شاندی مېیاننەتەوەیی کە جە لایەنو پلاتفۆرمو ئازادی و ئاشتی ئۊروپایۆ جە چوارچێوەو هەڵمەتۊو "گەرەکما چنی عەبدوڵا ئۆجالانی دیدار بکەرو"، کە ماوەو ٢٦ ساڵان ئینا زینانو تاکەکەسینە و گۆشەگیرکریان، سەرشا ۋنەو تورکیای دا.

شاندەکە جە ٣٩ ئەنداما پێکئاما بې کە، پەرلەمانتارې، ئەکادیمیسیانې، پارێزنەرې، ئەندامې سەندیکاکا و ڕۆنامەنوویسا بێنې. هەرپاسە ڕیناتۆ فرانزێتا، نوێنەرو مېیاننەتەوەیی کۆنفیدراسیۆنو کرێکارا کۆباسی، کە شارو پالێرمۆو ئیتاڵیاینە درێژە بە چالاکیەکاش مڎۆ و ڕەگەزنامەی فەخریش بە رابەر ئاپۆی بەخشان، بەشدار بې.

فرانزێتا جە چەمپنەکۊتەیێنە چنی ئاژانسوو هەواڵو فوراتی (ANF) جەختش چانەیە کەردۆ کە پارادایمو کۆنفیدرالیزمو دیموکراتیکو ڕابەر ئاپۆی جە ۋەرا ۋەر بە سیستەمو سەرمایەداری، لیبڕاڵی و پیاسالارینە، تەنیا چارەسەرا.

'ڕەڎکەردەیۆ داواو ئۆجالانی جە لایەنو دۆڵەتو ئیتاڵیایۆ خیانەت بې'

ڕێناتۆ فرانزێتا ئەرەیاۋناش، "بەپەیلواو ئېمە ڕەڎکەردەیۆ مافو پەنابەری عەبدوڵا ئۆجالانی جە ئیتاڵیا، تەنانەت بە بیەو کۆمۆنیستەکا جە حکومەتو ئیتاڵیاینە، خیانەتێوە بې، چونکی وەزیرو دادو ئا وەختیە بە تایبەتی ۋەرپەرس بې یاگێوە پارێزیا بە ئۆجالانی بڎۆ، بەڵام ئا هەرمانێشە نەکەردە، جە جوابو ئی خیانەت و بێ کەرامەتیەینە، جە ئاکامو ئا ئەوەکۊشاینە چنی هەمڕاکام ئەنجامما دان، جە ٢٠١٥ قەرارما دا جە پالێرمۆ و ئۆرلاندۆنە، ڕەگەزنامەی فەخری بە ئېژا ئۆجالانی بەخشمېنە."

'جەکاتو پرۆسەو کۆبانێنە، سەروازې تورکی ڕاشا نەڎا جە سنوورەنە پڕمێوە، چەکشا ڕووەمارە بەرزکەردۆ'

فرانزیتا بە ئاماژەدای پا حەقەتینەی کە ساڵۊو ٢٠١٤ – ٢٠١٥ جە کاتو هرووژمو داعشی پەی سەرو کۆبانێنە، چنی شاندێوە جە پالێرمۆوە لوێبێنې پەری چەمڎاریکەردەی پێشئامایەکا ڕووەشا کەردێبې ناوچەو پێرسوسی، جە ڕحا و سەروازې تورکیای ڕاشا نەڎا بې سنوورەنە پڕاوە و تەنانەت چەکشا ڕووەشارە بەرزکەردەبێوە.

فرانزیتا ئەرەیاۋناش، چا کاتەنە پڕۆژەو واڵە و برایەتی و دۆسایەتیی جە بەینو پالێرمۆ-پێرسوس-کۆبانێنە بە دەسوەڵێوستەی شارەوانی پالێرمۆی پەی کەردەیۆ کۆریدۆرێوە هامکاری مرۆیی پەی کۆبانې دەسشپنەکەردەبې، بەڵام ئاڎ تەنیا دماو ئانەی پەی کۆنفڕانسێوە، تاوانش بلۆ پەی کۆبانې.

