جە یوەمین ساڵیادو کۆچی دماییشەنە، دیڎارو ماموٙسا عوسمان محەمەەد هەورامی پەی ئەدەبو هەورامانی سەوای ڕوٙ شەممەی ٣٠/١٠/٢٠٢ی، جە شارو هەڵەبجەینە ملوٙنە ڕاوە. دیڎارەکە ماوەو ڕوێ مەخواینوٙ، سات ١٠:٠٠ بەیانی دەس پەنە مەکەروٙنە و ١٦:٠٠ دما نیمەڕوٙی متەمامیوٙنە.

بەپاو وەڵاوگەو هەورامانی، ئی دیڎارە چیٛرو چەمڎاری وەزیرو ڕوٙشنویری هەریٛمو کوردەسانینە، گلیٛرگاو مارگرێتی ڕیٛکوستەن. چی دیڎارنە بە بەشداری نویاسەرانو ئیدیم و ئەودیمو هەورامانی چندە جوٙیای(وشکنای) زانستییٛ سەرو ئەدەبو هەورامانی پیٛشکەش مەکریانیٛ.

یاگۍ باسین، گلیٛرگاو پەروەردیی مارگرێتی ڕێکوزو  دیڎارەکەی تایبەتەن بە هەرمان و کاری پەروەردەیی.

یاگیٛ دیڎاری: هەڵەبجە/ هوٙڵو موٙنوٙمێنتو شەهدانو هەڵەبجەی

سات: سات ١٠:٠٠ تا ١٦:٠٠ 

ئامای پەی گردین

یاگێ یادئاوەرییەن، عوسمان محەمەد هەورامی، کەسایەتی ڕۆشنویر، ئەدیب، مامۆسا و داناو هەرێمو هەورامانی، ساڵێ ویەردێ بەنەوشی کرۆنای کۆچی داییش کەرد. کۆچکەردە ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ.
کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێ چاپیەنێ.
هاوەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن.