دیاریکەردەی ۱ و ۲ نۆڤەمبەری کە پێسەو دوێ ڕوێ جیهانیێ پەی کۆبانی و ڕۆژاڤاو کوردستانی، سەلەمنای ئاڕاستییەنە کە کورد خاوەن ستاتۆ و هێزە و ڕۆڵەن و قۆناغی هەرێمیش ڕوو بە جیهانۍبییەی دەرباز کەردەن و نەک کەشەکێ، بەڵکو جیهانەنە فرێ دۆستێ و پەشتیوانێش هەنێ.
جە ۋیەردەنە، هەمیشە لایەنە بێگانەکێ نەخش و ڕۆڵشان پەی کوردی و شۆڕشێ و جمیەرەکێش کێشێنێ و دیاریێ کەردێنێ. هامکات جە هامکێشە هەرێمیێ و جیهانیەکانە کورد بێکاریگەر و پەراوێزوزیا بییەن، یان ئەگەر ڕۆڵێوش پنە دریا بۆنە ئامانجدار بییەن و هێزە هەرێمیێ و جیهانیەکێ پەی بەرژەوەندی وێشان بەکارشان بەردەن. یانی جە ڕاستینە هەر وەختێ گەرەشان بییەن بەکارشان ئاوردەن و هەر وەختێچ کارەکەشان پنە کەردەبۆن، دەستبەردارێش بینێ و ڕووبەروو نسکۆ و شکەستیشان کەردەنەوە. وەختێو گوزەر بە شۆڕشێ و سەرهۆردایە کوردییەکانەرە مەکەرمێنە، هەر زوو ئاشکرا مەبۆن کە هیچ یۆشان پەشتیش بە گەل و هێز و ئیرادەو وێش نەبەستەن و وابەستە بییەن بە هێزە بێکانەکان یان هێزە ئەرەگێرەکێ کوردستانی.
هەر پەوکەی هەمیشە مەواچیان: "بێجگە جە کەشەکان کورد هیچ دۆستێۋی تەرش نییەن.
ئی جۆرە بەکارئاوردەی کوردی و کێڵەکەردەی بە چارەنویسیش و پەراوێزوستەیش و پەشتی نەبەستەی بە وێ و گەلی بەردەوام بێ تا ئا کاتە کە جمیەری ئاپۆیی و پەکەکە بەرابەرایەتی (عەبدوڵا ئۆجالان)ی جە سەرنیشتو کوردستانی سەرشهۆردا و دەستبەکار بی. ئیتر شۆنیشەرە بارودۆخەکەشان هۆرگێناوە و پێچەوانەشان کەردەوە و جە ٤٠ ساڵێ ویەردێنە تا بە ئارۆ کورد جمیەرەکەشان کەرد بە خاوەن هێز، ڕێکوستەی و ستاتۆس و ڕۆڵ و کاریگەری و بە خەبات و کۆشای سەخت و بوردبارانە وردە وردە و قۆناغ بە قۆناغ کوردشان بە جیهانی ئەشناسا و دۆستێشان پەی پەیڎا کەرد و جە پەراوێزی ڕزگارشان کەرد.
بەتایبەتی جە دمای شۆڕش و سەرهۆردای وەرکەوتو کوردستانی (ڕۆژاڤا) و بە تایبەتی تەر جە دمای مدرامانو کۆبانی و دەستنیشانکەردەی ۱ نۆڤەمبەری بە ڕۆو جیهانی کۆبانی جە ۲۰۱٥نە و بەگردی جەدمای جەنگ و مدرامانی قارەمانەو ڕۆژاڤای بەتایبەتی تەر قارەمانی و بەشداری ژەنا جە شۆڕش و مدرامانە و جە ۹ ئۆکتۆبەر ۲۰۱۹یەنە دەستنیشانکەردەی ۲ نۆڤەمبەری بە ڕۆو جیهانی ڕۆژاڤای، ئیتر هەسارێ کوردی و دۆزەکێش جە ئاسمانو جیهانیەنە گەشیاوە و سەلەمیا نەک تەنها کەشەکێ بەڵکو دنیانە فرە کەسێ و لایێ دۆستێ کوردیەنێ. ئیتر جە وەرکەوتی میانی و جیهانەنە حسابی تایبەت پەی کوردی و جمیەرەکەیش مەکریۆن و ویر و ڕای جیهانی سەراپا و ١٨٠ پلێ دیدگاش وەرانوەر بە کوردی فاڕیا.
