فیستیڤاڵی کولتووری سلێمانیینە بەردەواما
فیستیڤاڵی کولتووری پارکوو ئازادیی شاروو سلێمانیی پانیشتوو کوردستانینە پەی بۆ ماوەو حەفتێوە بەردەواما.
بە ئامای فەسڵوو هامنی سازدای فیستیڤاڵە کولتوورییەکا فرە بۆ، چونکوم گەلوو کوردستانی ساعیبوو کولتوورێوی دۆڵەمەندیین گردوو ڕووەکاو ژیوایوە. چی چوارچوەنە فیستیڤاڵی کولتووری شاروو سلێمانیینە ڕۆو ٢٥و حوزەیرانیوە دەسش پەنە کەردەن و تا ٢ێ تەمووزی بەردەواما. گرد ڕوێ وێرەگانە شەوێ دێرێ فیستیڤاڵەکە هەن و بە واردە کوردەوارییەکا و هەرمانە دەسییە کولتورییەکا ئینا خزمەتوو هاموەڵاتانە.
فیستڤاڵەکەنە ژەنێ فرێ بە نیشانەدای هەرمانە دەسییەکاشا و ئەدێ بە وەشکەردەی واردە وێمانەکا بەشدارێنێ فیستیڤاڵەکەنە.
بەشدارێوە فیستیڤاڵەکەی ئاماژەش دا کە ئی فیستیڤاڵێ ساڵانە چەنی ئانەیە فرسەتێونێ پەی ژەنا و گەنجا تا بتاوا ئیسفادە جە بەبازاڕکەرەی واردەی و هەرمانە دەستییەکاشا بکەرا، جە ڕووێوی تەریچۆ جەختکەردەیوەن جە تەندروسی و پاکیی واردە وێمانەکا چەموو بەرهەمە ئامایەکارە، کە بیێنێ بایسوو ژەعراویکەردەی ژیوگەی و ئینسانی و سروشتی پاکوو کوردستانی.
