نوێنەرو سەرۆکو ڕوسیای پوتین تایبەت بە سوریای، ئەلێکساندەر لاڤرێنتیڤ جە ٢٢ ەمین گلێرۆبیەو ئاستانەینە قسێش کەردۍ و ئەرەیاۋناش ئۆپراسیۆنە سەروازییەکەو تورکیای سوریانە جە لایەنو مۆسکۆیۆ قبووڵ نمەکریۆ.

لاڤرێنتیڤ قسێش چنی سپۆتنیکی کەردۍ و جوابو ئا پرسیارێشە داوە کە "مۆسکۆ چنی تەماشەو ئۆپراسیۆنە سەروازییە تازەکەو تورکیای مکەرۆ کە قەرارا سوریانە دەس پنە بکەرۆ؟' جە جوابەنە واتش: "ئێمە ئینەی قبوڵ نمەکەرمۍ، ئێمە فرەو وەختی ئینەما واتەن. سەرەڕاو گرڎ چێوۍ، هیواڎارێنمۍ دۆڵەتو تورکی چی هەنگامێشە پاشەکشە بکەرۆ. چونکی ئۆپەراسیۆنەکە دەرەنجامی خراپش مەبۆ".

نوێنەرەکەو پوتینی ئەرەیاۋناش ئۆپەراسیۆنو تورکیای ئاژەکەی چارەسەر نمەکەرۆ و گرفتەکا قووڵتەر مکەرۆوە، واتش: "قەیرانۆو سەر سنوورو ئیسرائیل_لوبنانی چارەسەر نەکریان، دەسپنەکەردەو ئۆپەراسیۆنێوە چی هەلومەرجەنە کاریگەریێوە خراپش بۆنە. ڕەنگە ڕێکوزیێکۍ پېسە هەیئەت تەحریر ئەلشامی ئیسفاڎەش چنە بکەرا".

سەرۆک کۆمارو تورکی تەیب ئەردۆگان جە مەراسیمو ١٠ و تشرینوو دووەمینە قسێش کەردۍ، جە قسەکاشەنە ئاماژەش بە ئەنجامدای ئۆپەراسیۆنێوە تازەی جە سوریانە کەرد.

جە جوابو پرسیارەو "ئایا ڕووسیا چنی ئیدارەی تازەو ئەمریکای دەربارەو پرسو سوریای گفتوگۆ مکەرۆ؟" لاڤرێنتیڤ ئەرەیاۋناش جە سەردەمو سەرۆکایەتی ترامپینە ئاماڎەن چنی واشنتنی دەربارەو سوریای گلێرۆبیەی بکەرا. ئەگەر واشنتۆن پێشنیارێوە بکەرۆ، ئانە ڕووسیا هۆرسەنگنای پەی پێشنیارەکەی مکەرۆ و بە ئەگەرێوە فرۆ جوابێوە ئەرێنی مڎۆوە.