شارو مونیخو ئەڵمانیاینە هەڵمەتێوە جەهانیەو گلېرکەردەیۆ ئیمزایا پەی پەخشان عەزیزیۍ، ژەنە زینانیەو کوردی کە سزاو جە قەنارەدایش جە لایەنو حکومەتو ئێرانیوە سەرەرە سەپیان، دەسش پنەکەرڎ.
جە ٦ـەمین چالاکینە جە زنجیرەو چالاکییەکا "ڕووانو شەممەی، نا پەی جە قەنارەدای" بەمەبەسو سەرنج وستەی سەرو ئاژەو زینانیا ژەنا، داکۆکیکارا مافو مرۆڤی کە سزاو جە قەنارەدایشا سەرەرە سەپیان، چالاکی لوواڕاوە.
جە چالاکی ئی حەفتەینە هەڵمەتێوە جەهانیە پەی کۆکەردەیۆ ئیمزایا پەی پەخشان عەزیزی کە سزاو جە قەنارەدایش سەرەرە سەپیان، لوواڕاوە.
بەشدارا چالاکییەکەی بانگەوازو هۆشیاریی گرڎی و یۆگێرتەییشا دژو سیاسەتە سەرکوتکەرەکا حکومەتو ئێرانی کەرد.
جە چالاکیەکەنە جەخت چانەی کریاوە کە جگە جە پەخشان عەزیزیۍ، وریشە مورادیۍ و شەریفە محەمەدیۍ کە ڕووبەڕوو هەڕەشۍ سزاو جە قەنارەدای بیێنێوە، مشۊم دەمودەس ئا سزۍ هۊرشێویاوە.
شیاوو باسیا پەخشان عەزیزیە جە ٤و ئابو ٢٠٢٣ێنە جە تارانەنە باڵبەسە کریا و جە ١١و کانوونو یووەمینە زینانیە کریا و جە ٢٣ۍ تەمووزو ساڵۊو ٢٠٢٤ینە جە لایەنو دادگاو شۆڕشو تارانیوە سزاو جە قەنارەدایش سەرەرە سەپیا.
بانگەوازو: بێدەنگ مەبە، پەی دادپەروەری دەنگت بەرز بکەرۆ
جە پەیامەکاو ئی چالاکییەینە جەخت چانەی کریاوە کە ئی سزۍ دادپەروەرانۍ نیەنۍ و پاشێلکاریێوە ئاشکراو مافەکا مرۆڤینۍ.
هەرپاسە داواو دەمودەس هۊرشێونایۆ سزاو جە قەنارەدایشا پەی وریشە مورادیۍ، پەخشان عەزیزیۍ و شەریفە محەمەدیۍ کەرد کە تەرسەو جە قەنارەدایشا سەرا. هامکات جە چالاکییەکەنە داوا جە گرڎ لێوە کریا پەی وەرقەرار بیەی دادپەروەری دەنگو ۋێشا بەرز بکەراوە.
