ڕژێمە ئەرەگێرە و دژە کوردەکەو تورکیای کە جە ئیسەنە هامپەیمانی فاشست، چەتەگەر، دکتاتۆری و ڕەگەزپەرستی (ئاکەپە-مەهەپە)ی دەسەڵاتدارشەن، هەنگام بەهەنگام و قۆناخ بە قۆناخ پیلانەکێش دژ بە کوردی کوردستانی کەردەیی مەکەرۆن. 

"زیندەکەردەی خەلافەتی عوسمانی و میساقی میللی"

ئا ڕژێمە چەتەگەرە جە چوارچوەو زیندەکەردەی خەلافەتی عوسمانی و (میساقی میللی)یەنە، گوڕش دان بە هێرشێ هەمەلایەنێ تەرسناکێ دژ بە بییەی کوردی و کوردستانی و کێشای نەخشەی و ئەرەمتەی پیلانێ جۆراوجۆرێ کە دەرەنجام قڕکەردەی کوردی و ئەوەسڕیەی کوردستانیش شۆنیەرە بەیۆن. بەگردی ئامانج ئانەن تا ٢٠٢٣ کە ساڵیادو ١٠٠ ساڵەو (سایکس- پیکۆ)یەن، نەخشە و پیلانەکێ کۆتاییشان بەیۆنە.

"پەدەکە، ئەنەکەسە، داعش، جبهەت ئەلنوسرە، ئەلقاعدە و بەنامێ ئۆپۆزسیۆنی سوری هامکارێ (ئاکەپە-مەهەپە)یەنێ"

ڕژێم پەی کەردەیی کەردەی نەخشە و پیلانەکێ وێش، سود جە هامکاری و پەشتیوانی و ئاسانکاری (پەدەکە)ی تاقمە چەتەکێ سەر بە ئا پارتەیە چوون: (هێزەکێ زێرەڤانی،گۆڵان، پاراستن، ڕۆژ و ئەنەکەسە)ی هۆرمەگێرۆن. هامکات تاقمە چەتەکێ سەر بە (داعش، ئەلقاعدە، بەنامێ ئۆپۆزسیۆنی سوری) پێشەنگی کێشای نەخشەکەی و جابەجاکەردەی پیلانەکانێ. ڕژێم جە سەرەتاو شۆڕش و سەرهۆردای سوریای جە ٢٠١٢، ڕاستە ڕاست دەشتش دان جابەجاکەردەی نەخشە و پیلانەکانو وێش. 

"تاقمە چەتە هامکارەکێ تورکیای کامێنێ"

ڕژێمو تورکیای، جە ئا سەردەمەنە تا بە  ئارۆ چەندین جۆرێ جە تاقمە چەتەکانش بەنامێ جیاوازێ دروستێ کەردێنێ کە ئینە نامێ بەشێشانێ: 

سوپاو فەتح-ی

سوپاو فەتح-ی تاقمگەلێوی چەتێنێ چەنی ڕژێمو سوریای و هێزەکێ سوریای دیموکراتیکی ئینێ جەنگەنە. جە ٢٠١٥نە چەندین تاقمە چەتێ کە گرنگتەرینێشان برێتینێ جە "ئەحرار شام، توگای حەق، جیش ئەلسونە، ئەجناد ئەلشام، فەیلەق ئەلشام و جەماعەت ئیمام بخاری" بە پشتیوانی تورکیا چێرو چەترەو سوپاو فەتح-ی کۆبێوە و دەرەنجام بە پەشتیوای تورکیای و ئەمەریکای و ئەورووپای پارێزگاو ئیدلیب-یشان کۆنترۆڵ کەرد.

هەیئەت تەحریر ئەلشام

دمای ئانەیە جەبهەت ئەلنوسرە سەر بە ئەلقاعدەی چوون تاقموێوی تیرۆریستی ئەشناسیا، جەبهەکە خێرا نامەکێش فاڕا پەی نوسرە، جەبهەت ئەنسارەدین، جەیش ئەلسونە، فەیلەقی نورەدین زەنگی و دەرەنجام چوون هەیئەت ئەلتەحریر ئەلشام وێش ئەشناساوە.

