کۆمیتەو تەڤ-چاندی ئەرەیاۋنێوەش وەڵاکەرڎۆ و ئاماژەش پانەی دا جە ٣٣ ەمین ساڵیاڎو گەشمەرڎەبیەو فەرماندۍ ئەفسانەیۍ، هونەرمەڼەی شۆڕشگێڵنەی گۊرۍ مزگین (‌غوربەت ئایدن)ێنە بە فەخرێوە گۊرۆ پێشوازیش ۋنە مکەرا و وچیا: "جە ئەوەکۊشای شۆڕشگێڵنی گۊرەو نیم سەدەو شۆڕشو ئازادی کوردەسانینە کە بە سەرمەشقایەتی پەکەکەی لواڕاوە، گرڎ ڕوێش کەرڎ بە ڕۊو قارەمانیەتی و مانگۊو ئایاری جە دەنیز گەزمیشەکاوە تا حەقی قەراری، جە محەمەد قەرە سونگوریۆ تا قاسم ئەنگینی شایەتۍ گەشمەرڎەبیەی هەزاران قارەمانا بۍ. جە هەمانکاتەنە ١١و ئایارو ١٩٩٢ هونەرمەڼێوە شۆڕشگێڵنەی گۊرۍ و فەرماندێما هەمڕا مزگینە جە کاتێنە فەرماندەیی هەرێمو گارزانی کەرۍ، جە تەتوانەنە گەشمەرڎۍ بیە."

ئەرەیاۋناکەی پی جۊرەنە:

"بە نامۍ تەڤگەرو کەلتوور و هونەریۆ کۊشش مکەرمۍ ئی ڕووەیە پېسە ڕۊو گەشمەرڎا کەلتوور و هونەری یاڎ بکەرمېوە و لایەق بە یاڎکەردەیۆ گەشمەرڎا بیمۍ. ١١و ئایاری ڕۊو گەشمەرڎا کەلتوور و هونەری ئێساڵی بە پڕۆسەکەو ڕابەر ئاپۆیۆ کە دەسش پنەکەرڎ پێشوازیش ۋنە مکەرمۍ، ئەوەکۊشای نیم سەدەیما یاوان بە ئاستێوە کۆمەڵایەتی و گەردوونی و دەسکۊتەکا ئیساتۍ پەی هەمیشەی بە زیڼەیی مازۊوە. بێگومان جە وەشکەردەی ئی سەردەمەینە ڕابەر ئاپۆ، گەشمەرڎاما و گەلەکەما خاوەنو دەوری سەرەکینۍ.

هەمڕا مزگینە جە سەرەتاو تەڤگەرەکەیمانە بە کەسایەتی شۆڕشگێڵنی و کۊششکاریش هەم کەسایەتی هونەرمەندیش بێ دووە دڵی ڕیزو وەڵێش گېرت و جە تاریخو ئەوەکۊشایمانە مۆرەو ۋێش جە هەنگامەو سەرەتای دا. کاتێ پەنەوازیما پنەش بیۍ بە هونەرەکەیش، بە کەسایەتی، هەڵوێسی و چەکەکەیش جە ڕیزو وەڵێوە ئەوەکۊشای کەرۍ. کاتێ پەنەوازش کەرد جە ئۊروپا، جە کەشەکا کوردەسانینە و دلۍ گەلینە بە کەسایەتی شۆڕشگێڵنیش کۊتە دلۍ پراکتیکیوە.

ساڵۊو ١٩٨٠ینە چنی گەشمەرڎەبیەو هەڤاڵ هۆزان سەفکانی جە ئۊروپا بەشدارەو ئەرەمەرزنای گروپو هونەری و کۆما مڎرامانی بیە، بناغەو هەرمانەکا تەڤ-چاندیش پنەدریا. بییە بە کەسایەتیێوە جە لایەنو گرڎ کەسێوە وەشەسیۍ. دماو گەشمەرڎەبیەیش گەلەکەما هەمڕا مزگینەش جە باوشی گێرتە و نامۍ زاوڵەکاشا نیا مزگینە. بە هەزاران ئینسانۍ پېوەسۍ بیۍ بە دەنگ و شۆڕشگێڵنیشۆ، هێڵ بە هێڵ بەشدارۍ ڕیزەکاو ئازادی بیۍ و ئەوەکۊشایما یاونا ئی ئاستە.

پی بۊنۆ ١١و ئایاری سەرو ئی بنەمایۍ پێشوازی ۋنە مکەرمۍ، جە گەشمەرڎەی سەرەتاو کەلتوور و هونەری، شۆڕشگێڵن عەلی دۆغانی  تا دەلیل دۆغان، عەلی تەمەلی، هۆزان سەفکانی، هۆزان چیای، هۆزان سەرحەدی، یەکتا هەرەکۆڵی، هیوا شانۆکاری، هەرپاسە هونەرمەڼی گۊرە تاتەو تەیاری کە جە سەرەتاو ٢٠٢٥ ینە جە بەنداوو تشرینینە گەشمەرڎەبی، هەرپاسە گەشمەرڎەو مانگۊو ئایاری سری سورەیا ئۆندەری، گرڎو گەشمەرڎاما بە منەتداریوە یاڎۍ مکەرمېوە و قەول واوەی مکەرمېوە کە لایەق بە یاڎکەردەیۆ ئاڎیشا بیمۍ."