هەپەگە بە ڕێزۊ دوۋۍ گەریلۍ گەشمەرڎېش یاڎکەرڎۍ
هەپەگە ٢ گەریلۍ ژەنیش بە رێزۊ ۋیرئارڎیوە کە بە مەڵامەتو روۋەدایېنە گەشمەرڎۍ بیۍ و ئەرەیاۋناش، "وەعدما واوەی کەرمېوە کە سەرو خەتەو ئاپۊیی دۊزی ئازاڎیی گەلەکەیما بە سەرکۊتەی تاجدار کەرمۍ ".
ناۋەنڎو یاۋنەری و چاپەمەنی هەپەگەی سەبارەڎ پا ٢ گەریلایا کە گەشمەرڎۍ بیېنۍ ئەرەیاۋنېوەش وەڵاکەرڎۊ. ئەرەیاۋناکە پی جۊرەنە:
" ١٩و ئابو ٢٠٢٠یەنە جە مەیڎانو گەشمەرڎا گەڤەرینە جە ئاکامو ئەرەتەقایۊ نارنجۊکېنە بە ھامڕایاما "سۊزدا و جوانا"یرە و گەشمەرڎۍ بیۍ. ھامڕېما سۊزدا و جوانا جە کۊشیای ئازاڎیمانە بە بەشڎاربیەی رەنجدەرانە و گیانبازانەو ۋېشا ئەرک و وەرپەرسیاری سەردەمیشا بە یاگۍ یاۋنا، رەنجشا کێشا و پەی ئاینڎەو ئازاڎیی گەلەکەیما کۊشیۍ. گەشمەرڎەبیەو ھامڕایاما سۊزدای و جوانای بە مەڵامەتو روۋەدایۍ غەڵەتینە، پۍ ئێمە پېسە ھامڕایا تەریما فرە بە ئېش بۍ. بە مەڵامەتو گەشمەرڎەبیەیشاوە و ئی کۊستە پەڕ ئېشەیۊ سەرەوەشی جە خانەۋاڎەو بەڕێز و ھامڕایا گەشمەرڎەیما و تەمامو گەلی وڵاڎپاڕێزو کورڎسانی مکەرمۍ.
زانیاری سەرو ئشناسنامەو ھامڕایاما کە گەشمەرڎۍ بیۍ پی جۊرەنە:
ناسنامۍ: "سۊزدا بۊتان"ە
نامۍ و دمانامۍ: "فوندا کۊچ"ە
یاگۍ جە ئەڎابیەی: وان
نامۍ ئەڎۍ و نامۍ تاتەی: شەیریبا- جەنگیز
وەخت و یاگۍ گەشمەرڎەبیەی: ١٩و ئابو ٢٠٢٠ی/ گەڤەر
ناسنامۍ: "جوانا ئۊرەمار"ە
نامۍ و دمانامۍ: "فاتمە چۊرۊح"ە
یاگۍ جە ئەڎابیەی: جۊلەمێرگ
نامۍ ئەڎۍ و نامۍ تاتەی: کیتهەنە- ئەنوەر
وەخت و یاگۍ گەشمەرڎەبیەی: ١٩و ئابو ٢٠٢٠ی/ گەڤەر
"سۊزدا بۆتان"ە
ھامڕېما "سۊزدا بۊتان"ە جە خانەۋاڎېوە ۋڵاڎپارێزو خەڵکو ئەلباکی وانی ئامېنە دنیاوە. هەم بە مەڵامەتو ھورکۊتەو یاگۍ جە ئەڎابیەیشۊ کە یاگۍ ھەرمانە و چالاکی گەریلاکا ئازاڎیی کورڎسانی بیەن، هەمیچ بە مەڵامەتو ئانەی کە جە خانەۋاڎېوە ۋڵاڎپارێزینە جە ئەڎۍ بیېنە ، ھامڕێما سۊزدا حەر جە زارۊڵەیۊ پارتەکەماش ئشناسا. بېجگە چانەیچ بە مەڵامەتو ئانەی کە لالۊش بەشڎاریش دلۍ ریزەکامانە کەرڎەبۍ ئانەیچ تەئسیرۍ قوڵش سەرو زیاتەر ئشناسای پەکەکەی نیارە. فشاری قورس و سیاسەتو قڕکەرڎەی دوژمنی جە دژوو گەلەکەیما پاسەشکەرڎ کە پېسە ژەنېوە گەنجۍ بەشداری جە ریزەکا کۊشیاینە کەرۊ و سەرو ئا بنەمېچە ئاما دلۍ ریزەکا گەریلای.