بەرەو ئازادیوازی سوریای

دمای ئانەیە ڕژێمو سوریا جە پانیشت وڵاتی، بەتایبەتی جە هەرێمەکەێ دەرعا، قەنیترە، غوتە و قەلەمون-ش کۆنترۆڵێ کەردێوە و بەشێو جە گروپە چەکدارەکان شیێ ئیدلب و جە بە پێشەنگی تاقمە چەتەکانو نورەدین زەنگی و ئەحرار ئەلشام-ی پێوەرە بەرەو ئازادیوازی سوریا-شان دروست کەرد.

بەرەو ئازادی نیشتیمانی

تاقمە چەتەکێ فەیلەق ئەلشام، شەهید ئەلئیسلام، جەیش ئەلنوخبە، جەیش ئەلسانی، فیرقەی حوریە، فەوج ئەلئەوەل و ئاخیرین، جەیش نوسرە، فرقە ئیدلب پێوەرە کۆبیێوە و بەرە ئازادی نیشتیمانی-شان دروست کەرد.

چەکدارە ئەوەمەنەکێ داعشی

تاقمە ئەوەمەنەکێ داعشی چوون، ئەنسار ئەلتەوحید، جەش ئەلملاحم، جوند ئەلشەریعە، ئەنسار ئەلحەق، فەیلەقی ئەبوبەکر سدیق، جەش ئەلبادیە، جەش ئەلساحل، سریە ئەلغوربە، سریە ئەبوعبێدە جەراح کۆبیێوە و  حوراس ئەلدین-یشان دروست کەرد کە مای داعش بە توندڕەوتەرین گروپی تیرۆریستی مشناسیانە.

حزبی ئیسلام تورکستانی

حزبی ئیسلام تورکستانی کە ئەندامەکێش خەڵکو کۆمارە تورکەکانو ئاسیای میانی-یەنێ و جە ناوچەو خسر ئەلشغور-و ئیدلب هێزشان هەن و کاریگەرێنێ. ئی تاقمە چەتە چەکدارەکێشان بەشداریشان جە جەنگەکانو سوریایەنە کەردەن و چەکدارەکێشان وەڵتەر فێشتەر دلێ داعش-یەنە بیێنێ.

چیچانیەکێ

چیچانیەکێ جە تاقمەکانو موهاجرین، سوپای ئەنسار، جوند ئەلشام، جەیش عەسرا و ئەجناد ئەلقەفقاز-ی پێکمەیانێ و تاقمگەلێوی توندڕەوێ و چەتەگەریەنێ و ڕووسیا بە بییەیشان جە سوریا فرە قەڵس و بێزارەن و ئاواتەوازەن هەرچی زووتەر دلێنەبەرۆنەشان.

سوپاو نیشتیمانیی سوری

ئی سوپا کە بەنام سوپاو سوریای ئازاد-یچ جە وێش مەگێرۆنە، گرنگتەرین تاقمە چەتەن کە ڕاستەڕاست ڕژێمە ئەرەگێرەکەو ئەردۆغانی پەشتیش پنە مەبەسۆنە و ئامرازێوی هەرزان و بەکرێگیریان پەی کەردەیی کەردەی فراوانوازی و سەپنای هەگەمون و ئەرەگێرتەیی ئا ڕژێمیە جە ڕۆژاڤاو کوردستانی و سوریایەنە. ئی تاقمە چەتە جە جەرابولس، باب، عەزاز، عەفرین، گرێسپی و سەرێکانی و چەنڎین ناوچێ تەرێنە دژ بە کوردی جەنگیێنێ و پەی ئەرەگێرتەی ڕۆژاڤای سورەو وەرلەشکرەکەو تورکیای بیێنێ و تا ئارۆچ هەمان ڕۆڵ و مسیۆنشان هەن و دەیان کەردێ قێزەونێ و دژە ئانزانیێشان وەرانوەرو کوردی ئەنجامێ دێنێ و سەڕەڕاو تاڵانکەردەی یانەوبان هاوڵاتیان و شوێنای ژیوگەی و ئاسەوارەکان، داردەستی سەرەکی بییەن پەی فاڕای دیموگرافیاو ڕۆژافای و بەزۆر کۆچ پنەکەردەی خەڵکەکەیش و ئاوردەی خەڵکی بێگانەی سوری، عەرەبی، تورکومانی، چیچانی و ئیغوری و ئاسیای میانی پەی یاگێشان.