هەڵبەتە ئافاڕیایە جە هەڵۋێست و پەیلۋای جیهانیەکان ۋەرانۋەر بە کوردی جە وێۋە نە بییەن، بەڵکو هۆکارێش بێنێ. یۆ جە ئا هۆکارانە، شکستدای داعش جە ۲۰۱٥نە جە کۆبانی جە دمای مدرامانی فرە قارەمانانەی مێژوویی بێ کە دنیا پنەش سەرسام بی و ژەنی پێشەنگیش مەکەرێنێ. داعش کە ۋەڵتەر ڕووەش نیابیێ هەر شار و ناوچە و هەرێمێ، بەبێ ئاستەنگی و بە خێرایی مەگێرێشەرە، پێسەو نموونەی موسڵ و ڕەققا کە دووێ ناوەندێ گرنگێ ئێراقی و سوریای بێنێ و دەیان هەزار سەربازێ و چەکدارێ پارێزنێشان بەڵام چەتەکێ داعشی بە چەنڎ سەعاتێ گێرتێشارە و هێزەکێ ئێراقی و سوریا بەبێ ۋەرگیری شکست دریێ و هەرچی چەک و تفاقی سەربازی قورس و سوکشان بێ کەوت دەستو داعشی. داعش بە ئا چەک و تفاقە سەربازییە جە ۱٥و ئەیلولو ۲۰۱٥یەنە هێرشش کەرد سەرو کۆبانی، بەڵام بە مدرامانە مێژوویەکەو جەنگاۋەرانو ئازادی جە کۆبانیەنە نەک شکست بە داعشی دریا بەڵکو بی بەسەرەتاو کۆتایی ئاۋردەی یەکجارەکی بە داعشی و ماڕیای هەیبەتیشان جە ئێراق و سوریا و وەرهۆرزی دلین و جیهانەنە.
ئیتر شۆنەو دروسبییەی هێزەکی سوریای دیمۆکراتی - (قەسەدە)یەرە شەڕڤانەکێ قەسەدەی، یەکینەکی پارێزنانی گەلی - یەپەگە و یەکینەکێ پارێزنای ژەنێ - یەپەژە منبج، تەبقا و جە فیناڵەنە دێرزوور-شان جە داعشی ڕزگارێ کەردێ و ڕۆژاڤاو کوردستانی و وەرهۆرزو سوریاشان جە چەتەکان پاکێکەردێۋە و دەیان هەزار چەتێ و خانەۋادەکێشان بەدیلێ گێرتێ. ئانێچە شادمانی کوردی و جیهانیەکانش شۆنیەرە ئوما و چەنڎین قاتێ تەر ڕۆژاڤا و شەڕڤانەکێش بە دنیای ئەژناسێ و ۋەشەۋیستەرێ کەردێۋە. بەڵام ئەردۆغان و ڕژێمەکەش تۆڕێ و نیگەرانێ و غەمبارێ کەردێ، چونکە داعش جە جیاتی ئەردۆغانی و ڕژێمەکەش هێرشێ مەکەرێنێ سەرو ڕۆژاڤای و جە ڕاستیەنە شکستدای داعشی شکستدای ئەردۆغانی و ڕژێمەکەیش بێنە.
پۆکەی پەی تۆڵەکەردەی و جارێۋتەر زینڎەکەردەیەۋەو داعشی و قڕکەردەیی کوردی و فاڕای دیمۆگرافیاو هەرێمە کوردیەکان، ئەردۆغان فەرمانش دا تا ڕاستە ڕاست سپاو تورکیای هێرش بکەرۆنە سەرو ڕۆژڤای. دەرەنجام جە ۹ ئۆکتۆبەرو ئێساڵیەنە (۲۰۱۹) جە زەمین و ئاسمانەۋە بە بەشداری دەیان هەزارێ جە سەربازێ و چەکدارێ تاقمە چەتەکان و بە سەدان تانکێ و زرێپۆشێ و تۆپێ و ڕۆکێتێ هێرشەکە کەردەیی کریا. ئەمەریکا و ڕووسیا پەشتیۋانی هێرشەکەیشان کەرد و ئێران و سوریا بە هەڵۋێستی نەرم و شەرمنانە هێرشەکەشان ئەرێ کەرد. هامکات ئەمەریکا هێزەکێش جە سنور کێشتێۋە و دۆناڵد تڕەمپ سەرەککۆمار ئاشکراش کەرد، ئیتر وڵاتەکەش و ئیدارەکەش ئامادە نییەن ڕاگیری جە تورکیای بکەرۆنە و گەرەکش نییە ڕووبەرووش ببۆنەۋە. دیسان هەم تورکیا و هەم ئەمەریکا و ڕووسیا چەمەڕێ بێنێ ڕاۋەبەری وێسەری دیمۆکراتی ڕۆژاڤای و هێزەکێ قەسەدەی تەسلیمێ ببانە و کۆتایی بە ئازموونە سەرکەوتەکە ڕۆژاڤای بەیۆنە. بەڵام هەر پێسەو کۆبانی ئەی جارەیچە بە مردامانی قارەمانانە و سیاسەت و دبلۆماسیی ڕاست و دروست، ڕۆژاڤا و گەل و جەنگاۋەرەکێش پیلانەکەشان مایە پووچ کەردەۋە و ڕای گردیی ئەمەریکی و ئەورووپی و جیهانیش کێش کەرد مەیڎان و هەر کەس و لایێ دژبەری وێش پەی هێرشەکەی و سیاستو ئەمەریکای و سەرۆکەکەیش تڕەمپ-ی ۋەرانۋەر بە ڕۆژاڤای سەرکۆنە و شەرمەزار کەرد. دەرنجام تورکیا جە گلێرگەی میاندەوڵەتی و میاننەتەوەییەنە ڕووبەروو ڕەخنەی فرەی کریاۋە و فرە وڵاتێ بە تایبەتی ئەمەریکا سزێشان سەپنێ سەرشەرە و بە گردیی ئارۆ تورکیا و ئەردۆغان و ڕژێمەکەش پەراۋێزێ وزینێ و تورکیا جە بوارەکێ ئابوری، سیاسی و دبلۆماسی، کۆمەڵایەتییەوە ڕووبەروو دەیان قەیرانی چارەسەرنەکریێ و قوڵێ بییەنەوە و حکومەت و دەوڵەت یاوێنێ پەرتگا و هۆرشنیای.
