هامسەرۆکۊو دەسەو تەندروسی کانتۆنو فوراتی عەزیزە ئیبراهیمە ئەرەیاۋناش کە دۊڵەتو تورکی مەدەنیۍ و ئامبۆڵانسەکا بە ئامانج مگێرۆ و واتش: "ۋەرو ئانەی ئامبۆڵانسەکۍ مکریا ئامانج نمەتاومۍ زامڎارەکا ڕەوانەو خەسەخانەی بکەرمۍ".
دەسەو تەندروسی کانتۆنو فوراتی دەربارەو هرووژمەکا دۆڵەتو تورکی ئەرەگیری پەی سەر وگەلو بەنداوو تشرینی ئەرەیاۋنێوەش ۋەناوە. ئەرەیاۋناکەی سەرو بەنداوو تشرینیۆ ۋنیاوە، چالاکا سەرو بەنداوەکەی بەشدارۍ بێنۍ.
هامسەرۆکۊو دەسەو تەندروسی کانتۆنو فوراتی عەزیزە ئیبراهیمە ئەرەیاۋناکەش ۋەناوە و واتش: "پېسە گەلوو کانتۆنو فوراتی پەی پارێزنای بەنداوو تشرینی جە هێزیۆن ئینایمۍ چۍ. دۊڵەتو تورکی بە تۆپ، هاوەن، فرۆکەی جەنگی هرووژم مکەرۆ سەرو گەلی مەدەنیی. جە هێزیۆن ژمارەو زامڎارا یاوان نزیکەو ٤٠ کەسا. تا ئیسە ٥ کەسۍ گەشمەرڎۍ بیێنۍ. دۊڵەتو تورکی مەدەنیۍ و ئامبۆڵانسەکا بە ئامانج مگێرۆ. چۍ زامڎارۍ هەنۍ و ئاژەو ئاڎیشا خراپا. داوا جە ڕای گرڎیی جەهانی مکەرمۍ پەی ئانەی بتاومۍ زامڎارەکا ڕەوانەو خەسەخانەی بکەرمۍ با ئامبۆڵانسەکێما نەکریا ئامانج".
ئەرەیاۋناکەی بە بەرزکەردەیۆ دروشمۊو "بژیۋۆ مڎرامانوو تشرینی" دمایش ئاما.