دلێ ئی بەنام سوپاو نیشتیمانیی سوری-یەنە ژمارێو تاقمێ چەتێ هەنێ کە ئینێ گرنگ تەرینێشانێ:
فەیلەق ئەلشام
،فرقەت ئەلحەمزە
ئەحرار ئەلشەرقیە
جەیش ئەلئەحرار
 توغاو سوڵتان مورادی
،توغاو سەڵاحەدین ئەیوبی
.ئەحرار ئەلشام
حەرەکەت ئەلحەزیمەی نورەدین زەنگی
سوپاو ئیسلامی
سوپاو وجائدینی
توغاو فاروقی
حەرەکەت ئەلموجاهیدینی
توغاو فاتح سوڵتان محەمەدی
توغاو سەمەرقەندی
حەرەکەت ئەلشامیە
سەربازێ ئەلشومال ئەلعەزازی
حەرەکەت ئەلنەخبە

"زیاتەر جە ۱۰۰ هەزارێ چەکدارێ چەتێ جە ئیدلب و شارە ئەرەگێریاکێ ڕۆژاڤای مۆڵێ دریێنێ"

جە ئیسەنە باس جە زیاتەر جە ۱۰۰ هەزارێ چەکدارێ چەتێ دڕندێ و توندڕەوێ و سەدان هەزارێ جە ئەندامێ خانەوادەکانشان مەکریۆن کە تورکیا جە ئیدلیب، عەفرین، جەرابولس، باب، سەرێ کانی، گرێ سپی یاگەگیرێش کەردێنێ کە وەڵتەر شارێ و ناوچەکێ سوریای چوون (حەما، دەرعا، قەنیترە، دیمەشق، غوتە، حەلەب، ڕەققا، دێرزوور و تەدمر) بێنێ و بە فیت و پیلانەو ئەردۆغانی چەنی ڕێککەوتەی و هەماهەنگی کەردەی چەنی ڕووسیای، دیمەشق، ئەمەریکای جە ٢٠١٢ وە تا ٢٠١٩ فاڕیێنێوە پەی ئدلب، حەلەب و شار و ناوچەکێ ڕۆژاڤاو کوردستانی. 

"دەیان هەزارێ جە چەکدارە چەتەکان بیانیێنێ"

ئی چەکدارە چەتێ هەزارانشان (ئەورووپیێ، ئەمەریکیێ، ڕووسیێ، چینیێ، ئاسیای میانیێ، ئەفریقیێ، ئاسیایێ، تورکێ)نێ و ڕژێمە فاشیست و دکتاتۆریەکەو (ئاکەپە-مەهەپە)ی دژ بە ئەورووپای بە تایبەتی و جیهانی بەکارشان مەبەرانێ و جە ڕاشانەوە هەڕەشێ جە ئاساییشی ئەورووپی و جیهانی مەکەرۆن.
جە ئی چوارچوەنە، ژمارێوشان ڕەوانێ وڵاتانو ئەورووپای و جیهانی کریێنێ و جە ٢٠١٢وە تا ٢٠٢٠ دەیان کەردێ چەتەگەریێشان بە تایبەتی جە ئەورووپا ئەنجامێ دێنی کە سەڎان قوربانیێشان ونە کەفتێنێوە کە دمایینێشان کەردە تەرۆرستیەکێ ئی دماییە فەڕەنسای و نەمسای بێنێ کە چەنڎین کەسێ کوشیێ و سەرە بڕیێ و چەنڎینێ تەرێچ بریندارێ کریێ. سەرجەم ئا کەردە چەتەگەرییە تیرۆرستیێ جە دمای ئانەیە ئەنجامێ دریێن کە سەرچەتە ئەردۆغان هەڕەشێش کەردێنێ. ئانەیچە نیشانەش مڎۆنە کە ڕاستە ڕاست ئەردۆغان چەتەکان ئاڕاستێ مەکەرۆنە وبە فەرمی وێش سەرچەتەشانە.

