فەرماندەیی یەکینەکا پارێزناو وەرکەتوو کوردەسانی (یەرەکە) بە پەیامێوە گەشمەرڏە ئارگەش هۆرامانیش یاڏوستیمێ کە ٢٢ ی ئادارو ٢٠٢٥ ینە جە هەرێمو خواکوڕکینە گەشمەرڏەبی.

پەیامو یەرەکەی پی جۆرەنە:

"سەرەتا پێسەو یەکینەکا پارێزناو وەرکەوتوو کوردەسانی بە ئەشنەوییەو گەشمەرڏە ئارگەش هۆرامانی فرە خەمگینێ بییەیمێ و هامبەشو خەمو گەلوو هەورامانینمێ و سەرەوەشی جە بنەیانەو هەمرایا ئارگەش هۆرامانی مکەرمینە.

هەڤاڵما ئارگەش هۆرامانی با هەستۆ ژیوێ کە حەر جە یوەم روۆ گەریلێکێش ئشناسێنێ و تا دمای با هەستۆ ژیوان. ئا هەستەشە جە یاڏ نەکەرڏەن و بە پێچەوانە پێسەو گەریلێوە دڵسۆزو هێڵو ئاپۆیی، هەمیشە جە کەسێتی وێشەنە ئی هەستەشە گۆرەتەر کەرد و ئەزموونش کەرد.

گەشمەرڏە ئارگەش نزیکەو ١٠ ساڵا جە خەباتو وەرکەتوو کوردەسانی هەرمانەش کەردێنە، یاگێ وێش دڵو هەمڕێیاشەنە کەردەنۆ، فیکر و فەلسەفەو ڕابە ئاپۆیش بە گرڏیما یاونا. بەبێ مرڏای شەو و ڕۆ هەرمانەش کەردە، عاشقو ژیواو گەریلایەتی بێ، گرڏ کاتێ جە یاگە زەحمەتەکا گەریلایەتینە کەرێ.

گەشمەرڏە ئارگەش خاوەن تایبەتمەندییێ فیداکار و ڕەنجدەری بێ، سادە و خاکەڕای بێ. با کەلتوورەی جە یانە و هەرێمو هۆرامانیۆ دەسش کەوتەبێ، بە ئشناسا و ڕابەر ئاپۆی، گرڏ کاتێ پێسەو دەروێشێ ژیوای کەرێ و جە هەلومەرجی حەرە سەختەنە بە مەعنەوییەتێ بەرزۆ ژیوایش کەرد و بڕواش پینەیە بێ.

ئێمە فرە خاس زانمێ گرڏ کەسێ بە شنەویۆ گەشمەرڏەبییەو گەشمەرڏە ئارگەشی فرە خەمگین بیێنێ. پێسەو هەڤاڵا گەشمەرڏە ئارگەش هۆرامانی، تا دمای بەردەوامێ بیمێ جە بەرزڕاگێرتەو ئا پێوەرا کە گەشمەرڏە ئارگەش بەبنەماش گێرتەن دلێ وێشەنە پەرەش پنەدان.

سەرو ئی بناغەیە دیسان سەرەوەشی جە بنەیانەو هەڤاڵ ئارگەش هۆرامانی و گرڏو هەرێمو وڵاتپارێزو هۆرامانی مکەرمێنە. تا دماین شۆنکەوتە و هێڵەو گەشمەرڏا بیمێ و حەجگیز کەسێتی چی جۆرە جە ڕیزەکا ئێمەنە جە یاڏ مەکریۆ".