هامقسەکەرەو لوجنەو یاسایی و مافەکاو ئینسانوو هەدەپەی نورای ئۊزدۊغانە ئەرەیاوناش، " ماوەو مانگێوەنە ٢٩٥ کەسۍ گیریێنۍ و ٦١ کەسێشا کریێنۍ زینڎان". ئۊزدۊغانە ئانەیچش وست ڕووە، کە دەسەڵات ئینا ئاژاولەگێڵناینە .
هامقسەکەرەو لوجنەو یاسایی و مافەکانی ئینسانوو پارتوو دیموکراتیکوو گەلان (هەدەپە)ی، نورای ئۊزدۊغانە سەبارەت بە ئۊپراسیۊنەکاو گێرتەی ئامەد، ئەنقەرە و ئیستەنبوڵنە بارەگای گرڎینوو هەدەپەینە کۊنفڕانسێوە رۊنامەوانییش ساز کەرڎ.
ئۊزدۊگانە واتش، کە دەسەڵات جگە جە وێش بە گرڎ کەسی ماچۊ "تیرۊریست" و واتش: "ئا ئۊپراسیۊنۍ جە دژوو پارتەکەیما و گرڎوو لایەنەکاو ئۊپۊزسیۊنی کریا، لاو دادگای و یاساو ئاکەپەیۊ کریا و بۊنەو ورچنیەیۊ زیادشا کەرڎەن".
ئۊزدۊغان سەرنجەش پەی ئاماروو یەک مانگاو گێرتەی و زینڎانکەرڎەی کێشتە و واتش: "جە دژوو ئەنڎاما و ڕاوەبەراو پارتەکەیما، جە دژوو ئەنڎاما و ڕاوەبەراو پارتوو چەپی سەوزی، جە دژوو ئەنڎام و ڕاوەبەراو دەبەپەی، جە دژوو ئەسەپەی، ڕۊنامەوانۍ، مافشناسۍ، هونەرمەنڎۍ، نوێنەراو ڕێکوزیایە مەدەنییەکا جە ئۊپراسیۊنەکانە ٢٩٤ کەسۍ گیریێنۍ و جە کۊو ئا کەسایچە ٦١ کەسێشا قەراروو زینڎانکەرڎەیشا ملەرە سەپیان. چەنی نزیکبییەیۊ ورچنییەی ١٤و ئایاری جە دژوو پارتەکەیما، کورڎۍ و ئۊپۊزسیۊن فشار و ستەمکاری زیادشا کەرڎەن. بێگومان سەبەبێوەش هەن، ئانەیچ ئەنجاموو ئەرەپەرسایەکان. ئاکەپە کەوتەن دۊخوو تەرسۍ و تۊقیایۊ."
ئۊزدۊغان باسوو قسەکاو سولەیمان سۊیلویش کەرڎ، کە بە ورچنیەی ١٤و ئایاریش واتەن "کودەتا" پێسە درێژەش بە قسەکاش دا: "کاربەدەستاو ئاکەپەی دەسشا پا قسا کەرڎەن، کە تەرسی فرێش پۊوە دیارەنە. سولەیمان سۊیلو کە هەزاران پۊلیسۍ، سەروازۍ و پاسەوانۍ وزۊ دماو وێش و هەڵای وەزیروو دلێن، ورچنیەی ١٤و ئایاری پێسە'حەوڵۍ کودەتای' نامۍ منیۊ. پەی پارێزنای ئاسایشوو ورچنیەی مشۊم یەکسەر دمایی بە هەرمانەو وەزارەتوو دلۍ سولەیمان سۊیلوی باریۊ. کە ورچنیەی نزیک بۊوە قسۍ قیناویۍ فرۍ با. دەسەڵات دەس بە دوژمنایەتیی گرڎ کەسی کەرۊ. ئا گەمە و دوژمنکارییە جە ١٤و ئایارینە دماییش مۍ و دلێنە مشۊ. ئێمە جە دژوو ئاژاوەگێڵنای داوا جە گرڎ لایۍ کەرمۍ هۊشیارۍ با و هەڵوێستشا بۊ".
س.ز