"تاقمە چەتەکێ چارەنویسشان چێش مەبۆن"

بەڵام بە تەماشاکەردەی ڤییەرەکێ ئیدلب-ی و سوریای و وەراسانی میانی (ڕۆژهەڵاتی ناوین) و بارودۆخو خراپو تورکیای و شکستەکێ ئەردۆغانی جە دلێ تورکیا و ناوچەکە و جیهانەنە، هامکات بەخێرایی ئەوەگێڵای هێزەکێ ئەسەدی پەی ناوچەکێ ئدلبی و شکستدای تورکیای و تاقمە چەتەکانش جە ئا شارەنە، پاسە دیارەن کە زوو یان دێر ئدلب کە فرەتەرین چەتێ و خانەوادەکێشان دلێشەنە نیشتەجێکریێنێ، جەلاو دەسەڵاتداری شامی و بە پەشتیوانی ڕووسیا و ئێرانی کۆنترۆڵ بکریۆن. بەڵام ئەگەر ئانە ڕووەشدا ئایا تاقمە چەتەکێ و خانەوادەکێشان چارەنویسشان چێش مەبۆنە؟ ئایا وێشان مڎان بەدەستەوە؟ یان تا دمایی مەنجەنگان؟ یاخود دەربازێ تورکیای مەبانێ؟ یان جە بازاریێوی تازەنە دەربازێ ناوچە ئەرەگیریاکێ ڕۆژئاڤای مەبانێ؟ یان دەرەنجام میانەشان چەنی تورکیای تێکبشۆنە و چەنی هەنتری بگژیانێ؟ یان تورکیا هەوڵ بڎۆنە دەربازێ وڵاتانێوی تەری چوون لیبیا، ئازەربایجان و قەرەباخ-یشان بکەرۆن؟
شارەزێ و پسپۆڕێ بوارەکەی ئینێ جە ئا باوەڕەنە کە سەرجەم سیناریۆ و ئەگەرەکێ بە ئەوەکریای ئازیێنوە و ڕەنگەن هەر ئان و سات یۆشان ڕووە بڎۆنە، بەڵام جە سەرجەمشانە تاکە زیانمەند و قوربانی هەرزان و بێبایەخ تاقمە چەتەکێ و کەسوکارشانێ و بەشێوازێ جیێ جیێ دلێنەشیەیشان حەتمیەن و چارەنویسی فرە سیاو چەمەڕاشانە کە بیێنێ بە ئامرازێوی سوک و هەرزان دەستو (ئەردۆغان)ی و هەر جارەو بەشێوازێو بەکارشان ماوەرۆن.

"تورکیا جە ئیدلیب چارەنویسش چێشەن"

