کۊمیتەو ڕاۋەبەری جمیەرو شۊڕشگېڵیی یۊگېرتەی گەلان (هەبەدەهە)ی جە ئەرەیاۋنېوەنە باسش چانەی کەرڎەن کە جە تاریخو عوسمانی و کۊماری تورکیاینە وەردەوام زوڵم جە گەلا کریان و داواش کەرڎ پەی ژیایۍ یەکسانی کۊشیایۍ یۊگېرتەی پەرەش پنەدریۊ.

ئەرەیاۋناکە پی جۊرەنە:

"جە تاریخو عوسمانی و تورکەکانە کە پەڕا جە قڕکەرڎەی و کۊکوژی، بە شێۋێۋە سیستماتیک زوڵم جە گەلا عەرەبی، ئەرمەنی، یۊنانی، کورڎی، ئێزدی و عەلەوی کریان. سەرەتا ئەرمەن و دماتەر رۊمەکۍ بە زۊرو، ستەم و جینۊساید و دووروستەیۊ جە خاکو ۋێشانە بەرکریۍ و ئانەیچ بناغەو دۊڵەتو کۊماری تورکیایش نیارە. فرېۋە جە بکوژا ترکی کە دەسشا جە جینۊسایدو ئەرمەنیەکانە بۍ، جە ئەرەمەرزناو کۊمارو تورکیاینە بەشڎاربېنۍ. مسەفا کەمال نەژاڎپەرسی ئەتنیکیش سەرو بنەماو کۊکوژی و تاونایۊ کولتوری درێژە پنەدا. وەرمو ئەرەمەرزناو نەتەوەو ترکی یەکدەسی تا ئارۊیچ وەردەواما.

نەتەوەپەرسی و زوڵمو ترکی وەحشی کە بنەڕەتەکەش جە وەختو جینۊسایدو ئەرمەنی و رومانەکانە نریانەرە، ئارۊ سەرو گەلوو کورڎیرە جابەجۍ کریۊ، وەرو ئانەی ڕا بە نامۍ و گۊرانیۍ کورڎی و داواکارییە دیموکراتیکەکا مەڎریۊ، گرڎ ڕوۋۍ هەرێمەکۍ پارېزناو مەدیای بە شێۋېۋە وەحشیانە بە چەکی کیمیاۋیی بۊمبواران کریا و هەڕەشۍ و ھجومی ئەرەگیری پۍ سەرو خاکو ۋەرنیشتی ئینا ئارانە.

پېسە مەرحەلەو بومەلەرزەکەی، مشۊ ئێمە مەرحەلەو ھورچنەکایچ فاڕمۍ پۍ بوارېۋە کە چنەشەنە راسیەکا عالتەر پۍ گەلا باس کەرمۍ، ڕاو ئەرەکۊشایشا پنە نیشانە بڎەیمۍ. مشۊ ئێمە کۊشیای جە دژوو زوڵمو ستەمەکا کۊلۊنیالیستی و ئەرەگیرا بە تینتەر کەرمۍ و شەقازڵېۋە کە قابل پایشا بۊ جە بنەو گۊشیشا بڎەیمۍ. پۍ ئانەی دەسو چەپەڵو فاشیزمی سەرو گەلەکەیماوە نەمەنۊ مشۊ گوڕ بە کۊشیای جە دژوو دەسەڵاڎداری ئاکەپە و مەهەپەی دریۊ".

هـ . ش