ناوەندوو ئەرەیاونای و چاپەمەنیی هەپەگەی بارەو گەریلاێوە گەشمەرڎەیۊ ئەرەیاونایوەش وەڵا کەرڎۊ، کە پێسنەنە:

" بنەیانەو هامڕایاما "کاوە چەکڎار" دماو کۊشیاۍ دوورودرێژی جەنازەو گەشمەرڎەکەیماشا ورگێرتۊ و یاوناشاوە زێدوو وێش. پی بۊنەوە ئێمە بە ڕێز و وەشەسیاییوە یاڎوو فەرمانڎەی قارەمانیما "کاوە چەکڎار" کەرمێوە کە، ئایاروو ٢٠١٦نە جە مدرامانوو وێڕاوەبەرینە نسێبین-نە گەشمەرڎە بی. سەرەوەشی جە بنەیانەی بەڕێزییشا، گەلوو ڕوحامانی و گرڎوو گەلوو کورڎی وەڵاتپارێزنی کەرمۍ.

ئشناسنامەو  هامڕا "کاوە چەکڎار"ی ئینەن:

ئشناسنامێ: کاوە چەکڎار

نامۍ و دمامنامێ: ڤاکس توومەن

یاگۍ جەئەدابییەی: روحا

ئەدا و تاتە: دورسون و عەلی

وەخت و شۊنەو گەشمەرڎەبییەی: ئایاروو ٢٠١٦ / مێرڎین

هامڕا کاوەما جە مەنتێقەو بێروجوکی روحاینە جەئەدۍ بییەن، وەلێم جە ئەورووپانە گەورە بییەن. هامڕا کاوەما، کە تاکە زارۊڵەو بنەیانە وەڵاتپارێزنەکەی بۍ، دلۍ گەلەکەیمانە جە ئەورووپانە دلۍ دەزگا وەڵاتپارێزنەرەکانە بە کولتووروو وەڵاتپارێزنی گەورە بییەبۍ. چەنی ئانەیە جە وەڵاتیوە دوور بۍ، جە کولتوور، زوان و ڕاسیی گلێرگەکەیش دوور نەکەوتەبێوە. بە کولتووری بەقووەت و پەروەرڎەو بنەیانەکەیش ڕاسییەکێش زوو زانۍ و بی بە دڵسۊزێوە  هەقەتینوو خاکەکەیش و دلۍ سیستموو مۊدێرنیتەو کاپیتالیزمینە وێش گوم نەکەرڎ، سەرنجەش بە بەرڎەوامی سەروو کۊشیای شۊڕشگێڵنی بۍ و بەشڎاروو دلۍ هەرمانەو گەنجە وەڵاتپارێزنا بۍ. پەی ئانەی بەشڎاریکرڎەی وێش دلۍ کۊشیای ئازادینە گەورەتەر کەرۊ، جە ساڵەو ٢٠٠٨ینە پێسە شۊڕشگێڵنێوە پرۊفیشناڵی بەشڎارییش جە ڕیزەکاو ئێمەنە کەرڎ، جە ساڵەو ٢٠٠٩ینە ڕووەش نیا کەشە ئازادەکاو کورڎسانیوە.

جە بەشێوە تەروو ئەرەیاوناکەو هەپەگەینە ئامان، " جە ساڵەو ٢٠١٢ێنە بە تەجرووبێوە فرەوە رووەش جە سەرنیشتوو کورڎسانی کەرڎە و جە ساڵەو ٢٠١٢ینە وەروو ئانەی بەشڎاری جە هەنگامەو جەنگوو گەلی شۊڕشگێڵنینە کەرۊ لوا هەرێموو بۊتانی. ئەوەڵۊ لوا بۊتان و دماتەر لوا هەرێموو مێرڎینی. گرڎوو  هەرمانە و وەرپەرسییەکاش بەسەرکەوتەیی بەدەس ئارڎۍ.

دماتەر جە ساڵەو ٢٠١٥ینە بەشڎارییش جە ماڕای پلانەکاو دوژمنینە جە چوارچووەو پلانەو تێکبەرڎەینە کەرڎ و جە ئاستوو فەرماندارینە نسێبین-نە بەشڎارییش جە مدرامانوو وێڕاوەبەرینە کەرڎ. جە مدرامانوو نسێبینینە هامکاریی فەرمانڎەی ئەفسانەیی خەباتکار باران (زەمانی چاماک)یش کەرڎ. شانە بەشانەو فەرمانڎەی خەباتکار بارانی کۊشیا و سەنگەرەکاو نسێبینیش چەنی گەنجا پتەوۍ کەرڎۍ. خەڵکوو نسێبینی بیۍ شایەتحاڵوو هەڵوێستی، وەشەسیایی وەڵاتی و گەلی، فیداکاری و شۊڕشگێڵنی و باوروو هەڤاڵ کاوەی پەی ئازادی. هامڕا کاوە ماوێوە فرە کەمنە بی  بە ڕۊڵێوە وەشەسیاو خەڵکوو نسێبینی، پەی ڕۊڵەکاو نسێبینی بی بە سەرچەمەو جۊشوخرۊشی و وەشحاڵی.

هەپەگە ماچۊ، هامڕا گەشمەرڎە "پاڵە نسێبین" پێسە باسووهامڕا کاوەی کەرۊ، " ئەگەر فەرماندێوە جە جزیرنە وەڵی گنۊ، کە دوژمنی وزۊ دلۍ سەندرۊمی و ڕاگێری جە قاڕچنی کەرۊ، ئانەیچ بە هەڵوێست و بەشڎاریکەرڎەی، ڕەنج و فەرمانڎەیی میلیتانی هامشێوەو هامڕا کاوەی بۊ.

هەپەگە ئاشکراش کەرڎ، کە "کاوە چەکڎار" جە ئایاروو ٢٠١٦ینە نسێبین-نە تێکەڵ بە کاروانوو گەشمەرڎا بی.

س.ز