بێگومان پەی هەر کەس و لایێ ئاشکران بە سیاستە هەڵەکێ ئەردوغانی و دارودەستەکەیش، تورکیا جە سوریا بە گردی و ئیدلب-بەنە بە تایبەتی گرفتار کریان و ئینارە دلێ زەلکاوێ هەسێنە ڕوو بە نوقم بییەن و هامکات کەوتەن میانەو تەوەن ئاسیاو ڕووسیای و ئەمەریکای بەردەوام هاڕانەش. جە هەمچنینن بارۆدۆخێوەنە تورکیا و ئەردۆغان دۆڕیێ یەکەمێ مەباننێ و ئایندە و چارەنویسی سیاو چەمەڕاشانە. بەدڵنیایەوە تورکیا و تاقمە چەتەکێش جە ئدلب-ـنە چارەنویسێوشان چێش ببۆنە، بێ هیچ دوەدڵی و گومانێوە جە عەفرین، باب، جەرابولس، سەرێکانی و گرێ سپی چەنڎین قاتێ زیاتەر چارەنوسی بەڎتەر چەمەڕاشانە. بەگردی پەی تورکیای ڤییەر و ڕوودایەکێ تەنها بە ئدلب و سوریایەوە نمدرانێوە و بێشک زوو یان دێر دەربازێ تورکیای ببانێ و جە بناغەوە پێکامای کۆمەڵایەتی، سیاسی، ئیداری و جوگرافی و ئابوری وڵاتەیە بلەرزنۆنەوە و هۆرشبشانۆنەوە و بارودۆخێو شۆنەو وێشەرە باوەرۆنە کە هیچ کەس و لایێ ویرشەرە نەئامابۆنە و ببۆنە بەسەرەتا پەی کۆتایی ئامای تورکیای.

"پیلانەو دەسەڵاتداری (ئاکەپە-مەهەپە)ی پەی ڕزگاربییەی جە چەتەکان و باردۆخەکەی چێشەن"

تورکیا کە جە مەتەرسی بارودۆخەکەی یاوانانە، پەی وێ ڕزگارکەردەی جە زیاتەر ١٠٠ هەزار چەتێ و خانەوادەکانشان، دوێ ڕێێ زیاتەرێش نییەنێ وەردەمەنە. یەکەم، کیاستەی چەتەکان پەی وڵاتێ ناوچەکەی و جیهانی کە بە کەردەیی ئانەش دەست پنەکەردەن و هەزاران چەتێش ڕەوانێ لیبیا، ئازەربایجانی و قەرەباخ (ئارتساخ) ی ئەرمەنۍنشینی کەردێنی. بەڵام پەی تورکیای ڕای یەکەم چارەسەری تەمام نییەن و نمەتاوۆنە دەیان هەزار چەتێ و خانەوادەکانشان ڕەوانێ وڵاتان بکەرۆن، پەوکەی ڕای دووەمینە بە چارەسەر مەوینۆنە، کە جە ٢٠١٢وە هەوڵو کەردەیی کەردەیش مڎۆنە کە ئاڎیچ وێش جە فاڕای دیموگرافیاو کوردستانی و دروستکەردەی زۆنی پەی چەتەکان مەینۆنەوە.

"فاڕای دیمۆگرافی کوردستانی و دروستکەردەی زۆنی پەی تاقمە چەتەکان"

بە پاو پیلانە و نەخشەڕایێ کە ئەردۆغانی و ڕژێمە فاشیستو دژە کوردەکەو (ئاکەپە-مەهەپە)ی ئامادە کەردەن، سەرجەم تاقمە چەتەکێ و خانەوادەکێشان جە ئدلب و سوریاوە بە هەماهەنگی چەنی ڕووسیا، سوریا و ئەمەریکا و ئەورووپای بفاڕیانێوە پەی زۆنێوی کە جە عەفرین دەست پنە مەکەرۆن و تا برادۆست درێژ مەبۆنەوە و ناوچێ شارەکێ (عەفرین، شەهبا، باب، عەزاز، جەرابولس، کۆبانێ، گرێ سپی، سەرێکای، عامودێ، قامشلۆ، دێرک،خاپور، زاخۆ، باتیڤا، دەرکار عەجەم، بامەڕنی، ئامێدی، دێرەلوک، شیلادزێ، بارزان، سیدەکان، برادۆست و قەندیل) جەوێش مەگێرۆن کە چەنڎ بەشێ زۆنەکەی جە عەفرین، عەزاز، باب، شەهبا، جەرابولس، گرێ سپی و سەرێکانی بە کەردەیی ئەنجام دریان و ڕژێمو ئەردۆغانی هەوڵ مەڎۆنە بە جە زووتەرین وەختەنە بەشەکێ تەرێ زۆنەکەی بە ئەنجام بیاونۆنە.

