مەجلیسو پارتو ژیوای ئازادی کوردەسانی (پەژاک) سەپناو سزاو جەقەنارەدایش سەرو وەریشە مورادیێرە شەرمەزارکەرد و ئەرەیاوناش، بڕیەیۆ ئا سزێ بە ماناو پاگیری کۆمارو ئیسلامی ئێرانین سەرو جەنگی دژو ژەنا.
جە ئەرەیاونێوەنە مەجلیسو پەژاکی بڕییەیۆ سزاو جەقەنارەدای پەی وەریشە مورادیێ (جوانا سنە)یۍ چالاکۊو مافەکا ژەنا و ئەندامەو گلێرکەو ژەنا ئازادی وەرکەوتو کوردەسانی (کەژار)یش شەرمەزار کەردەن و ئا سزێشە بە هرووژمۍ پەی سەرو تەمامو گلێرکەی و گەلو ئێرانی نامێ بەردەن.
دەقو ئەرەیاوناکەو پەژاکی پی جۆرەنە:
"هامڕا وەریشە مورادیە (جوانا سنە) ڕۆو ٢٠و خەزەڵوەری ١٤٠٣ (١٠و تشرینو دووەمو ٢٠٢٤) جەلایەنو دەسەڵاتو دادوەری سیستەمو سەرکۆتکەرو ئێرانیۆ بە قەرارێ دژو ژەنا و دژو ئینسانی، سزاو جەقەنارەدایش سەرەرە سەپیا. ئینەیچ کاتێنە کە دەسەڵاتی دادوەری رژێمی جە ئەرەنیشتەو دۆسیەکەینە مافو ۋەرگری جە وێکەردەی ئازادانەی رەوایش بە هەڤاڵ جوانۍ نەڎان. مەجلیسو پارتو ژیوای ئازادی کوردەسانی (پەژاک) بڕیەیۆ ئا سزا ستەمکارانێشە پەی هەڤاڵ جوانە سنەیێ بە تنی شەرمەزار مکەرۆ و ئا سزێ پێسەو دایوەنەو گورزێ جە تەمامو گلێرکەی و گەلا ئێرانی منریۆرە.
کردەوێ بێباکانەو سیستمو کۆمارو ئیسلامی ئێرانی جە بەرکەردەو سزاو جەقەنارەدای پەی تێکۆشەرا و چالاکوانا، ئارۆنە بە ئامارۆو یاگێ داخو پەژارەی بەردەواما. سزاو قەنارەی ئانەی دژە مرۆڤانەن، ئانەیچ دژو ژەنان و سیستمو ئێرانی بە ئاراسەو جەنگی دژو گلێرگەی بێباکتەر مکەرۆ. ئی هەڵوێسە دژە گلێرکەی و دژە ژەنانیەو سیستمو ئێرانی چارۆنە بییەن بە مژارۍ بەردەوامو گەرمو جەهانی و جە کاتێنە هەڵمەتۊو زینانیا سیاسی سەرەڕاو بییەو پەشتیوانی جەماوەری و پاڵپەشتی ئازادیوازا بە دروشمۆو "نا پەی قەنارەی" بەردەواما، بەڵام ئامادە نییا پەی ساتێ بێ وەرانوەرو کاروەدای جەماوەری و میاننەتەوەییەکا پاشەکشێ مکەرۆ و دەستبەردارو ئا کردەوا بۆ. بی دژایەتی کەردەی ژەنا و سەپنای قەنارەیە، بە ئاشکرا ئەرەیاونانش، کە پاگیرانە گەرەکش نیا دەنگو خەڵکی و گەلا بشنەۆنە، جە هەمان کاتەنە هەوڵەکاش پەی کپکەردەی دەنگو خەڵکی شکسش ئاردەن و ئی ڕێشە گێرتێنە وەر بەرەو هۆروێڵیای و دلێنەشییەین.
بەرکەردەی سزاو قەنارەی پەی هامڕێما جوانا سنەیۍ سەلەمنەرو جەنگو دەسەڵاتین جە دژو گلێرکەی مەدەنی و گەلا و بە دڵنیاییۆ ۋنەکۆتەیۆ قورسش بۆ، چونکی زەرەرە کاولکارییەکێش بەرۆکو گردو گلێرکەی گێراوە. ئی سیستمە مشۆم بزانۆ کە کاتێنە قەیرانە سیاسی، ئابوری و کۆمەڵایەتیەکێ جە ئاستێ تۆقنەرەنە کەڵەکەبیێنێ، بە پەنابەردەی پەی دیپلۆماسی و نەرمی برمانای جبەرۆ و سەرکورت کەردەی بێبەزەییانەی بەردەوامی جە دلێینەنە دوور جە گرد بەهێوە مرۆیی، مەتاوۆ ئەنجامو دەسەڵاتوازەکا پێکۆنە. ئی رێبازە مەترسیڎارە، رێک پەلکێشکەردەو گردو گەلا ئێرانین بەرەو لێوارو هۆروێڵیای، هەرپۆکەی جەلایەنو گەلا و کۆو گلێرکەیۆ ئی کردەوێ وهەڵسوکەوتە و سیاسەتێ مایەو قەبوڵکەردەی نییەنێ. گەلا ئێرانی چی بارۊ و جە قۆناغێ هەنوکەیینە چنین جارۍ دەنگو داواکاریشا یاونان بە گۊشو جەهانی. بەرکەردەو سزاو جەقەنارەدای پەی زیندانیا سیاسی، ئانەش سەلەمنان کە سیستمو ئێرانی بەردەوام ویر جە حەقکەردەیۆ جە شۆڕشو "ژەنی، ژیوای، ئازادی" مکەرۆوە و ئینەش جە وەڵینەو هەرمانەکاشەنە نیانەرە.