هەڵبەتی ۱ و ۲ نۆڤەمبەری کەپێسە ڕوێ جیهانیێ کۆبانی و ڕۆژاڤاو کوردستانی دیاریێ کریێنێ، جە دیاری کەردەیشانە سەدان کسایەتیێ، ئەکادیمێ، ڕۆشنۋیریێ، سیاسیێ و چالاکۋانێ نامیێ جیهانی بەشدارێ بیێنێ. جە ئی چوارچێۋەنە ساڵانە جە سەدان شارێ و شارچێ کوردستانی و جیهان-یەنە سەدان هەزار کەسێ مجیارە شەقامێ و مەیڎانەکان و پەشتیۋانی پەی ڕۆژاڤای دووپات مەکەرانێوە و هاموەخت هێرشە ئەرەگێرەکێ تورکیای و تاقمە چەتەکانش بە تونڎی شەرمەزارێ مەکەرانێ. هەرپاسە داۋا جە گلێرگەو میاندەوڵەتی و میاننەتەوەیی و ڕای گردیی جیهانی مەکەرانێ تا سنور پەی ئەرەگێرتەیی و دڕندەیی تورکیای بنریۆرە و گرد لایێ پاڵپەشتی جە ڕۆژاڤای و مدرامانە ڕەۋاکەیش بکەرانێ کە دەستکەوتێ گەورێش پەی کوردی و نەتەوێ و ئاینێ و ئاینزاکێ ئا بەشەو وڵاتی و سەرنیشت و وەراسانو سوریای مسۆگەر کەردێنی و گرد پێوەرە و ئازاد و ئاشتیانە مەژیوانێ.
بەگردیی جە کوردستان و جیهانەنە هەم کورد و هەم دۆستەکێش هامتەریب چەنی مدرامانو ڕۆژاڤاو کوردستانی، شەۋانە ڕۆو جە مەیڎانەنە بێنێ و هەنێ و چالاکییێ و ناڕەزایەتیشان ئەنجامێ دێنێ و مڎانێ. هاموەخت بایکۆتکەردەی کاڵا و بەرهەمە تورکییەکان بە تایبەتی جە پانیشتو کوردستانی و بە گردی جە کوردستان و چەنڎین وڵاتێ عەرەبیێ و جیهانیەنە ڕێکۋزیان و تا ملۆنە بایکۆتەکە فراوانتەر مەبۆنەۋە و کاریگەریەکێش مەزنتەرێ مەبانێۋە. سەرجەم ئینێ و مدرامانە شکۆمەندەکەو ڕۆژاڤای ئاشکراشان مەکەرانێ و سەلەمنانێش کە؛ "کورد نەک تەنها کەشەکێ، بەڵکو جە دنیانە فرە کەسێ و لایەنێ کاریگەرێ دۆستێشەنێ و ئیتر کورد کوردو جارانی نییەن و ئارۆ خاوەن ئیرادەن و شکست قبوڵ نەکەرەن و قۆناغی هەرێمیش ڕوو بە جیهانۍبییەی دەرباز کەردەن و جە ناوچەکەنە نەک پەراوێزوزیانییەن، بەڵکو نەخشەکێش و ڕۆڵگێری سەرەکی و دیاریکارەن و بەبێ حساب کەردەی پەی کودی ئاستەمەن پلان و کاروبار جە ناوچەکەنە سەربگێرۆن".