"جیا جە نیشتەجاکەردەی چەتەکان، ئامانج جە زۆنەکەی چێشەن"

جیا جە نیشتەجاکەردەی چەتەکان  و وێ ڕزگارکەردەی جە بارودۆخەکەی، ئامانج جە دروستکەدەی زۆنەکەی یەکەم، فاڕای دیمۆگرافی ناوچەکەیەن کە ئەرەنیشتەکێش کوردێنی. دووەم ئەرەبڕیەی یەرێ بەشێ کوردستانییەن جە یەکتری. بە جۆرێ کە ئەگەر دروستکەردەی زۆنەکە تەمامیۆنە، ئاوەختە سەرنیشت (باکور)و کوردستانی، جە پانیشت (باشور)و کوردستانی و وەرکەوت (ڕۆژاڤا)و کوردستانی بە تەمامی مەبڕۆرە و هامکات باشور و ڕۆژاڤاچ پەی هەمیشەی جە هەنتری مەبڕیانێرە. ئا وەختە ئیتر سەرزەمێنوە یەکپارچە بەنامێ کوردستانی کۆتاییش پنە مەیۆنە و ڕژێمە ئەرەگێرەکێ کوردستانی بە تایبەتی تورکیا، ئیتر بە ئاسانی زاڵێ مەبانێ سەرو کوردی و جمیەرە ئازادیوازەکەیشەرە و هەمان پیلان و نەخشە پەی فاڕای دیمۆگرافیای مەفاڕانێوە پەی شارێ و ناوچەکێ دلێ کوردستانی و قۆناخ بە قۆناخ ئا قڕکەردەیە کە دژ بە کوردی و کوردستانی دەستش پنەکەردەن بە ئامانج بیاونانێ و کوردیچ چوون فرێو جە گەلێ ناوچەکەی و دنیای پەی هەمیشەی قڕێ بکریانێ و بسڕیانێوە.

"پەدەکە هامکاری تورکیای پەی قڕکەردەی کوردی و دلێنەبەردەی کوردستانی مەکەرۆن"

ئانەکە یاگێ نیگەرانییەن و مایەو ئەنەیاوای نییەن و هەرس کەردەیش سەختەن، پەی کەردەیی کەردەی ئی پیلان و نەخشەیە کە ئامانجش قڕکەردەی یەکجارەکی کوردی و دلێنەبەردەی کوردستانیەن، پەدەکە و بنەماڵەو بارزانی هامکاری و پەشتیوانێ سەرسەختێ ئەردۆغانی و دەسەڵاتداری (ئاکەپە-مەهەپە)یەنێ و بە گرد شێوازێ دژ بە کوردی و جمیەرە ئازادیەکەیش بە ڕابەرایەتی پەکەکە-ی مدرێنوە و بەکەردەیی جە ساڵەو ١٩٩١یەوە تا بە ئارۆ بیێنێ بە چەمساخێ تورکیای پەی ئەرەگێرتەی کوردستانی و جە ئی چوارچێوەنە هامکاری ماددی، سەربازی، سیخوڕی و مانەوی نەمەندەن دژ بە پەکەکە-ی پێشکەش بە تورکیاش نەکەرانێ. بەتایبەتی چەنی دەستبەکاربیەی مەسرور بارزانی، بە سەرۆکوەزیرو هەرێمو کوردستانی ئا هامکارییە یاوان قولە و بەرزتەرین ئاست.