'کۆنفیدرالیزمو دیموکراتیکی تەنیا چارەسەری پراکتیکییا جە ۋەرا ۋەرو سەرمایەدارینە'

فرانزیتا  واتش: "ویرۆکەو ئېژا ئۆجالانی جە بارەو کۆنفیدرالیزمو دیموکراتیکی کە ئازادیی ژەنې و واڵە و برایەتی گەلا جە ڕانوماییەکا کۆمۆنینە بەبنەما گێرۆ، بە تەنیا چارەسەر موینو پەی قەیرانەو قووڵو سەرمایەداری، چا ڕوانگۆ مۆدێلو کۆنفیدرالیزمو دیمۆکراتیکی تەنیا چارەسەری پراکتیکییا پەی کێشەکا جە گرڎو جەهانینە."

'شۆڕشو ۋەرنیشتی دەرفەتێوەن پەی ۋەرکۊتوو مېیامینی'

فرانزیتا بە جەختکەردەیۆ سەرو گرنگی ئا پرۆسەیەی کە جە تورکیانە دەسشپنەکەردەن و بە ۋەرچەمگېرتەی پێشئامایەکا ۋەرکۊتوو مېیامینی، ئەرەیاۋناش کە بانگەوازو ڕابەر ئاپۆی و دمایئاردەی بە ڕێبازو کۊششو چەکڎاری جە لایەنو پەکەکەیۆ هەنگامېوە شۆڕشگێڵنانێنە. فرانزیتا ئاماژەش پانەیەدا کە "بانگەوازو ئاشتی و گلېرگەی دیموکراتیک" بەتایبەتی پەی ۋەرکۊتوو مېیامینی دەرفەتێوە گۊرەن و واتش؛ "پېسە چنی جە شۆڕشو ۋەرنیشتینە دیما کە مۆدێلێوە سیکۆلار سەرو بنەماو فکرەکا ئېژا ئۆجالانی وەش بیەن، کە بە سەرمەشقایەتی ژەنا ملۊڕاوە و پەی گرڎو گەلان، بەتایبەتی دژو تنوتیژی ئایینی یان زایۆنیستیا کە جە ۋەرکۊتوو مېیامینینە سەرش هۊردان، شۆڕشو ۋەرنیشتی مۆدێلێوە گرنگا و ئینە پەی گرڎو ناوچەکەی دەرفەتێوە گۊرەن."

هر پېسە وەڵتەر ئاماژەم پنەدا، پێکئامای فرەچەشنی کۆنفیدرالیزمو دیموکراتیکی چارەسەرێوە گرنگا جە ۋەرا ۋەرو سیستەمو سەرمایەداری لیبراڵینە. ڕانوماییەکې ئازادیی ژەنې کە ئېژا ئۆجالان بە پەنەوازش مزانۆ پەی گەشەپنەدای گلېرگەی، ئاراسێوە فرە ڕاس و گرنگا.

ئەجۊمەنە ئېژا ئۆجالان پا مەڵامەتۆ جە لایەنو سیستەمیوە زینان و ڕووبەڕوو گۆشەگیری کریانۆ، چونکی دژە ژەعرێوەن پەی سیستەمو سەرمایەداری، لیبڕاڵی، پیاسالاری و بناژۆوازا ئایینی جە ۋەرکۊتوو مېیامینینە. پۊکەی گلېرگێوە دروس مەشۆم پێکئامایې کۆموناڵی بۆ کە گەل ڕاوەبەرش بکەرۆ. پەنەوازا پیاسالاری، سەرمایەداری و دۊڵەتی هۊرشێونمېوە."

'پەی باسکەردەی سەرو ئاشتی حەقەتینەی مەشۊم ئۆجالان و گرڎو زینانیا سیاسی ئازاڎې بکریا'

ڕێناتۆ فرانزیتا، جەختش چانەی کەرڎۊ کە ئەر بەڕاسی باس جە ئاشتی حەقەتینەی مکریۆ، مەشۆم گرڎو زینانیا سیاسی، بە تایبەت ڕابەر ئاپۆ، ئازاڎې بکریا و ئەرەیاۋناش: "ئێمە شایەتې هەوڵێوە تاکلایەنەو جمېیەرو کوردینمې جە پرۆسەکەنە. بەڵام جە لایەنو دۆڵەتو تورکیایۆ هەنگامېوە جددیە نەنریێنە، ئەر بەڕاسی گەرەکمانە باس جە پرۆسېوە حەقەتینەو ئاشتی بکەرمې، مەشۆم گرڎو زینانیا سیاسی چنی ئېژا عەبدوڵا ئۆجالانی، سەلاحەدین دەمیرتاش، فیگەن یوکسەکداغە ئازاڎې بکریا."