بە بۆنەو هۆرچنیاو و هۆرامانی پسۆ میراسێ کۆن و تاریخی جە لاو یونوسکۆیۆ ، پڵاتفۆرموو هۆرام-ی مۆبارەکبایی جە خەڵکوو هۆرامانی کەرۆ. خەڵکوو وەشەویسو هۆرامانی، هەواڵو هۆرچنیاو هۆرامانی پسۆ هەرێمێ کۆن و تاریخی جە لاو رێکوزیاو یۆنسکۆی دەس پەنە کەردەو هەنگامە گەورەکا دماڕۆیمانە . جە ڕۆ ٢٧-٧-٢٠٢١ جە شاروو فۆجی چینینە بە بەشداری نمانەرا ١٣٩ دەۆڵەت – نەتەوا ،هۆرامان قەباڵەی جەهانیش پەنە بەخشیا. مشۆم گرد لایە بە تایبەت خۆڵکوو هۆرامانی ئانەی خاس بزانا کە هەرمانە و زەحمەت و یۆ بە یۆ چالاکا و وەشەویسا فەرهەنگ و هۆرامانی جە ماوەو ٣٥ ساڵی ویەردە تا ڕۆ بڕیارەکەی هۆ دەس وستەو ئی شانازیە گەورەیە بیەن .

مشۆم ئانەما ویر نەشۆ کە دەوڵەتو جمهووری ئیسلامی پەی ماوەو چنها ساڵا بە شێوە تایبەت وەرگیریش جە سەرکەوتەو ئی هەنگامێ گێرت. چنها جارێ نمانەرا یونسکۆی پەێ سەرداو هۆرامانی بە بەهانێ نا ئەمن بیەی ڕاشا پەنە نەدریە . چنها بەڵگێ ، وتارێ پەیجۆرانێ و تۆمارێ دەنگی و نویسیە کە بە ساڵان وێبەخشانە جەمێ کریەبێنێ . ئا بەڵگێ کە پەێ ئانەی یاویا دەسوو یونسکۆی جە لاو رەیس و سازمان و میراس فەرهەنگی جە دەورەو ئسفەندیار رەحیم مەشایی و پارێزگارو کوردستانی پاسدار ئسماعیل نەجار-ی فۆتیە و بابەتەکە پەردە پۆش کریا .

جە دماو ئانەیە ، جە ڕاو چن چالاکێ خۆڵکوو هۆرامانی جە لاو وەزیروو رۆشنبیری هەرێموو کوردستانی کۆچکەردە فەلەکەدین کاکەیی جە بەین و سالەکا ٢٠١٢ و ٢٠١٣ چن هەنگامێ هۆرگیریە کە بەداخەوە نە ئانە دەسەڵات و پانیشتی هەمیاریشا نەکەرد . کۆشیای پەێ ئەژناساو هۆرامانیشا بە وەرم زانا و داواکاریەکەشا پەشتە و گۆشا وست . وەشبەختانە بەردەوام بیەو چالاکا هۆرامانی جە گرد یاگەنە بە پەشت بەستەی بە وێشا ئا شیرین وەرمە کە بە ساڵان بێ زرنابێشا ، پەێ گەلەکەیما ئارد بە دیی .

پسۆ کۆمسیونو فەرهەنگی پڵاتفۆرموو هۆرام-ی سەرەڕاو مۆبارەکبایی کەردەو هۆرچنیای هۆرامانی پێسە میراتێوە جەهانی بە گەل و کوردی و بە تایبەت خۆڵکوو هۆرامانی ، ئی سەرکەوتەیە جە ئەنجاموو مدرامان و بەرزی ڵێرەو خۆڵکەکەیما زانمێ . ئی شانازیە مشۆم زووتەر چینەیە بەخشیە بە تاریخ ، فەرهەنگ ، زوان و شێوەی ویر کەردەیۆ هۆرامیەکا . بەلام بالادەستی دەۆڵەتێ فاشیست پسۆ جمهووری ئیسڵامی کە بە گرد شێوە دژو شناسنامە و تاریخ و کوردان . هەر پاسە بێ ڵیاقەتی دەسەڵاتێ ناوچەگەرا و عەشیرەتی کوردی جە پانیشتوو کوردستانی کۆسپێ بێنی پەێ ئانەیە ، پرۆژەو بە جەهانی کوردەو هۆرامانی دما گنۆ . ژیواو هۆرامیەکا پانیشتوو کوردستانی جە بەشوو فەرهەنگی و زوانی و ئابووری کە جە چەموو واڵە و برا سۆرانی و بادینیەکاما هیچشا پەێ نەکریان بەروستەو بەشێ ئی راسیەنە .

دماجار مشۆم ئا ڕاسیەیە واچمێ کە خۆڵکوو هۆرمانی فرەتەر چانەیە ڵایقشا کە تا بە ئاڕۆ وینمێ و پەیشا کەردەن . ویەردە ئانەشە نیشانەدان کە هۆرامیەکێ هەر چێوێشا ئیرادە کەردەبۆ سەرشا وستەن . خۆڵکوو هۆرامانی هەمیشە شکۆداروو ئاخێزی ئینسانی و نەتەوەیی بیەن .بە پارێزناو تایبەتمەندیەکا وێشا ، نەتەوێوەشا جە فۆتیای پارێزنان . مشۆم واچمە کە ڵێرەو هۆرامیەکا یۆنسکۆش چڵاکنارە تا جیهان جە تایبەتمەندیەکا هۆرامی و هۆرامانی بێ بەشێ نەبا و بژناساش . ئی شانازیە بەرهەموو زەحمەت و خۆڵکوو هۆرامانیا . هیچ دەۆڵەت ، حزب یا لایانێ تایبەت نماتاوۆ وێش بە مڵکوو ئی شانازیە بزانۆ .

پۆچی هۆرچنیای هەورامانی پێسە میراتێ جەهانی جە لاو یونسکۆی مشۆم بە بنەڕەت و کۆشیای زیاتەری پەێ ئەرەمەرزنایرەو سیستموو وێڕاوەبەری بە تایبەت پەنەیاونای و وانای پەێ خۆڵکوو هۆرامانی بزانمێ . بە بێ بیەو سیستمێ وێڕاوەبەر ، زوان و تایبەتمەندیە کەڵتووری و فەرهەنگیەکاما نە ئانە کە کاڵێ باوە ، بە پێچەوانەوە پاجۆرە کە راپۆرتوو یۆنسکۆی جە ساڵەو ٢٠١٠ نیشانەش دان زوان و هۆرامی تەرسەو فۆتیایش فرەن . جارەتەر ئی سەرکەوتەیە جە گرد لایە مۆبارەکبایی ماچمێ و بە باور بیەی بە وێما پەێ دەس وستەو ئاواتەکاما هەنگامە منیەمێ .

کۆمسیونو فەرهەنگی پلاتفۆرمو هۆرام-ی