"پەکەکە ئاستەنگی سەرەکین وەردەمو نەخشە و پیلانەکەیەنە"

هەم تورکیا و هەم پەدەکە، پەی کەردەیی کەردەی نەخشە و پیلانو فاڕای دیمۆگرافی کوردستانی و دلێنەبەردەی کوردی و دروستکەدەی زۆنی پەی تاقمە چەتەکان، پەکەکە-ی بە ئاستەنگی یەکەمین مەوینانێ، هەر پەوکەی پێوەرە دژوارتەرین هێرشێش مەکەرانێ سەرش و هەوڵ مڎانێ سەرو ڕاو وێشانەوە لاش بڎانێ. بەڵام شارەزێ بوارەکەی بەدوورش مزانانێ تورکیا و پەدەکە جە یاوای بە ئامانجەکەیشان سەرکەوتێ ببنانێ، چونکە ڤییەرەکێ ٤ ساڵێ ویەردەی بەگردی و ئی ساڵێ دمایەیە سەلەمنانشان پەکەکە هێزێوی جە بن-نەئامان و  هێرش و پیلانێ نەمەندێنێ دژش تاقیێ نەکریێ بانێوە، بەڵام سەرجەمشان شکستشان واردەن یان ڕاستەر پەکەکەی شکستێ دێنێ. پۆکەی ئیجارەیچ ئاستەمەن پەدەکە و تورکیا ئامانجەکەیشان بپێکانێ. 

"هامکاری کەردەی تورکیای دلێنەشیەی پەدەکە-ی و بنەماڵەو بارزانیش ونە بگنۆنەوە"

چەمدارێ و شارەزێ بارودۆخەکەی باس جە ئانەیە مەکەرانێ،  پەدەکە و بنەماڵەو بارزانی بە هامکاری کەردەی تورکیای جە گرد حاڵەتێوەنە سەرەڕاو زیان یاونای بە کوردی و کوردستانی، دەرەنجام دلێنەشیەی وێشان شۆنیەرە بەیۆن. چونکە ئەگەر تورکیا سەربگنۆنە ئاوەختە جە پەدەکە-ی و بنەماڵەو بارزانی قبوڵ نمەکەرۆن پێسەو ئارۆی سەردارێ و بکوشێ و ببڕێ کوردستانی ببانێ و حەسەن خەیری ئاسا سزاشان بڎۆنە و دلێنەمەبەرۆنەشان. خۆ ئەگەر تورکیا بە هەمکاری پەدەکەی و بنەماڵەو بارزانی سەرنەکەوت و پیلان و نەخشەکەشان بە ئامانج نەیاوا، ئا وەختە گەل جە پەدەکەی و بنەماڵەو بارزانیش قبوڵن مەکەرۆنە و سزاشان بڎۆنە.

"جمیەری ئازادی وازیارەن پەدەکە و بنەماڵە واز جە هامکاری؟و خیانەتی باوەرانێ"

سەڕەڕاو سەرجەم ئی هامکاری و خیانەتەیە کە پەدەکە و بنەماڵەو بارزانی دژ بە کوردی و پەکەکەی پێشکەش بە تورکیاشان کەردەن و مەکەران، جمیەری ئازادی بە ڕابەرایەتی ڕێبەر ئاپۆی و پەکەکەی، بوردبارنە و وەرپرسیارانە و خەموەرانە هەمیشە وازیار بییەن تا پەدەکە و بنەماڵەو بارزانی جە هامکاری کەردەی تورکیای و خیانەتی پاشگەزێ ببانێوە و بگێڵانێوە ڕیزەکێ گەلی و نیشتمانی و مەتەرسیەکێ و دەرەنجامە خراپەکێ هامامکاری کەردەیشان چەنی تورکیا پەی شەی کەردێنێوە و وستێنشان وەرو چەماشان و وشیاریشان دان: ئی جۆرە جە هامکاری وەڵێ گرد کەس و لایێوە زیان بە پەدەکەی و بنەماڵەو بارزانی بیاونۆنە و بە گوزەرێوی خێرا بە ڤییەرەکێ ویەردەی و مێژوو کوردیەرە و جەدا دای شێخ عەبدولسەلام بارزانی جە موسڵ جە لاو جە تورکە عوسمانیەکاوە ئاڕاستیە خاستەر سەلەمیۆنە. 
وەڵیناچ فەرماوانشان: "هەزار ساڵێ بکەری بێگانە پەرستی، سەرەنجام مشیۆم باوەری نوشستی".