یاگەگیرو هامسەرۊکو گرڎی و وەرپەرسو کۊمیسیۊنو زوۋانی و کەلتووری و هونەری پارتو دیموکراتیکی گەلان (هەدەپە)ی، عومەر ئۊجالان، بۊنەو ڕۊو زوۋانی کورڎیۊ ئەرەیاۋنېوەش ۋەڵاکەرڎۊ و مبارەک بایی جە گرڎو ڕۊڵەکا گەلوو کورڎی کەرۊ.
یاگەگیرو هامسەرۊکو گرڎی و وەرپەرسو کۊمیسیۊنو زوۋانی و کەلتووری و هونەری پارتو دیموکراتیکی گەلان (هەدەپە)ی، عومەر ئۊجالان ، یاۋنەریۍ نۋیسیاش پۍ ڕای گرڎی کورڎی ۋەڵاکەرڎۊ، بۊنەو ١٥ و ئایاری، ڕۊو زوۋانی کورڎیۊ.
جە یاۋنەریەکەنە ئامان:
«جە ڕوۋۍ پېسە ئارۊی و جە ١٥ و ئایارو ١٩٣٢، جە دیمەشقو پایتەختو سوریای، بە سەرپەرشتی جەلادەت بەدرخانی، یوۋەمین ژمارەو ڕۊنامەو «هاوار»ی ۋەڵاکریاوە، هەڵبەت ڕۊنامەو «هاوار»ی دەورېوە تاریخی گۊرەش گېڵنا جە پەرەپنەداو زوۋانی کورڎی، جە ساڵەو ٢٠٠٦ یۊ ڕۊو ١٥ و ئایاری پېسە ڕۊو زوۋانی کورڎی ئشناسیا و ساڵانە یاڎش کریۊوە.
جە سەڎەو یوۋەمو کۊماری، زوۋانی کورڎی وەرەن ڕوو سیاسەتو قەڎەغەکەرڎەی وەردەوامی بیەنۊ. حەرپاسە چی ساڵا دماینە، جە ڕاو ھجومەکا دەسەڵاتو ئاکەپە و مەهەپەیۊ قەڎەغەکەرڎەیشۊ، نیازشابۍ زوۋانی کورڎی دلېنەبەرا. بەڵام بە ئەرەکۊشای گەلوو کورڎی جە ماوەو سەدېوەنە، سیاسەتو وەحشیانەو دەسەڵاتی شکسش ئارڎ. چنی ئی ئەرەکۊشا وەردەوام و کەم ۋېنەینە، زوۋانی کورڎی تا ئارۊ ۋېڕاگریش ئەرمانان، یاۋا ئاستێوە بەقوەت. ئێمە دڵنیېنمۍ ئی ئەرەکۊشایە ئەنجامۍ عالش بۊو جە گرڎو ڕەهەندەکا سەڎەی دوۋەمو کۊماری، زوۋانی کورڎی بۊ بە زوۋانی ڕەسمی و زوۋانو فێرکەرڎەی. بە قوەتو گەلەکەیما، بۍ مرڎای و کەمتەرخەمی، کۊشیای گۊرەتەر کەرمۍ بۊنەو زوۋانی کورڎیۊ، بێگومان سەرگنمۍ.
پی قەناعەتۊ، بە ڕێز و شکۊوە یاڎو ئا نۋیسەر و شاعیر و توێژەرە کورڎییا کەرمېوە، کە جە مەرحەلەو ئەرەمەرزناو و ۋەڵاکەرڎەیۊ «هاوار»ی حۊلی گۊرەشا دان، ڕۊو زوۋانی کورڎیی پیرۊز کەرمۍ جە گرڎو عاشقا و ڕەنجدەرا زوۋانی کورڎی و گرڎو گەلوو کورڎی».
ھ.ش
