پەرلەمانتاراو فراکسیۊنوو چەپی جە پەرلەمانوو ئەورووپاینە نیکۊلای ویلیۊمسێن، میگوێل ئوربال کریسپۊ، مالین بژۊرک، جە فراکسیۊنوو سەوزەکانە فرانچۊیس ئالفۊنسی، جە فراکسیۊنوو سۊسیالیستی وەڵێکەوتەیوازی کۊستاس ماڤریدێس و ئەندامی سەربەوۍ فابیۊ ماسیمۊ کۊستالدۊ سەبارەت پا ورچنیایا کە سەوای  تورکیانە و سەرنیشتوو کوردسانینە کریا، قسێشا کەرڎە.

وەروو ئانەی تورکیانە دیموکراسی چەسپنیۊ و دمایی بە ڕژێموو ئەکەپە-ئەرڎۊغانی بۍ، پەرلەمانتاراو ئەورووپای داواشا جە گەلاو تورکیای کەرڎە، کە بلا سەروو سندوقەکا و دەنگ بدا بە پارتوو چەپی سەوزی.

دوور نییا ئەرڎۊغان پەنا پەی گەمەی قێزەونی نەبەرۊ

نیکۊلای ویلیۊمسێن واتش، کە جە ٢٠ ساڵی ویەرڎەنە ئانە کە سەرۊککۊماروو تورکیای "تەیب ئەرڎۊغان"ی کەرڎەنش نادادپەروەریێوە گەورەن و واتش، "دیما ئا سیاسەتمەدارۍ ڕەخنەشا جە ئەرڎۊغانی گێرت وزیۍ زیندان، ڕۊنامەوانۍ، سەندیکاکاو کرێکارا و بە هەزاران ئینسانۍ تەنیا وەروو ئانەی بەئازاڎانە ڕاو وێشا بەرە وستێنە، کریێنۍ زیندان. هومێدەوارنا خەڵکوو تورکیای بلا سەروو سندۊقەکا و ئایندەو وێشا ورچنا. وەڵتەرۍ دیەنما کە ئا وەختۍ ئەرڎۊغان تەنگاو بۍ پەنا پەی چیشی بەرۍ. دیما وەروو ئانەی هێزوو ڕیفراندۊمی گێرۊ دەسۊ پەنا پەی چ ساختەکاریێوە بەرۍ، تەماموو چەمدارە بەیننەتەوەییەکا بە وێچمۊ ئانەما بە ڕۊشنی و ئاشکرایی دی. گومانەو ئانەی هەنە کە ئەرڎۊغان جارێوە تەر پەنا پەی گەمەی قێزەونی بەرۊ.

گەلۍ یارۍ و ئازۍ تورکیای ئەرڎۊغانی مردنا

 گەلاو تورکیای ئی جارەیچ چێوی پێویس کەرا. من چێوە گەرەکما پەیاموو پەشتیوانیی وێم پەی گرد لایۍ بیاونوو، مشۊم گرد لایۍ مافوو دیموکراتیکوو وێشا بەکار بارا و بەدڵنیاییوە دەنگ بدا. بەتایبەتیچ گەرەکما پەشتیوانیم پەی پارتوو چەپی سەوزی بەروزوو، هومیدەوارنا دەستکەوتەکاو ئا گەلەیە گەورۍ با".

پەی دیموکراسی مشۊم گردما دەنگ بدەیمێ

یۊ تەر جە ئەنداماو پەرلەمانوو ئەورووپای ئیدۊیا ڤیلانۊڤا واتش، پەی تورکیاێوە دیموکراتیکی ئادۍ پەشتیوانی جە پارتوو چەپوو سەوزی کەرا و ئاماژەش پانەیە کەرد، کە پێسە پارتوو پۊدێمۊسی ئیسپانیای و ئەنداماو فراکسیۊنوو چەپی ئادۍ تورکیانە با وەروو ئانەی جە نزیکۊ چەمداریی ورچنیەکەی کەرا. ڤیلانۊڤ پێسەیچ واتش: "ئی ورچنیەیە پەی دیموکراسی جە تورکیانە فرە گرنگا. بەتندی پەشتیوانی جە پارتوو چەپی سەوزی کەرمێ".

ئالفۊنسی: مشۊم بەرنامەی سەرەکیی هەرمانەو حوکمەتی تازەی ئازاڎیی عەبدوڵڵا ئۊجالانی بۊ

فرانچۊیس ئالفۊنسی واتش تورکیا لاو ئەورووپایۊ وەڵاتێوە گرنگا و واتش، "بارەو تاکە ڕابەروو  گەلوو کورڎیوە بەڕێز"عەبدوڵڵا ئۊجالان" نیگەرانی هەنمۍ. پەوکاتەی هومێدەوارێنمۍ کە ئازاڎیی ئادی بۊ بە بابەت و پەرسەی سەرەکییەو حوکمەتی ئایندەی".

پەی ئایندێوە بەبۍ ئەرڎۊغانی، پەشتیوانی جە پارتوو چەپی سەوزی کەرڎێ

میگوێل ئوربان کریسپۊ باسش چانەیە کەرد، کە ئەرڎۊغان پەی پارێزنای ڕژێمەکەیش، دایمە پەناش پەی جەنگی بەرڎێنە و واتش: "پەوکای مشۊم خەڵک دەنگ بە پارتوو چەپی سەوزی بدا. پەی ئایندێوە بەبۍ ئەرڎۊغانی بلا سەروو سندۊقوو دەنگدای و پشتیوانی جە پارتوو چەپی سەوزی کەرا".

پارتوو چەپی سەوزی نوێنەرایەتیی ئایندەو دیموکراتیکوو تورکیای کەرۊ

مالین بژۊرک داواش جە گردوو خەڵکی کەرڎە کە دەنگ بدا بە پارتوو چەپی سەوزی واتش: " پەی ڕیفۊرمی و چاکسازیی دیموکراتیکی ئانە فرە گرنگا. ئێمە وەڵاتێوەما گەرەک نییا کە ئۊپۊزسیۊنی وزۊ چێروو فشاریوە، وەڵاتێوەما گەرەک نییا کە ئەرەیاونایەکا وزۊرە و هجووم کەرۊ سەروو مافوو ژەنا. جە دژوو ئیدارەە دژەدیموکراتیکوو ئەرڎۊغانی پارتوو چەپی سەوزی نوێنەرایەتیی ئایندەو دیموکراتیکوو تورکیای کەرۊ. وەروو ئانەی قۊناغوو ئاشتینە جە مەنتێقەکەنە دەس پەنە کەرۊ بەدڵنیاییوە پەشتیوانی جە پارتوو چەپی سەوز کەرمێ".

ورچنیەی گرنگیێوە تاریخییش هەن

کۊستاس ماڤریدێس دەسنیشانش کەرد، کە ئا ورچنیەیۍ جە تورکیانە و سەرنیشتوو کوردسانینە کریا، گرنگیێوە تاریخییشا هەن و داواش  جە گرد کەسۍ کەرڎە، کە پەی ئایندەو گەلی دەنگوو وێشا بە پارتوو چەپی سەوزی بدا.

س.ز