چالاکیی ئیشکگێریی دادپەروەری کە بنەیانەو زیندانییا بە داواو ئازادیی جەسەیی ڕابەروو گەلوو کوردی عەبدوڵا ئۆجالانی و چارەسەری سیاسیی پەرسەو کوردی بە ڕای دیموکراسییانێوە دەسشا پەنە کەرد، شارەکاو ئێلح، ئامەد، مێرسین، ئیزمیر، مێردینینە بەردەوامییش هەن.

ئێلح

ئیشکگێریی دادپەروەری بە سەرمەشقایەتیی توای دەر، دەسش پەنە کەرد، ٢٩هەمین ڕۆشنە بارەگاو دەبەپەو شارەکەینە بەردەواما. نوێنەراو ڕێکوزیا مەدەنییەکا و لایەنە سیاسییەکا سەرێ چالاکا مدا. هەرپاسە هامسەرۆکەی گردینوو دەم پارتی تولای حاتەم ئۆغڵارییە سەرێ چالاکاش دا.

 ئەنداماو مەجلیسوو ئەدایاو ئاشتی نوران سەچکینە واتش، گەرەکشا نیا کە کەس مرۆ و داواو ئاشتیی کەرا. هەرپاسە گەرەکمانە گۆشەگیری ورگێریۆ و کوردێ یۆی گێرا.

هاتیمۆگولاری هەرپاسە جە سەردایەکەیشنە کۆشیای ئەدایاش بە گرنگ نامێ بەرد و واتش، کە پێویسا داواکاو گەلوو کوردی بژنەویا. هەرپاسە ئاماژەش پانەیە دا کە پێویسا هێزە دیموکراتیکەکێ پەی ماڕای گۆشەگیری درێژە بە کۆشیایشا بدا.

چالاکییەنە بەردەوام دروشموو "ژەنی، ژیوای، ئازادی"، "بژیوۆ مدرامانوو زیندانییا"، " بێ سەرۆکی ژیوای مەبۆ" و "بە مدرامان سەرێ گنمێ" وچیێنێوە.

ئامەد

چالاکیی ئیشکگێریی دادپەروەری کە ئامەدنە دەسش پەنە کەرد، بە هەمان داواکاری جە ڕۆو ٨٧ ـە مینینە بارەگاو دەم پارتیینە ڕێزاننە بەردەواما. باڵکۆنوو چالاکییەکەینە نویسیاێوە گەورە بە نامێ "جە ئەدا قارەمانەکاوە هەزار سڵامێ پەی زیندانەکا" و "بە قوەو وێما گۆشەگیری ماڕمێ و ژیواێوە ئازاد بنیات منیەیمێ" ورکریان.

مێرسین

هەرپاسە ئیشکگێریی دادپەروەری بە سەرمەشقایەتیی چوکورۆڤا توهای دەرێ، ڕۆو ٨٨ ـەمینینە بەردەواما.

 ئیزمیر

ئیشکگێریی دادپەروەری بە سەرمەشقایەتیی کۆمەڵەو پەشتیوانی و هامکاری جە بنەیانەو زیندانییاو ئیجە و جمیەروو ژەنە ئازادا تەژەئا، ٣١ـەمین ڕۆنە بەردەواما.

ئیشکگێریی دادپەروەری ڕێکوستەی دەم پارتی کاراباغلار بەردەواما، ڕاوەبەراو دەم پارتی و دەبەپە و نوێنەراو ڕێکوزیا مەدەنییەکاو شارەکەی سەرێ چالاکا مدا. میانەو چالاکییەکەینە، پەیاموو زیندانییە مانگێرتا جە واردەی پەی پەی چالاکیی ئیشکگێریی دادپەروەری ونیێوە، چالاکییەکە بە گۆرانیێ کوردیێ بەردەوام بی.

مێردین

هەرپاسە ئیشکگێریی دادپەروەری مێردیننە بەردەواما، چالاکییەکە بنەیانەو زیندانییا و ئەدایا ئاشتی قوسەرێنە بە دروشموو "بژیوۆ مدرامانوو زیندانییا" و "بێ سەرۆکی ژیوای مەبۆ "درێژەش هەن و خەڵکێوە فرە سەرێ چالاکا مدا. میانەو چالاکییەکەینە پەروەردەو زوانی کوردی بەردەواما. هەرپاسە چالاکێ باس جە ڕێبازوو درێژەدای بە چالاکییەکەی کەرد و چارەسەرەکێشا تاوتۆ کەردێ.

فاتمە بومینە جە ئەدایاو ئاشتی واتش، تا ئازادیی عەبدوڵا ئۆجالانی درێژە بە چالاکییەکاما مدەیمێ و گەرەکمانە زیندانیێ سیاسیێ ئازادێ کریا.

 هەرپاسە کۆچەر تۆکانە ئەدایاو ئاشتیینە واتش: "داواکاریما ئازادیی ڕابەرەکەیمانە، ئێمە گەرەکما نیا چێروو فشاروو کەسینە بژیومێ. ئێمە یەکسانی و ئینسانیەتما گەرەکا. جگە جە یۆگێرتەیی هیچ ڕایێوە تەرە پەی کوردی نەمەنێنۆ. پێسە چەنی گردوو سیاسەتمەداراو تورکی دژوو کوردی یۆگێرتێنێ، پێویسا گەلوو کوردیچ یۆگێرتێ با. پێویسا ئینسان ئەوەڵ خاوەنداری وەنەو گەلەکەیش کەرۆ. ئا وەخت متاوۆ خاوەنداری جە گرد لایێ بکەرۆ. ئەگەر یۆگێرتێ نەبیمێ، پارچە پارچێ بیمێ و دلێنە مشمێ."