رۆنامەکە جە زۋانوو ۋەرپەرسا ئێرانیوە وەڵاش کەردەنۆ، کە جە گەڕوو یووەم و ئەرەنیشتەکەیشانە جە مانگەو کانوونوو دووەم و ئێساڵینە ئەمریکا داواش جە تارانی کەردەن، کە هەیمەنەو ۋێش سەروو حوسیەکارە بەکاربارۆ پۍ ئانەی دمایی بە هجوومەکاشا پۍ سەروو کەشتییە بازرگانییەکا جە بەحروو سوورینە بارا.

ئانەیچ وزیان ڕووە کە قەراربیەن گەڕوو دووەم و ئەرەنیشتەکەی جە مانگەو شوباتینە بلۆڕاوە، بەڵام بەمەڵامەتوو چڕبیەیۆ حۊڵەکاو ئەمریکای پۍ دمایی ئاردەی بە جەنگوو بەینوو ئیسرائیلی و غەزەی ئا ئەرەنیشتەیە پەنهانیۍ دما کۊتێنۍ.

فایەنشاڵتایمز وەڵاش کەردۆ، جە ئەرەنیشتەکانە برێت مەکگۆرک راوێژکاروو کۆشکەی چەرمۍ پۍ هەرمانووکاروو ۋەرکەوتوو دلێڕاسەی و ئابرام پیلی نوێنەروو ئەمریکای پۍ هەرمانوو کار و ئێرانی بە نوێنەرایەتی واشنتۆنی بەشدارێنۍ و حەرپاسە جە لاو حکومەتوو تارانیچۆ عەلی باقری کەنی گۆرە ۋەرپەرسوو ئەتۆمی بەشدارا و ئەرەنیشتەیەکۍ بە ناڕاسەوخۆ و بە میانچیکەری ۋەرپەرسا عوومانی ملاڕاوە.

ۋەرپەرسا تارانی و واشنتۆنی نەشارانشاوە، کە جە ڕاو بڕۍ کاناڵاوە پەیوەندی بە یۊترینیۆ کەرا و پەیام فاڕاوە.

ساڵەی ۋیەردۍ دمایین ئەرەنیشتەو بەینیشا جە مانگەو ئایارینە ئەنجامدا و جە ئاکاموو ئا ئەرەنیشتەیەنە ئەمریکا جە مانگەو ئەیلولینە شش ملیارۍ زەڕی دەس سەرەرە گیریاو ئێرانیش ئازاڎ کەرد.

هاموەخت جە چن مانگی ۋیەردەنە ئێران خێرایی پیتنا و ئاستوو چڕی یۆرانیۆمیش کەمکەردەنۆ و ئینەیچ بە دەرەنجاموو بەردەوامی ئەرەنیشتەیە پەنهانیەکا چنی ئەمریکای منریۆرە.