دماو یەرۍ ساڵا مەنەیۊ جە مەتینا و بەشڎاری کەرڎەیش جە ئەکادیمیای سەروازینە و پېسە گەریلېوە پسپۊڕۍ روۋەش کەرڎە ھەرېمو زاپی و چاگە بەشڎاریش جە مدرامان دژ بە ھجومە ئەرەگیریەکا سوپاو تورکی ئەرەگیری کەرڎ و جە فرەو چالاکیەکانە دەورش گېڵنان، تەرسیش وستە دڵو سەروازا دوژمنیۊ. دماتەر روۋەشکەرڎە گەڤەری و بەهەمان شکڵ چایچ درێژەش بە کۊشیایدا و پېسە گەریلېوە یەژاستاری حۊلشدا ئەرک و وەرپەرسیاریەکاش بە یاگۍ یاۋنۊ. جە مەنتیقەو گەڤەری بە مەڵامەتو ئەرەتەقایۊ نارنجۊکېوە چنی ھامڕێما جوانا ئۊرەمارۍ گەشمەرڎۍ بیۍ.
"جوانا ئۊرەمار"ە
شارو جۊلەمێرگی و گەلە ۋڵاڎپارێزەکەیش وەردەوام جە کۊشیای ئازاڎیی گەلەکەیمانە بەشڎاریۍ عالشا بیەن، سەرەڕاو گرڎو ھجومە دژە مرۊڤایەتییەکا دوژمنیچ سەرو ڕاو ڕېبازو رابەر ئاپۊی وەردەوامۍ بیېنۍ و هەنگامەشا پۍ دمای نەنیېنە. ھامڕېما جوانا جە خانەۋاڎېوە وڵاڎپارێزو گەڤەرو جۊلەمێرگ-ینە ئامېنە دنیاوە و بە کولتورو مدرامانو عەشیرەتو ئۊرەماری گۊرۍ بیېنە.
ھامڕېما جوانا حەر جە عومرۍ کەمۊ کۊشیای ئازاڎیی گەلوو کورڎسانیش ئشناسا و ئاما ریزو گەریلایۊ و بە کەسایەتیە رەنجدەر و خاکی بیەکەو ۋېش ئەرەکۊشایۍ گۊرەش ئەنجامدا و جە ماوېوە فرە کەمەنە ۋێش وەڵۍ وست و فێرو ژیای پیرۊزو پەکەکەی بیە. بە مەڵامەتو کەسایەتیشۊ جەلاو ھامڕایاشۊ کەسێوە وەشەویسەبۍ. پەروەردەی سەرەتاییش قەندیلەنە ۋینا و دماتەر ڕوۋەشکەرڎە کەشەکا گەڤەری و پەی ئاینڎەو ئازاڎیی گەلەکەیما بە گیانبازی کۊشیا، دماجار جە ئاکامو ئەرەتەقایۊ نارنجۊکېوەنە گەشمەرڎۍ بیە.
وەعد واوەی کەرمېوە کە خۊتانکەرڎەی جە میراسو کۊشیای پیرۊزو گەشمەرڎاما کەرمۍ، سەرو ڕاو ڕېبازی ئاپۊیی ڕاکەرمۍ و بە دڵنیایۊ دۊزی ئازاڎیی گەلوو کورڎسانی بە سەرکۊتەی تاجدار کەرمۍ و لایەق بە گەشمەرڎاما بیمۍ".
هـ . ش