بێگومان ئی پەیامە ئینا پەشتەو بەرکەردەی سزاو جەقەنارەدایۆ پەی هامڕا جوانۍ، بریتین چانەیە کە ئی دەسەڵاتە پاگیرانە گەرەکش نیا دەسبەردارو هەڵوێسەکاش پەی دژایەتی کوردی بۆ و ویستو ئانەیش نییا پەرسو کوردی بە رێوە جگە جە جینۆسایدی کولتوری، قەنارەدای و سەرکوتی چارەسەر بکەرۆ. هەرپۆکەی وێش جە گرد جۆرە ڕاچارێ دیموکراتیکی دزۆوە. بە دڵنیاییۆ چنەکەوتەی قووڵ و دژوارو ئی رەوتە نادیموکراتی و نامرۆڤانەیە زەبرێ قورس جە کۆڵەکۍ بە ستەم هۆرچنیاکا سیستمەکەی مڎۆنە. کەواتە مشۆم بزانۆ کە گلێرکە دیاردێوە نییا کە بە ئاسانی پی رەفتارە تنوتیژا چەمتەرس کریۆ و وێش دۆ دەسۆ. ئی شۆڕشەو گلێرکەو ئێرانی بەئیرادێ هێقمۆ هەوڵو ئاردەی دی و داواو ئازادی مکەرۆ، ئنە گولانە نییا کە بی رەفتارە تنوتیژا سەرکوت بکریۆ. هەرپۆکەی ئاژەی سیاسی هەنوکەیی جە ئێرانەنە ئینا ئاژۍ یەکجار هەستیارەنە و گرلێوە وزۆ چێرو تەرسۍ. هەرپۆکەی پارێزناو ئی جەهانیە سەڵتەنەوازیە کە ویر جە ڕای سەرکوتکارانەی و سەپنای قەنارەی مکەرۆوە، پەی کۆمارو ئیسلامی ئێرانی محاڵ بۆنە، چونکی ئانەی لایەنی وەرانوەرشا؛ گلێرگەن.
مەجلیسو پارتو ژیوای ئازادی کوردسانی (پەژاک) سەرەڕاو شەرمەزارکەردەی کردەوەکا رژێمی سەرو بنەماو سەپنای سزاو قەنارەدای سەرو هامڕا جوانا سنەیێرە، داوا جە گردو گلێرکەی ئازادیوازی، دیموکراسی وازو، ژەنا و جوانا مکەرۆ کە پێسەو گرد وەختێ بە هەڵوێسی کۆششکارانەشا، دژو سزاو جەقەنارەدای هەڵوێسی ڕۆشنشا بۆنە. حیچ گومانەش چنە نیەنە کە هەڵمەتە میاننەتەوەییەکا و کاروەدای کرداری رێکوزیای مافو مرۆڤی پەی چالاکی و هەوڵەکا گلێرکەو ئێرانی پەی رزگاربیەی جە گرد جۆرە ستەمێ و بەدەسئاردەی ئازادی، قەوەتتەر مکەرۆ. ئێمە پێسەو پەژاکی پەشتیوانی جەگرد هەڵمەتێ و کەمپینەکا مکەرمێ کە تا ئیسە دژو یاساکا و سزاکا قەنارەی رێکوزیێنێ و هەرپاسە پاڵپشتی هەوڵەکا گردو ژەنا و جوانا و گلێرکەی پەی ئازادی هامڕێما جوانا و هەڵوێسما چا رووانگۆ ڕۆشنا. بەرکەردەی گرد سزێوە قەنارەی بە ماناو رەڎکەردەیۆ گردو داواکارییەکا و ئازادیوازی گلێرکەو ئێرانی و بەتایبەتی ژەنا و جوانان. کەواتە بەشداربیەی جە مېڎانەکا ئەرەکۆشاینە ئەرکو گرد لێوەن و پەنەوازا مېڎانەکا ئەرەکۆشای بە چالاکی بەردەوام و ڕوانە چالاکوانێ و تەمامو گلێرکەی پەڕ جۆش و خرۆش بکریۆ.".
