیا، کە بەشێوەنۍ جە بژێوی ژیۋای خەڵکی، حەرپاسە بەشێوەتەرشا بەکار مەیا پۍ چارەسەرکەردەی نەوەشیەکا، گرڎ چێوۍ جە کوردسانەنە قڕ کریۆ".
ئا چالاکۍ داوا جە حکوومەتوو ناوەندی عێراقی و حکوومەتوو هەرێمی کەرۆ، کە "بە پاو دەستووری، سنوورێوە پۍ بۆردوومانەکا دەوڵەتوو تورکی بنیارە و جوابدایۆشا بۆ پۍ ئا پاشێلکارییا دەوڵەتوو تورکی کە ئەنجامشا مڎۆ".
